ވީޓޯކުރުމުގެބާރު، ޑިމޮކްރަސީގެ ލޭނާރު

     ފަހުޒަމާނަށްއައިސް އަލަށްބާވައިލެއްވުނު ދީނެއްހެން ބައެއްމީހުން އެދީނަކަށް އީމާންވެގެންއުޅޭ ޑިމޮކްރަސީއަކީ އެމީހުން ޤަބޫލުކުރާގޮތުގައި ދުނިޔެ އިޞްލާޙުވާނޭ ހަމައެކަނިނިޒާމެވެ. އަދި އެއީ އިންސާނީޙައްޤުތަކާއި ހަމަހަމަކަމަށްގޮވާލާ ހަމައެކަނިފަލްސަފާއެވެ. މީގެއަވައިގައިޖެހި ވިކިފައިވާ ބައެއްމީހުންގެގާތުގައި ޑިމޮކްރަސީދީނުގެ ކޮންމެމީހަކީ އޭނާގެއަޚެކެވެ. އެނިޒާމަށް ތާއީދުނުކުރާ ކޮންމެމީހަކީ އެމީހެއްގެ ޢަދާވާތްތެރިއެކެވެ. ހަމަމިއާއެކު ބުނާނެއެވެ. މީހަކު ޤަބޫލުކުރާ ޤަބޫލުކުރުމަކުން އެމީހަކު އެއްވެސްކަމެއްގައި ތަފާތުކޮށްގެންނުވާނެއެވެ.



ޑިމޮކްރަސީއަކީ ހަމަހަމަކަމާއި ޢަދުލުއިންޞާފާއި ރައްޔިތުން ބާރުވެރިކުރުމާއި މިހެންގޮސް ޤަލަމުން ދެލިހުސްވެ ލިޔަންހުރި ގަނޑު ހުސްވިޔަސް ނުނިމޭހާ މާތްމަތިވެރި އެއްޗެއްކަމަށް އެއުރެން ޤަބޫލުކުރާއިރު ކަންހުރި ގޮތާމެދު ވިސްނާލުން މުހިންމުކަމުގައިދެކެވެ. އަޅުގަނޑުމެން މިވާހަކަ ލިޔަންމިޖެހުނީ ހަމަ މިމީހުން ދައްކާ ވާހަކައިން ބޮލަށް އުނދަގޫވާތީއެވެ. ތިމާމެން އަމިއްލައަށް މޮޔަހެދިގެން ފުލެއްބިތެއްނެތް އެއްޗަކަށްވަދެއޮތަސް އަނެކުންވެސް ހަމަތިމާމެންހާ މޮޔަވާނެކަމަށް ހީނުކުރާށެވެ!

ޑިމޮކްރަސިގެ ލުޣަވީމާނަ: މިއީ ދެކަލިމައަކުން އުފެދިފައިވާ އަޞްލު ޔޫނާނީ ބަހެކެވެ. ފުރަތަމަ ކަލިމައަކީDemos މީގެ މާނައަކީ ޢާންމުން ނުވަތަ ރައްޔިތުންނެވެ. ދެވަނަ ކަލީމައަކީ kratia އެވެ. މާނައަކީ ޙުކުމެވެ. ވީމާ ޑިމޮކްރަސީއަކީ ރައްޔިތުންގެ ޙުކުމެވެ.
ޢިޞްޠިލާޙީގޮތުން ޑިމޮކްރަސީ މިއަދުމާނަކުރެވެނީ ގިނަމީހުން ބޭނުންވާގޮތަށް އެމީހުންގެކަންކަން ނިންމުމެވެ.
މީގެމާނައަކީ ބާރުތައްފެށޭހިސާބަކީ ހުރިހާކަމެއްގައިވެސްރައްޔިތުންނެވެ. ނުވަތަ ގިނަމީހުންނެވެ. އިސްލާމީ ނަޒަރަކުންބަލާނަމަ މިއީމުޅިން ނުބައިވިސްނުމެކެވެ. އެހެނީ އިސްލާމްދީނަކީ ﷲ ބާވައިލެއްވި ނިޒާމެކެވެ. އެއީ ރައްޔިތުންގެ ވެރިރަސްކަލާނގެ، ރައްޔިތުން އުޅެންޖެހޭގޮތް އަންގަވައި 7 އުޑުގެ މަތިން ބާވައިލެއްވި އެކަލާނގެ ޝަރީޢަތެވެ.

މިއަދު ބޮޑަށް މަޝްހޫރުކުރަމުންދަނީ ލިބަރަލް ޑިމޮކްރަސީއެވެ. އެއީ ބައިމަދުމީހުންގެ ޙައްޤުތައް ޙިމާޔަތްކުރާ ޑިމޮކްރަސީއެވެ. އެއީ" ލާދީނީމީހުންގެ ޙައްޤުތައްކަމަށްބުނާ ޙައްޤުތައް ރައްކާތެރިކުރާ ނިޒާމެވެ." މީގެ ދަށުން އެއްޖިންސުން ކައިވެނިކުރުމާއި ވަލުޖަނަވާރާ ކައިވެނިކުރުމާއި އަމިއްލައަށް މަރުމުންވެސް މިއަދުވަނީ ބައެއްތަންތަނުގައި ހުއްދަކުރެވިފައެވެ. "
ޑިމޮކްރަސީގެ އުޞޫލުބުނާގޮތުން ހުރިހާމީހުންނަކީވެސް ހަމަހަމަ ބައެކެވެ. މިގޮތުން

- ކޮންމެ މީހަށްވެސް ލެވޭނީ އެއްވޯޓެވެ. މީހާ މޮޅުވެގެން ދެވޯޓެއް ނުލެވޭނެއެވެ.
- ކޮންމެމީހަކު ލާ ވޯޓަކީވެސް ބާރުގެގޮތުން އެއްވަރު އެއްޗެކެވެ.

ކަންމިހެންހުރިނަމަވެސް މިނިޒާމުގެ ބަފާކަމުގައިވާ އެމެރިކާއާއި، އަދިވެސް ދުނިޔޭގެ ބާރުގަދަ ޤައުމުތަކުގެ ވޯޓު އެހެންޤައުމުތަކާ ހަމަހަމައެއްނޫނެވެ. މިކަން އެންމެރަނގަޅަށް ފެނިގެންދަނީ ދުނިޔޭގެ ބާރުގަދަ ޤައުމުތަކަށް ލިބިފައިވާ ވީޓޯކުރުމުގެ ބާރުންނެވެ.
ވީޓޯ ކުރުމުގެމާނައަކީ ކަމަކަށްނުރުހުމެވެ. ދުނިޔޭގައިމިއަދު މިކަންހިނގާގޮތަކީ  މުޅިދުނިޔޭގެ ހުރިހާ ޤައުމަކުން އެއްކޮޅުގައި ތިއްބަސް މިބާރުލިބިފައިވާ އެއްވެސްޤައުމަކުން އެކަމަށް އިންކާރުކޮށްފިނަމަ އެކަމެއް ފާހެއްނުވާނެއެވެ. މިބާރުލިބިފައިވާ ޤއުމުތަކަކީ އ.ދ. ގެ ދާއިމީ ފަސްމެންބަރު ޤައުމެވެ. އެއީ

1- އެމެރިކާ
2- އިނގިރޭސި ވިލާތް
3- ރަޝިޔާ
4- ޗައިނާ
5- ފަރަސްސޭސި ވިލާތް މިފަސް ޤައުމެވެ.

މިއިން ޤައުމަކުންނުރުހޭ އެއްވެސްކަމެއް އ.ދ.އިން ފާހެއްނުވާނެއެވެ. ދެން ކޮންހަމަހަމަ ކަމެއްހެއްޔެވެ؟ ކޮންއިންސާނީވަންތަކަމެއްހެއްޔެވެ؟ ގިނަމީހުންގެ ޙައްޤުތައް ކޮބައިހެއްޔެވެ؟ އެބުނާޑިމޮކްރަސީ ކޮބައިހެއްޔެވެ؟ ވީމާ އ.ދ. އަކީ ވަކިޤައުމުތަކެއްގެ މަޞްލަޙަތުތައް ކުރިއަށް ނެރެން އެކުލަވާލާފައިވާ ފަސްމެންބަރުންގެ އަމިއްލަ ޖަމްޢިއްޔާއެކޭވެސް މީހަކުބުނެފާނެއެވެ. ދެން ތިބޭނީ އެޖަމްޢިއްޔާގެ ޢާންމުމެންބަރުންނެވެ. އެމީހުން ކުރަންޖެހޭނެކަމަކީ މިމީހުންގެ މަޞްލަޙަތަށް އެމީހުން ޤައުމުތަކުން ބުނާ ކަންކަންކުރުމެވެ. ނުކުރާނަމަ އަދަބުދެވޭނެއެވެ. ދަތިކުރުމުގެ ފިޔަވަޅު އެޅޭނެއެވެ.

އިސްވެ ބަޔާންކުރެވުނު ފަސްޤައުމުގެތެރެއިން ބައެއްޤައުމުތަކަކީ ދުނިޔޭގައި މިހާތަނަށް ހިންގި އެންމެބޮޑެތި ޖަރީމާތައް ހިންގާފައިވާ ޤައުމުތަކެވެ. ނަމަވެސް މިއިންޤައުމަކާއިދެކޮޅަށް ފިޔަވަޅެއް ނޭޅޭނެއެވެ. އެއީ ވީޓޯކުރާނެއެވެ. އަޅުގަނޑުމެން ހިތަށްއަރަނީ ޑިމޮކްރަސީއޭ ހަމަހަމަކަމޭ ގިނަމީހުން ނިންމާގޮތޭ، ރައްޔިތުންގެޙުކުމޭކިޔާއިރު މިބައިމީހުންގެ ލަދުޙަޔާތް ކޮބައިބާވައެވެ.؟ ދެން މިތަންތަނަށް ވޯޓުލާންގޮސް މިތިބެނީ މޮޔައިންބާވައެވެ؟ ބަލަ ތިމާމެން އެތަނަށްޙާޟިރުކުރުވާފައި ތިތިބީ ކަންކަން ނިންމުމުގައި ތިމާމެންގެ ބަސް ހޯދާކަށްނޫނެވެ. އަދިކިއެއްތަ އެމީހުން ނިންމާކަންކަން ތިމާމެން ލައްވާ ކުރުވަންވެގެންނެވެ. ނޫނީ ތިމާމެންގެ ނިކަމެތިކަން ނާޖާއިޒްގޮތުގައި ބޭނުންކޮށްގެން އެވެރިން ބޭނުންވާ ވަކިކަމަކަށް ތިމާމެންލައްވާ ވޯޓު ވިއްކަންވެގެންނެވެ. ކުޅޭކުޅޭ ބައެއްގެގޮތުގައެވެ. ކަންމިހެން ހުރިއިރު މިވެރިން ކަމެއްކުރާކަށް އެއްވެސްތާކުން ފާސްކުރާކަށް ނުޖެހޭނެއެވެ.

ވީމާ ޑިމޮކްރަސީއަކީ ދެކޮޅު ފޫގޮސްފައިއޮތް ކަށިކެޔޮ ހޮޅުބުރިއެއްފަަދައެއްޗެކެވެ. ޑިމޮކްރަސީ ކުރިއަރުވަން މަސައްކަތްކުރުމުގައި އަވަދިނެތިއުޅެމުންދާމީހުނަށް އަޅުގަނޑުމެން ގޮވާލަން ބޭނުންވަނީ ހަމަހަމަކާއި ޢަދުލު އިންސާފަށް ތިޔަހާވަރަށް ލޯބިކުރާ ނަމަ އ.ދ.ގައި އެއޮންނަ ވީޓޯ ކުރުމުގެ ބާރާ ދެކޮޅަށް ވާހަކަ ދައްކާށެވެ!

ލޮބުވެތިމުސްލިމު އަޚުންނާއި އުޚުތުންނޭވެ! ހޭއަރާތިއްބަވާށެވެ! ފަލަސްޠީނުގެ މުޤައްދަސްބިމުގައި ފަލަސްޠީނުގެދައުލަތް އިޢުލާނުކުރަން ވޯޓުލާދުވަސް އައިސްޖެހެނީއެވެ. ދިވެހިރާއްޖެއިންވެސް ވޯޓެއްލާންޖެހޭނެއެވެ. އެދުވަހުން ބައެއްޤައުމުތަކުން އިންސާނިއްޔަތާއި އިސްލާމްދީނާއި މުސްލިމުންނަށް އޮތްލޯބި އަދިއެޤައުމުގެ މުސްލިމުރައްޔިތުންގެ ޝުޢޫރާއި ވިންދަށް ބަލާމިންވަރު ފިސާރި ރަނގަޅަށް އެންމެންގެ ކުރިމަތީގައި ސާފުވެގެން ދާނެއެވެ.