ނޫސްތަކުން ހަބަރު: މިސްރު ބަޔަކު ޤާހިރާގައި ހުންނަ އިސްރާއީލުގެ އެންބަސީގެ ޢިމާރާތަށް އަރައިގެންފި

   ޤާހިރާ: (ސެޕްޓެމްބަރ 10) : މިސްރުގައި ހުންނަ އިސްރާއީލުގެ އެންބަސީގެ ތެރެއަށް މިސްރު ރައްޔިތުންގެ ބަޔަކު ގަދަކަމުން ވަދެގަނެ އެތާނގައިވާ ލިޔުންތަކުގެ ތެރެއިން އެތަށް ހާސް ލިޔެކިޔުންތަކެއް އެޢިމާރާތުގެ ކުޑަދޮރުތަކުން ނާއި ބެލްކަނީ ތަކުން ބޭރަށް އުކާލައިފިއެވެ.


ފަލަސްތީނުގެ ރައްޔިތުންނާމެދު އިސްރާއީލުން ހިންގާ ނާޒީ ސްޓައިލްގެ އަނިޔާވެރި ޢަމަލުތަކާމެދު ރުޅިއައިސްފައިވާ މިސްރު ރައްޔިތުންގެ ތެރެއިން އެތަށް ބަޔަކު އިސްރާއީލުގެ އެންބަސީއަށް އަރައިގަތީ އެއެންބަސީގެ ކުރިމަތީގައި އިސްރާއީލުން ބިނާކޮށްފައިވާ ކޮންކްރީޓް ފާރާއި އިލެކްޓްރޯނިކް ސެކިއުރިޓީ ގޭޓް މަރުތޭލާއި ދަގަނޑު ހޮޅި ބޭނުންކޮށްގެން ހަލާކުކޮށްލުމަށްފަހު ގައެވެ.

ރުޅިއައިސްފައިވާ މިސްރުގެ ރައްޔިތުން އިސްރާއީލުގެ އެންބަސީއަށް އަރައިގަތް އިރުވެސް އެތަނުގެ ޙިމާޔަތުގައިތިބި މިސްރުގެ ޢަސްކަރީ ފުލުހުން ރައްޔިތުންނާ ދެކޮޅަށް ބާރުގެ ބޭނުންކޮށް އިސްރާއީލުގެ އެންބަސީ ޙިމާޔަތްކުރަން މަސައްކަތް ކޮށްފައިނުވާ ކަމަށް ބުނެ އިސްރާއީލުންވަނީ މިސްރުގައި ހުންނަ އިސްރާއީލުގެ އެންބަސީ ޙިމާޔަތް ކޮށްދިނުމަށްއެދި އެމެރިކާއަށް އިލްތިމާސް ކޮށްފައެވެ.

މިސްރުގެ ރައްޔިތުން އިސްރާއީލުގެ އެންބަސީއަށް ރޭގެ ވަގުތެއްގައި އަރައިގަތީ އިސްރާއީލުގެ ސަފީރު މިސްރުން ބޭރުކޮށް އިސްރާއީލާއެކު މިސްރުން ބާއްވާ ގުޅުންތައް ކަނޑާލުމަށް އެދި އެތަށް ދުވަހެއްވަން މުޒާހަރާ ކުރުމަށްފަހުގައެވެ. މިމުޒާހަރާތަކުގައި މިސްރުގެ ބާރުގަދަ ޒުވާނަކުވަނީ އިސްރާއީލުގެ އެންބަސީގެ ޢިމާރާތުގައި ހުރިދިދަ ނަގައި ބިންމައްޗަށް ވައްޓާލުމަށްފަހު އިސްރާއީލުގެ އެންބަސީގައި ދެފަހަރެއްގެ މަތިން މިސްރުގެ ދިދަ ނަގާފައެވެ.

އިސްރާއީލުގެ ދިދަ ބިންމައްޗަށް ވައްޓާލުމާއެކު މިސްރުގެ ރައްޔިތުންވަނީ ތަކްބީރާއި ތަހްލީލު ކިޔައި އެދިދައަންދާލައި އިސްރާއީލުގެ އެންބަސީގެ ޢިމާރާތުގައި މިސްރުގެ ދިދަ ނެގި ޒުވާނާ ޤައުމީ ބަތަލަކަށް ހަދާފައެވެ. އިސްރާއީލުގެ އެންބަސީ ބަންދުކޮށް އިސްރާއީލުގެ ސަފީރު މިސްރުން ބޭރުކޮށްލުމުގެ ކޭންޕޭން މިސްރުގެ ރައްޔިތުން ފެށީ މިދިޔަ މަހު އިސްރާއީލުން މިސްރަށާއި ފަލަސްތީނުގެ ޣައްޒާއަށް ދިން ޢުދުވާނީ ޙަމަލާތަކެއްގައި މިސްރު ފުލުހުންގެ 5 މީހަކާއި ފަލަސްތީނުގެ 15 މީހަކު ޝަހީދު ކޮށްލުމާގުޅިގެންނެވެ.

އިސްރާއީލުގެ އެންބަސީއަށް މިސްރު ރައްޔިތުންގެ ބަޔަކު އަރައިގަތް ޙާދިޘާގެ މަންޒަރުދުށް މީހުން ބުނާގޮތުން ރައްޔިތުންގެ ތެރެއިން 26 މީހަކު ވަދެގަތީ ސީދާ އިސްރާއީލުގެ އެންބަސީއަކަށް ނޫނެވެ. އިސްރާއީލުގެ އެންބަސީގެ ލިޔެކިޔުންތަކާއި ތައް ރައްކާކޮށް ފައިވާ އަރުޝީފް ޑިޕާޓްމެންޓަށެވެ. އަދި އިސްރާއީލުގެ ރަސްމީ ލިޔެކިޔުންތައް އުކާލާފައިވަނީ އިސްރާއީލުގެ އެންބަސީގެ ލިޔެކިޔުންތައް ރައްކާކޮށް ފައިވާ އަރުޝީފް ޑިޕާޓްމެންޓް ހުންނަ 18 ވަނަ ބުރީގެ ކުޑަދޮރުތަކުންނާއި ބެލްކަނީ ތަކުންނެވެ.

އިސްރާއީލު ބުނާގޮތުން މިސްރު ރައްޔިތުންގެ ބަޔަކު އަރައިގަތީ އިސްރާއީލު އެންބަސީ ހުންނަ ޢިމާރާތުގެ 18 ވަނަ ބުރީގައި ހުންނަ އިސްރާއީލުގެ އެންބަސީގެ ލިޔެކިޔުންތައް ރައްކާކޮށް ފައިވާ އަރުޝީފް ޑިޕާޓްމެންޓަށެވެ. އެންބަސީގެ އިދާރީ ބަޔަކަށް ނޫނެވެ. މިސްރު ސަރުކާރުންވަނީ މިމައްސަލަ ތަޙްޤީޤް ކުރާނެކަން ހާމަކޮށްފައެވެ.
މިސްރަށް ރައްޔިތުންގެ އިންޤިލާބެއްގައި މިސްރުގެ ކުރީގެ ޑިކްޓޭޓަރ ހުސްނީ މުބާރަކްގެ ވެރިކަން ވެއްޓާލުމަށްފަހު މިސްރުގެ ރައްޔިތުން ގެންދަނީ އެމެރިކާގެ ނުފޫޒުން މިސްރު މިނިވަން ކުރުމަށާއި މުބާރަކްގެ ނިޒާމުން އިސްރާއީލާ އެކު ބޭއްވި ގުޅުންތައް ކަނޑާލުމަށް ގޮވާލައި މުޒާހަރާތައް ކުރަމުންނެވެ. މިކަމުގެ ސަބަބުން އެމެރިކާއާއި އިސްރާއީލުވަނީ ބިރުގެންފައި ކަމަށް ރިޕޯޓްތައް ބުނެއެވެ. (އަލްޖަޒީރާ)