އިޒްރޭލްގެ ފުލައިޓްތައް ރާއްޖޭގައި ޖެއްސުމާ ދެކޮޅަށް ބަޔަކު ވާހަކަ ދައްކަނީ ސިޔާސީ މަޤުސަދެއްގައި: ޝެއިޚް ހުސެއިން ރަޝީދު

     އިޒްރޭލްގެ ފުލައިޓްތައް ރާއްޖޭގެ ވައިގެ ބަނދަރުގައި ޖެއްސުމާއި ދެކޮޅަށް ބަޔަކު މީހުން ވާހަކަ ތަކެއް ދައްކަނީ ސިޔާސީ މަޤުސަދެއްގައި ކަމަށް އިސްލާމިކް މިނިސްޓްރީގެ ސްޓޭޓް މިނިސްޓަރ އައްޝެއިޚް ހުސެއިން ރައީދު ވިދާޅުވެއްޖެއެވެ.

މިއަދު ނޫހަށް ދެއްވި ހާއްސަ ބަސްދީގަތުމެއްގައި ވާހަކަ ދައްކަވަމުން އަދާލަތު ޕާޓީގެ ރައީސްކަންވެސް ކުރައްވާފައިވާ ޝެއިޚް ހުސެއިން ރަޝީދު ވިދާޅުވީ އިޒްރޭލްގެ ފުލައިޓްތައް ޖެއްސުމަކީ މައްސަލައެއް ކަމަށް ނުދޭކަމަށާއި އެއީ ދީނީ މައްސަލައެއް ކަމަށްވެސް ދެކިވަޑައިނުގަންނަވާކަމަށެވެ.

އެގޮތުން އިޒްރޭލްގެ ބޯޓް ރާއްޖޭގައި ޖެއްސުމާއި ދެކޮޅު ހަދަމުން ދާއިރު އިޒްލާއިއެކު ވިޔަފާރީގެ ގުޅުން މިރާއްޖެއާއި ބަދަހިވެފައި މީގެ ކުރިން ސުރެ އޮންނަކަމަށް އެނާ ވިދަޅުވިއެވެ.

”މައްސަލަ އަކީ އެހެން ބޮޑު މައްސަލަ ގަނޑެއް. މައްސަލައަކީ ސިޔާސީ ބޮޑު މައްސަލަ ގަނޑެއް. ދީނީ މާބޮޑު ގުޅުމެއް ހުރި މައްސަލައެއްނޫން، މި އުޅެނީ އިޤުސާދީ ގޮތުން ކުރިއެރުމަށްޓަކައި ބޯޓު ޖައްސަން ހުއްދަދޭން. މި ކަމާއި ދެކޮޅު ހަދާއިރު އިޒްރޭލާއި އެކު ރާއްޖެއިން ކިހާވަރަކަށް ގުޅުން އެބަ އޮތްތޯ ބަލާލާއިރު އިޒްރޭލާއިއެކު ވިޔަފާރީގެ ގުޅުން އޮންނަތާ ކިތަންމެ ދުވަހެއް. މިހާރުވެސް ރާއްޖޭގައި އިޒްރޭލަގެ ކާނާ އެބަ ވިއްކާ. ދަޅު ކާނާ އެބަ ވިއްކާ. މޭވާ އެބަވިއްކާ. ” އެނާ ވިދާޅުވިއެވެ.

ހަމަ އެހެންމެ އިޒްރޭލްގެ މީހުން ރާއްޖޭގައި ވަޒީފާތަކުގައި އުޅެމުން ގެންދާއިރު އެ ޤައުމުތަކުގެ މީހުން ރާއްޖެއަށް އައިސް ހަދާއިރު ދިވެހިން އިޒްރޭލަށް ގޮސްހަދާކަން އެނާ ވަނީ ފާހަގަ ކުރައްވާފައެވެ.

އަދި ” މިކަން މިހެން ހުރިއިރު އިޒްރޭލްގެ ބޯޓެއް ޖެއްސުމަކީ މައްސަލައަކަށް ވަނީ ކީއްވެތޯ. މީއީ ދީނީ ކަންތައް ގަނޑަކަށް ހަދައިގެން އުޅުނު ނަމަވެސް މިއީ ދީނާގުޅުން ހުރި މައްސަލައެއް ނޫން ކަމަށް ” ހުސެއިން ރައީދު ވިދާޅިވިއެވެ.

މީގެ އިތުރުން ރާއްޖޭ ކަހަލަ ވަސީލަތްތައް މަދު ޤައުމަކުން ހާރިޖީ ގޮތުން ކޮންމެ ޤައުމަކާއި އެކުވެސް ގުޅުން ބޭއްވުމަކީ މުހިންމު ކަމެއް ކަަމަށް އޭނާ ވިދާޅުވިއެވެ.

”އިސްލާމުންނަށް އަނިޔާ ކުރާ މީހުން ދުނިޔޭގައި ބައިވަރު އެބަތިބި. ވަކި ވަކި ޤައުމުތައް ނުދެންނެވި ނަމަވެސް އެ މައްސަލަ އެތައް ޤައުމެއްގައި ވަނީ ދިމާވެފައި. ހުޅަނގު ޤައުމުތަކުގެ ތެރޭގައި ކިތައް ޤައުމުތޯ އިޒްރޭލް ޤައުމުތަކާއި އެއްކޮން ތިބީ. އަދި ފަލަސްދީނު މިނިވަން ޤައުމަކަށް ވިޔަ ނުދިނުމަށް މަސައްކަތްކުރާ ކިތައް ޤައުމުތަށް އެބަތިބި ތޯ. އެހެންވީމަ އިޒްރޭލް އެކަންޏެއްނޫން. މައްސަލައަކީ އެހެން މައްސަލައެއް. މައްސަލައަކީ ސިޔާސީ ބޮޑު އެހެން މައްސަލައެއް ” ހުސެއިން ރަޝީދު ވިދާޅުވިއެވެ.

އިޒްރޭލްގެ މަތިންދާ ބޯޓުގެ އުދުހުންތައް ފަށާ ދުވަހަކީ އަދާލާތު ޕާޓީން ސަރުކާރު ހިންގާ އެމްޑީޕީއާއިއެކު ހަދާފައިވާ ކޯލިޝަން ރޫޅާލާ ދުވަސް ކަމަށް އެ ޕާޓީންވަނީ އިންޒާރުދީފައެވެ.

އެހެން ނަމަވެސް އިޒްރޭލްގެ ބޯޓުތައް ރާއްޖޭގައި ޖެއްސުމުގެ ފުރުސަތު ދިނުމަކީ މައްސަލައެއް ނޫންކަމަށް އެޕާޓީގެ އިސް މެންބަރަކު ވިދާޅުވެފައިވާއިރު މިހާރު އަދާލަތު ޕާޓީން މި ކަމާމެދު އަޅުއްވާނެ ފިޔަވަޅަކާމެދު މި ވަނީ ސުވާލުތަކެއް އުފަދިފައެވެ.

މުރުޝިދު އަބްދުލްހަކީމް

މިއަދުނޫސް