ދީނީ އެއްބައިވަންތަކަން ޙިމާޔަތް ކުރުމުގެ ގަވާއިދުގެ އަސްލުވަނީ ނުރައްކާތެރިގޮތަކަށް އޮޅުވާލާފައި: އަދާލަތު

     ރާއްޖޭގެ ދީނީ އެއްބައިވަންތަކަން ޙިމާޔަތް ކުރުމުގެ ގަވާއިދުގެ އަސްލަށް ނުރައްކާތެރި ބަދަލުތަކެއް ގެނެސްފައިވާކަމަށް ބުނެ ދީނީ ދަންނަބޭކަލުން އިސްކޮށް އުޅުއްވާ އަދާލަތުން އެ ގަވާއިދާއި ދެކޮޅު ހަދައިފި އެވެ.



އިސްލާމިކް މިނިސްޓްރީ ކޮންޓްރޯލް ކުރާ އަދާލަތު ޕާޓީގެ އިލްމްވެރިންގެ ރައީސް ސެއިހް އިލްޔާސް ހުސައިން ސޮއި ކުރައްވާ މިރޭ އާންމު ކޮށްފައިވާ ބަޔާނެއްގައި ބުނަނީ އެ ގަވާއިދު އެންމެ ފުރަތަމަ ފޮނުވި ގޮތަށް ގެޒެޓް ކުރުމަށް ފުލުހުންނާއި އެޓާނީ ޖެނެރަލްއާއި އަދި ރައީސުލްޖުމްހޫރިއްޔާ ވެސް ރުހުންދީފައިވަނިކޮށް އެ ގަވާއިދު ހިފަހައްޓާ ގަވާއިދުގެ އަސްލާއި ކުޅެލާފައިވާ ކަމަށެވެ.
"ދިވެހިރާއްޖޭގެ ތިން އެޓާނީ ޖެނެރަލުން ބައްލަވައި ރުހުން ދެއްވާފައިވާ ޤަވާޢިދެކެވެ. މީގެ އިތުރުން ރައީސުލްޖުމްހޫރިއްޔާ ވެސް ބައްލަވައި ރުހުން ދެއްވާފައި ވަނިކޮށް، މިޤަވާޢިދުގައި ޕޮލިސީ މައްސަލަތައް ހުރިކަމަށް ބުނެ މިޤަވާޢިދު ހިފަހައްޓައި މިޤަވާޢިދުގެ އަޞްލާވަނީ ކުޅެލާފަ އެވެ. މިގޮތުން އެޤަވާޢިދުގައި ހިމަނާފައިވާ ވަރަށް މުހިންމު އަސާސްތައް ވަނީ މިޤަވާޢިދުން އުނިކޮށްފަ އެވެ،" އެ ބަޔާނުގައިވެ އެވެ.

ދީނީ އެއްބައިވަންތަކަމުގެ ގަވާއިދު ފުރަތަމަ ގެޒެޓްކުރުމަށް ފޮނުވާލުމުން ސަރުކާރުން ގެނެސްފައިވާ ބޮޑެތި ބަދަލުތައް ކަމަށް އަދާލަތުން ބުނަނީ ދިވެހިރާއްޖޭގައި ފައްޅި އެޅުން މަނާކުރުމުގެ މާއްދާ އާއި ދިވެހިރާއްޖޭގައި ދީނީ ވަޢުޘުބުނުމާއި ފަތުވާދިނުން އޮންނަން ޖެހޭނީ ސުންނަތްޖަމާޢަތާ އެއްގޮތަށްކަން ބަޔާންކުރާ މާއްދާ އާއި ފަތުވާ ދިނުމުގައި ރިޢާޔަތްކުރަން ޖެހޭ ސުންނަތް ޖަމާޢަތުގެ ބޮޑެތި ދަންނަބޭކަލުންގެ މަޖްލިސްތައް އުނިކޮށްފައިވުމާއި ފުރައްސާރަކުރުން މަނާކަންކަމުގައި ކީރިތި ރަސޫލާ އަޞްޙާބު ބޭކަލުންގެ ވާހަކަ އުނިކޮށްފައިވުމާއި އަދި ސުންނަތް ޖަމާޢަތުގެ ޢަޤީދާ ފެތުރުމަށް ބާރުއަޅާ ބައި އުނިކޮށްފައިވާ ކަމަށެވެ.

"މިކަންކަން ހަރުކަށި ޢިބާރާތުން ކުށްވެރިކޮށް ގެޒެޓްކުރެވިފައިވާ ޤަވާޢިދުން ޢަދާލަތުޕާޓީގެ ޢިލްމުވެރިންގެ މަޖިލީހާއި، ޕާޓީގެ އެންމެހާ މެންބަރުން ބަރީއަވެގެންވާ ކަން ދިވެހިލޮބުވެތި ރައްޔިތުންނަށް ހާމަކޮށް އަންގަމެވެ،" އެބަޔާނުގައިވެ އެވެ. "މިޤަވާޢިދުގައި ކުރިން ހިމެނިފައިނުވާ، އަދި ސައްތައިން ސައްތަ އިސްލާމީ މުޖްތަމަޢަކާ ނުގުޅޭ، އިނގިރޭސި ޤާނޫނުގައިވާ ބައެއް މާއްދާތައް އިތުރުކުރެވިފައިވާކަން ވެސް ފާހަގަކުރަމެވެ. އަދި މިނޫން ވެސް ވަރަށް ނުރައްކާތެރި ބަދަލުތައް މި ޤަވާޢިދަށް ގެނެސްފައިވާކަން ފާހަނގަކުރަމެވެ."

އިސްލާމިކް މިނިސްޓާ ޑރ.އަބްދުލް ،މަޖީދު އަބްދުލް ބާރީ ވެސް ނިސްބަތްވާ އަދާލަތުން ބުނީ ޑރ. މަޖީދު އެގަވާއިދު ގެޒެޓް ކުރުމަށް ރައީސް އޮފީހަށް ފޮނުވާފައި ވަނީ ގަވާއިދު "އެގޮތަށް ގެޒެޓް ނުކުރުމަށް އަންގާފައިވަނިކޮށް އިލމްވެރިންގެ މަޖިލީހުގެ އެއްވެސް މަޝްވަރާއެއް ނެތި" ކަމަށެވެ.

ދީނީ އެއްބައިވަންތަކަން ހިމާޔަތްކުރުމުގެ ގަވާއިދު ގެޒެޓް ކުރިތާ މާގިނަ އިރެއް ނުވެ ޑރ. މަޖީދާއި އެ މިނިސްޓްރީގެ ސްޓޭޓް މިނިސްޓަރު އަދި އަދާލަތުގެ ރައީސް ކަން ކުރެއްވި ޝެއިހް ހުސެއިން ރަޝީދު އަހުމަދު ވަނީ ގަވާއިދާ މެދު ދެކެވޭ ވާހަކަތަކަށް ރައްދުދެއްވާ އެ ގަވާއިދު ހިމާޔަތްކުރައްވާފަ އެވެ.