ޙަލާލު ގޮތުގައި ކަތިލުން މާ އޯގާވެރިއެވެ.

    ކުކުޅެއް ނުވަތަ ބަކަރިއެއް، ފަދަ އެއްޗެއް ކަތިލާ ވަޤުތު، އެސޮރުމެން ގައިގައި ވޭން އަޅާނޭ ވަރު ހިތަށް އަރާފައި، ދެކޭ މީހުން ވަރަށް ދެރަވެއެވެ. މިފަދައިން، ކަރުގައި ތޫނު ހަތިޔާރެއް، ހިންގާލައިގެން ކަތިލުމަކީ މާ "ރަޙުމް ކުޑަ" ގޮތެއް ކަމުގައި ވެގެން، ހުޅަނގުގެ މީހުން ކުރާ ކަމަކީ، ޖަނަވާރުތައް ކަތިލުމުގެ ބަދަލުގައި، ސިކުނޑިއަށް، ބާވަތެއްގެ ބަޑިއެއް ޖަހައި މަރައިލަނީ އެވެ.

މަސްކެއުން ޙަލާލު އެންމެހާ ޙައިވާންތަކަކީ، ﷲގެ މަޚްލޫޤުންކަމުގައި ވުމާއިއެކު، ކެއުމަށްޓަކައި އެތަކެތި ބޭނުންކުރެވޭނީ، އެކަލާނގެ އިސްމުފުޅު ނަންގަނެ، އެކަލާނގެ އަންގަވާފައިވާ ގޮތުގައި ކަތިލައިގެންނެވެ. މިއީ ހަމަ ބުއްދިވެސް ޤަބޫލުކުރާ ގޮތެވެ. ނަމަވެސް، ދާދި ފަހުން ހުޅަނގުގައި ކުރެވުނު ރިސާރޗެއް ވަނީ މިކަން އަދިމާ ރީއްޗެއްކޮށް ޘާބިތު ކޮށްދީފައިއެވެ. މިދިރާސާ ހެއްދެވި ޖަރުމަން ވިލާތުގެ، ހެނޮވަރ ޔުނިވަރސިޓީގެ ޕްރޮފެސަރ، ވިލްހެމް ޝުލްޒް އާއި ޑރ. ޙާޒިމްއެވެ. ކަތިލެވޭ ޙައިވާނުގެ ސިކުނޑި ހިނގާގޮތްބެލީ އީ.އީ.ޖީ އޭ ކިޔާ ވަސީލަތެއް ބޭނުންކޮށްގެންނެވެ. މިއީ ހިތުގެ ޙަރަކާތްތައްބަލާ  އީ.ސީ.ޖީ އާއި އެއްފަދައިން ސިކުނޑީގެ ޙަރަކާތްތައް ބަލާ އެއްޗެކެވެ. ސިކުނޑީގައި ހިނގާ ޚިޔާލުތަކާއި ޢިޙްސާސްތަކަށް، އަންނަ ބަދަލުތައް މީގައި ކުރެހޭ ރޮނގުތަކުން، ދައްކައިދެއެވެ. މިދިރާސާއިން އެނގުނީ، އިސްލާމީ އުޞޫލުން ކަތިލުމަކީ، އެސޮރުމެންނަށް މާ އޯގާތެރި ގޮތެއް ކަމެވެ.

* ޙަލާލު މަގުން ކަތިލުމަށްޓަކައި، ހަތިޔާރު ކަރުގައި، ހިންގައިލެވުމަށްފަހު، ތިން ސިކުންތުގައި، އީ.އީ.ޖީ އަށް އެއްވެސް ބަދަލެއް ނަދެއެވެ. މީގެ މާނައަކީ، ކަތިލެވުމުގެ ކުރީގައި، ސިކުނޑީގައި ހިނގަމުން އައި އިޙްސާސްތަކަށް ކަތިލެވޭ ވަޤުތުގައި އެއްވެސް ބަދަލެއް ނާދެއެވެ. އެއްވެސް ތަދެއް އިޙްސާސްއެއް ނުކުރެވެއެވެ.

* އެއާއި ޖެހިގެން އަންނަ ތިން ސިކުންތުގައި، ހަށިގަނޑުން، ވަރަށް ގިނަ ލޭތަކެއް ބޭރުވުމާއި އެކު އީ.އީ.ޖީ އިން ދައްކަނީ، ކަތިލެވޭ ޖަނަވާރު، ފުން ނިންޖެއް ނިދާތަނެވެ. ނުވަތަ ހޭނެތޭ ތަނެވެ.

* މި ހަސިކުންތަށްފަހު، އީ.އީ.ޖީ ރިކޯރޑް މުޅިން ސުމަކަށް ދެއެވެ. މާނައަކީ، ސިކުނޑީގެގައި އެއްވެސް، ތަދެއް ނުވަތަ އިޙްސާސެއް ނުވެއެވެ.

   މިއާއި ޚިލާފަށް، ސިކުނޑިއަށް ބަޑި ޖަހައިގެން، "ކަތިލެވޭ" ޖަނަވާރުން ފެނުނީ:

* "ސްޓަން" ކުރުމުން، ސިކުނޑި "އައްސި" ކޮށްލުމަށްޓަކައި، ބަޑި ޖެހުމާއިއެކު، ފެންނަ ފެނުމުގައި، ޖަނަވާރު ހޭނެތުނަސް، އީ.އީ.ޖީ ރެކޯރޑް ދައްކައި ގޮތުގައި، މިބަޑި ޖެހުމާއި އެކު ވަރަށް ވަރުގަދަ ވޭނެއް އެސޮރު އިޙްސާސްކުރެއެވެ.

* އިސްލާމީ އުޞޫލުން ކަތިލެވޭ ޖަނަވާރަށްވުރެ، މާކުރިން މިގޮތަށް މަރާލެވޭ ޖަނަވާރުގެ ހިތް ހިނގުން ހުއްޓެއެވެ. ނަތީޖާއަކީ، ގިނަ ލޭތަކެއް އޭގެ ހަށިގަނޑުން ބޭރުނުވެ ހުރުމެވެ. ލެއަކީ، ބަލި ޖައްސާ ޖަރާސީމުތައް ވަރަށް ފަސޭހައިން އަށަގަންނަ އެއްޗަކަށް ވުމާއިއެކު، މިހެން މަރާލެވޭ ޖަނަވާރުގެ މަހުގެ ޞިއްޙީ ރައްކާތެރިކަން މާ ކުޑައެވެ. އަދި ސިކުނޑިއަސް ބަޑި ޖެހުމާއި އެކު، ސިކުނޑީގެ ދިޔާއާއި، އެހެނިހެން ބައިތައް މަސްގަނޑާއި އެއްވާގޮތް ވެއެވެ.

   ދާދިފަހުން، ކެނެޑާގައި ކުރެވުނު ރިސާރޗެއް ދެއްކި ގޮތުން މިގޮތަށް "ސްޓަން" ކުރުމަކީ، މިދޭތެރޭއަކުން ފެތުރިގެން ދިޔަ "މޮޔަ ގެރީގެ ބަލި" ފެތުރުމަށް ވާރުތަ ކުރާ ކަމެކެވެ. މި ސްޓަޑީ ގެ ޚުލާޞާއަކީ:

1. އިލާހީ އުޞޫލުން ކަތިލުމަކީ، ކަތިލެވޭ ޖަނަވާރަށް އެއްވެސް ވޭނެއް ނާޅާ ގޮތެކެވެ. އެހެންކަމުން އޯގާތެރި ގޮތަކީ މިއީއެވެ.

2. އިސްލާމީ އުޞޫލުން ކަތިލެވިފައިވާ މަސް، ޞިއްޙީ ގޮތުން މާ ރައްކާތެރިއެވެ. މިފަދަ ކަންކަމުންވެސް އެނގޭ އެއްޗަކީ، އިލާހީ އެންގެވުންތަކާއި، ޚިލާފަށް އިންސާނުން އަމިއްލައަށް ހަދާ "ޤާނޫނު" ތަކަކީ ބިލާހެއް ކަމެކެވެ. ނަމަވެސް، މި ޙަޤީޤަތާއި، ހަމައަށް ދިއުމަށްޓަކައި މުއުމިނުންނަށް ކޮންމެހެން ހެނޯވަރ ޔުނިވަރސިޓީ އެއް ބޭނުމެއް ނުވެއެވެ.