ދަރިފުޅަށް ގުރުއާން ހިތުދަސްކޮށްދޭން ބޭނުންނަމަ އެންމެ ފުރަތަމަ ކުރަންޖެހެނީ ކޮންކަމެއް؟

ސުވާލު:

ދަރިފުޅަށް ގުރުއާން ހިތުދަސްކޮށްދޭން ބޭނުންނަމަ އެންމެ ފުރަތަމަ ކުރަންޖެހެނީ ކޮންކަމެއް؟ ޕޮރޮސީޖަރ އޮޅުން ފިލުވައި ދެއްވިދާނެތޯ؟

ޖަވާބު:

الحمد لله والصلاة والسلام على رسول الله وعلى آله وصحبه، أما بعـد:

ތަކެތި ފަސޭހައިން ދަސްކުރުމަށްޓަކައި ފިޔަވަޅުތަކެއް އަޅަންޖެހެއެވެ. އެގޮތުން:

1.   ފާފަތަކާއި ދުރުހެލިވުން. ސަބަބަކީ ފާފަތަކުގެ އަނދިރިކަމާއި އެކު ޢިލްމުގެ ނޫރު އެއްނުވާނެތީވެއެވެ. މީހާކު އިމާމް މާލިކް-ރަޙިމަހު ﷲ- އާއި ސުވާލު ކުރެއްވިއެވެ. "އޭ ޢަބްދުﷲ ގެ ބައްޕާއެވެ! އެއްޗެތި ހިތުދަސްކުރުމަށް އޮތް ގޮތަކީ ކޮބައިތޯއެވެ؟"، ވިދާޅުވިއެވެ. "ފާފަތަކުން ދުރުހެލިވުމެވެ".

2.   ﷲ ސުބްޙާނަހޫ ވަތަޢާލާ ޛިކްރު ކުރުން ގިނަކުރުން.

3.   ކެއުން މަދުކުރުން. ގިނައިން ކެއުމަކީ މީހާ ކަންނެތްކޮށް، ވަރުބަލިކޮށްލާ ކަމެކެވެ.

4.   ބައެއް ޢިލްމުވެރިން ދެކިލައްވާ ގޮތުގައި ހިތުދަސްކުރުމުގެ ބާރުގަދަ ކުރުމުގެ ގޮތުން މާމުއި ބުއިމަކީ ފައިދާ ހުރި ކަމެކެވެ. އަދި ހިކިމޭބިސްކަދުރު ކެއުމަކީ ވެސް ހިތުދަސްކުރުމުގެ ބާރުގަދަ ކުރާ ކަމެއް ކަމުގައި ބައެއް ޢިލްމުވެރިން ވިދާޅުވެއެވެ.

5.   ބޮލުގެ ކަވާ ޖެހުމަކީ ވެސް ހިތުދަސްކުރުމުގެ ބާރުގަދަވާ ކަމެއް ކަމުގައިވެއެވެ.

ހިތުދަސް ކުރުމުގެ ބާރުގަދަ ކުރުމަށް އެދު ކިޔާނެ ވަކި ދުޢާ އެއް ސުންނަތުން ޘާބިތުވާކަށް ނެތެވެ. އެހެން ނަމަވެސް ކޮންމެ ކަމަކަށްވެސް އެދި އެމީހެއްގެ ބަހުން ދުޢާ ކުރަންވީއެވެ. ﷲ ތަޢާލާ މޮޅަށް ދެނެވޮޑިގެންވެ އެވެ. އެކަލާންގެއީ އަޅުތަކުންގެ ދުޢާ އައްސަވާ، އިޖާބަކުރައްވާ އިލާހެވެ.

އަޅުގަޑުގެ އަމިއްލަ ތަޖްރިބާ އަށް ބަލާފައި ގުރްއާން ހިތުދަސް ކުރުމަށް އެންމެ ފަސޭހަ ގޮތަކީ ދުވާލަކަށް ޞަފްޙާ އެއް ދަސްކުރުމެވެ. އަދި މަޣްރިބް ފަހުން ކޮންމެ އާޔަތެއް 10 ފަހަރަށް ކިޔުމަށްފަހު، ފަތިސްނަމާދުގެ ކުރިން ނުވަތަ ފަހުން ތެދުވެ ކިޔެވުމެވެ. އަދި ކޮންމެ ނަމާދަކަށްފަހުގައިވެސް ބައިގަޑިއެއްހާ އިރު ދަސްކުރިބައި މުރާޖަޢާ ކުރުމަށް ޚާއްޞަ ކުރުމެވެ.والله أعلم

ޖަވާބު ދެއްވީ:

އައްޝައިޚް މުޙައްމަދު ޢިޔާޟު ޢަބްދުއްލަތީފް