އަދާލަތުން އެމްޑީޕީއާ ވަކިވެ ކޯލިޝަން އުވާލައިފި

     

އަދާލަތުޕާޓީ އާއި ވެރިކަން ކުރާ އެމްޑީޕީގެ ކޯލިޝަން އެއްބަސްވުން މިރޭ އުވާލައިފި އެވެ. ކޯލިޝަން ރަސްމީކޮށް އުވައިލިކަން މިރޭ ޢިއުލާންކުރެއްވީ އަދާލަތުޕާޓީގެ މަޝްވަރާ މަޖިލިސް ބައްދަލުވުމަށް އެކަން ހުށައެޅުމަށްފަހު ފަހު ހާޒިރުވި 34 މެންބަރުންގެ ތެރެއިން 32 މެމްބަރުންގެ ވޯޓުން ކޯލިޝަން އުވާލަން ފާސްކޮށްގެނެވެ.

ސިއްރު ވޯޓެއް ނެގި ބައްދަލުވުމުގައި ދެ ބޭފުޅަކު ވޯޓު ނުދެއްވައި ތިއްބެވި އެވެ. ޑރ.ބާރީ އާއި ހުސައިން ރަސީދު މިޖަލްސާގައި ބައިވެރިވެވަޑައި ނުގަންނަވާކަމަށް ވެއެވެ.

ނަންބަރު: 02/2011 /އޭޕީ

30 ޖޫން2009 ގައި މޯލްޑިވިއަން ޑިމޮކްރެޓިކް ޕާޓީ ( އެމް.ޑީ.ޕީ)  އާއި އެކު ވެފައިވާ އެއްބަސްވުން އުވާލާ ސަރުކާރާއި އެކު ހަދާފައިވާ ކޯލިޝަނުން ޢަދާލަތު ޕާޓީ ވަކިވުމާއި ބެހޭ ޤަރާރު

الحمد لله رب العالمين، والعاقبة للمتقين، ولا عدوان إلا على الظالمين،  والصلاة والسلام على نبينا محمد وعلى آله وأصحابه أجمعين، ومن تبعهم بإحسان إلى يوم الدين.

وَإِمَّا تَخَافَنَّ مِنْ قَوْمٍ خِيَانَةً فَانْبِذْ إِلَيْهِمْ عَلَى سَوَاءٍ إِنَّ اللَّهَ لا يُحِبُّ الْخَائِنِينَ الأنفال: 58 (މާނައީ: ” ބަޔަކުމީހުންގެ ކިބައިން خيانة ތެރިކަމެއް އަތުވެދާނެކަމަށް، ކަލޭގެފާނު ބިރުފުޅުގަންނަނަމަ (އެބަޔަކާއެކު ކޮށްފައިވާ معاهدة އެއް) އެބަޔަކުގެ މައްޗަށް އަނބުރާ ރައްދުކުރައްވާށެވެ! ހަމަހަމަވާގޮތުގެ މަތިންނެވެ. ހަމަކަށަވަރުން، خيانة ތެރިންދެކެ اللَّه ލޯބިވެވޮޑިގެނެއް ނުވެތެވެ.)

ޢަދާލަތުޕާޓީއަކީ ރާއްޖޭގެ ވަރަށް ގިނަ ޢިލްމުވެރިންނާއި، ދީނާއި ގައުމަށް އިޚުލާސްތެރި އެތައް ހާސް ރައްޔިތުން ތަކެއް ގުޅިގެން ކުރި ބުރަ މަސައްކަތުން  އުފައްދާފައިވާ ޕާޓީއެކެވެ. އަދި މި ޕާޓީއަކީ ވަޠަން ދެކެ ލޯބިވާ އެތައް ހާސް ލޮބުވެތި ރައްޔިތުން ގެ ހިތް ތަކުގެ އުއްމީދު ތަކާއި ގުޅިފައިވާ ދީނީ އަދި ގައުމީ ޙަރަކާތެކެވެ. 2005 ވަނަ އަހަރު ޢަދާލަތުޕާޓީ އުފެދުނު ދުވަހުން ފެށިގެން މިއަދާއި ހަމައަށް ޕާޓީ މަސައްކަތް ކޮށްފައިވަނީ ޕާޓީގެ ދުސްތޫރުގެ 3.1 ގައި ބަޔާން ކޮށްފައިވާ ފަދައިން ޢަދުލު އިންޞާފުގެ މައްޗަށް ބިނާވެފައިވާ ފުރިހަމަ އިސްލާމީ، ސިޔާސީ، އިޖްތިމާޢީ، އިޤްތިޞާދީ، ޘަޤާފީ، އަޚްލާޤީ، ނިޒާމެއް ދިވެހިރާއްޖޭގައި ޤާއިމުކޮށް ކުރިއަރުވައި، ދެމެހެއްޓުމަށެވެ. ޕާޓީގެ ޙަގީގީ ލަނޑުދަނޑި އަކީ މިއީ އެވެ. ޕާޓީގެ މަޝްވަރާ މަޖިލީހުގެ ނިންމުންތަކާާއި ޕާޓީގެ މައިގަނޑު މަސައްކަތްތައް އަމާޒު ކޮށްފައި ވަނީ މި މަގުސަދު ހާސިލް ކުރުމަށް ޓަކައެވެ.

            2008  ވަނަ އަހަރުގެ ރިޔާސީ އިންތިޚާބުގެ ފުރަތަމަ ބުރުގައި “ޖުމުހޫރީ ގުޅުން” ކޯލިޝަންގައި ޢަދާލަތުން ބައިވެރިވީ މިދެންނެވި މަގުސަދު ޙާސިލް ކުރުމަށް އެވަގުތު އެންމެ މަޞްލަޙަތު ހުރި ގޮތަކީ އެއީ ކަމުގައި މަޝްވަރާ މަޖިލީހުން ނިންމުމުންނެވެ. އިންތިޚާބުގެ ދެވަނަ ބުރުގައި” ވަޠަން އެދޭ އިއްތިޙާދު” އަށް ތާއީދު ކުރުމަށް ޢަދާލަތު ޕާޓީގެ މަޝްވަރާ މަޖިލީހުން ނިންމީ އެ ދުވަސްވަރު ރާއްޖޭގެ ލޮބުވެތި ރައްޔިތުންނަށް ކުރިމަތިވެފައިވާ ސިޔާސީ ފިއްތުން ތަކާއި، ލިބެމުންދިޔަ އަނިޔާތަކާއި ދިވެހި ޖައްވުގައި އުފެދިފައިވާ އަނދިރި ކޮޅިގަނޑުތަކަށް ނިމުމެއް ގެނެވޭނީ އެފަދަ އިއްތިޙާދެއް އުފައްދައިގެން ކަމަށް އަދާލަތު ޕާޓީގެ މަޝްވަރާ މަޖިލީހަށާއި ގިނަ މެންބަރުންނަށް އެތައް ގޮތަކުން ޔަގީންވެ ކަށަވަރު ވުމުންނެވެ. ހަމަ އެއާއި އެކު ” ވަޠަން އެދޭ އިއްތިޙާދު” އުފެއްދުމަށްޓަކައި ކުރެވުނު މަޝްވަރާ ތަކުގައި ދިވެހި ލޮބުވެތި ރައްޔިތުންގެ  ދިރިއުޅުމުގެ ޙާލަތާއި ފެންވަރު ރަނގަޅުކުރުމަށް މަސައްކަތް ކުރެއްވުމަށާއި ގައުމުގެ އެންމެހައި ކަންތައްތައް ހެޔޮމަގުން ގެންދެވުމަށް އިޚްލާސްތެރި މަސައްކަތްތަކެއް ކޮށްދެއްވާނެކަމުގެ ޔަގީންކަން އެ އިއްތިޙާދުން ތާއީދުކުރި ދެވަނަ ބުރުގެ ކެންޑިޑޭޓް އަލްފާޟިލް މުޙައްމަދު ނަޝީދު ދެއްވުމުންނެވެ. އަދި ” ވަޠަން އެދޭ އިއްތިޙާދު” އިން އުފައްދާ ސަރުކާރުން މާތްވެގެންވާ އިސްލާމްދީނަށް އުނިކަމެއް ލިބޭފަދަ ޢަމަލެއް ނުކުރާނެކަމުގެ ފުރިހަމަ ޔަގީންކަން ޢަދާލަތު ޕާޓީއަށް ދެއްވުމުންނެވެ.

ދެވަނަ ބުރުގައި ” ވަޠަން އެދޭ އިއްތިޙާދު” އިންތިޚާބު ކާމިޔާބު ކުރުމާއިގުޅިގެން ޢަދާލަތުޕާޓީ ސަރުކާރުގައި ބައިވެރިވެ މަސައްކަތް ކުރަންފެށީ ވަރަށް އިޚްލާސް ތެރިކަމާއި އެކުގައި ދިވެހި ގައުމަށް ޚިދުމަތް ކުރުމުގެ ޢަޒުމުގައެވެ. ސަރުކާރު އުފެދުނުތާ ކުޑަ ދުވަސްކޮޅެއްގެ ތެރޭގައި ކޯލިޝަންގެ ގިނަ ބައިވެރިން ސަރުކާރު ދޫކޮށް ދިއުމުން މިހާހިސާބަށްވެސް ޢަދާލަތު ޕާޓީއިން ސަރުކާރުގައި ދެމިތިބެ ގައުމަށް ޚިދުމަތް ކުރަމުން އައީ  ޙިކުމަތްތެރިކަމާއި ކެތްތެރިކަން ކުރިއަށް ނެގެރެންނެވެ. މިހާ ހިސާބަށް އައިއިރު ޢަދާލަތު ޕާޓީއަށް ފާހަގަ ކުރެވުނީ މިސަރުކާރުން ރާއްޖޭގެ ދީނަށް އިޚުލާސް ތެރިކަން ކުޑަ ކަމާއި، ގައުމުގެ އިސްތިޤްލާލާއި ސިޔާދަތަށް އިޙުތިރާމް ނުކުރާ ކަމާއި، ރައްޔިތުންގެ ދިރި އުޅުމުގެ ޙާލަތު ދުވަހުން ދުވަހަށް ދަށަށްގޮސް  ގައުމުގެ އެންމެހައި ކަންތައްތައް ބޮއްސުން ލައި އިސްލާޙަށް ވޯޓު ދެއްވި ދިވެހި ރައްޔިތުން މާޔޫސް ވެފައިވާ ކަމެވެ. މިފަދަ އެންމެހައި ކަންތައްތައް އިސްލާޙު ކުރުމަށްޓަކައި ޢަދާލަތު ޕާޓީއިން ސަރުކާރަށް ދިން އިޚުލާސްތެރި ލަފާތަކާއި އިރުޝާދު ތަކަށް އެއްވެސް އަޅާލުމެއް ދީފައި ނުވާކަމާއި ރާއްޖޭގެ ދީނާއި އިސްތިޤްލާލާއި ގުޅިފައިވާ ބޮޑެތި މައްސަލަތަކަށް ކުޑަވެސް ހުއްޓުމެއް ގެނެވިފައިވަނީ ރައްޔިތުން ގޮވައިގެން މަގުމައްޗަށް ނިކުމެ މުޒާހިރާ ކޮށްގެން ކަމީވެސް ޙަގީގަތެކެވެ. އަންނަނިވި ކަންތައްތަކަކީ މިގޮތުން ޢަދާލަތު ޕާޓީއިން ފާހަގަކުރާ މުހިއްމު ކަންކަމެވެ.1.    ރައީސުލްޖުމްހޫރިއްޔާ އަލްފާޟިލް މުޙައްމަދު ނަޝީދު ރައީސްކަމާއި ޙަވާލުވެވަޑައިގެންއިރު ބާޒާރުގައި ތަކެތީގެ އަގުތައް ހުރި މިންވަރާ އަޅާ ބަލާއިރު މިއަދު ތަކެތީގެ އަގު އެތައްތަނެއް އުފުލިފައިވުމުގެ ސަބަބުން ރައްޔިތުންގެ އަތްމަތި ދަތިވެ، ލިބޭ އާމްދަނީއިން ދެކޮޅުޖައްސަން ދަތިވެ، ރައްޔިތުން ބިކަވެ، ނިކަމެތިވަމުން ދިޔުން. އަދި މިކަން ޙައްލުކުރުމަށް އެކަށީގެންވާ ފިޔަވަޅުތަކެއް ސަރުކާރުން އަޅާފައިނުވުން.
2.    ކޯޓުގެ ޙުކުމްތަކާއި އެއްގޮތްވާގޮތުގެ މަތިން، އަދި ދިވެހި ދައުލަތުގެ ބަޖެޓުގައި ހިމެނިފައިވާ ގޮތުގެ މަތިން، ސިވިލް ސާރވަންޓުންގެ މުސާރައިން  އުނިކުރިބައި ދޫކޮށްފައިނެތުން.
3.    ވެރިކަމަށް 2 އަހަރާއި 9 މަހަށްވުރެ ގިނަ ދުވަސްވެފައިވާއިރުވެސް ޑޮލަރުގެ ތާށިކަމުގެ މައްސަލައަށް އެއްވެސްވަރެއްގެ ޙައްލެއް ގެނެވިފައިނުވުމާއި، އަދި ޑޮލަރުގެ ތާށިކަން ނައްތާލުމުގެ ނަމުގައި ސަރުކާރުން އަޅާފައިވާ ދޯދިޔާ ފިޔަވަޅުތަކުގެ ސަބަބުން އެތައް ވިޔަފާރިތަކެއް ބަނގުރޫޓުވެ، އެތައް ބައެއްގެ ވަޒީފާ ގެއްލި، ބޭސްފަރުވާއާއި ތަޢުލީމް ފަދަ އަސާސީ ޚިދުމަތްތައް ހޯދުމަށްޓަކައި ރާއްޖެއިން ބޭރަށް ދަތުރުކުރަންޖެހޭ ރައްޔިތުންނަށް ވަރަށް ބޮޑަށް ދަތިވަމުން ދިޔުން.
4.    2011 ވަނަ އަހަރު ފާސްކޮށްފައިވާ ދައުލަތުގެ ބަޖެޓުން މަސްވެރިންނަށް ދިނުމަށް ނިންމާފައިވާ ސަބްސިޑީ ދޫނުކޮށް ހިފަހައްޓާފައިވުން.
5.    ދައުލަތުގެ ބަޖެޓު ޑެފިސިޓާއި ދައުލަތުގެ ދަރަނި އިންތިހާއަށް ބޮޑުވެފައިވުމާއި އަދި ދައުލަތުގެ ޚަރަދު ކުޑަކުރުމަށް ނުހަނު ބޭނުންވެފައިވާ މި ދަނޑިވަޅުގައި، ކުޑަ ސަރުކާރެއް އުފައްދާނެކަމަށް ރިޔާސީ ކެމްޕޭނުގައި ވަޢުދުވެފައިވާ މިސަރުކާރުން ސިޔާސީ މަޤާމުތައް އެއްދުވަހުން އަނެއް ދުވަހަށް ގިނަ ކުރުމާއި ދައުލަތުގެ ބައިތުލްމާލުން ޚަރަދު ކުރައްވައިގެން 2013 ގެ ކެމްޕެއިނު ދަތުރުތައް ކުރައްވަމުން ގެންދިޔުމާއި އަދިވެސް މިނޫން އެތައް އެތައް ގޮތަކުން ދައުލަތުގެ ޚަރަދުތައް އިތުރުކުރަމުން ގެންދިޔުން.
6.    ސަރުކާރުގެ ކުންފުނިތަކުގެ އިސް މަޤާމުތަކަށް، ކަމަށް ގާބިލްނޫން އެމް.ޑީ.ޕީގެ އެކްޓިވިސްޓުން ޢައްޔަންކޮށް، އެ ކުންފުނިތަކުގެ ހިންގުން ދޯދިޔާވުމުގެ ސަބަބުން ޢާންމުންނަށް ލިބޭ ޚިދުމަތްތަކުގެ ފެންވަރު ވަރަށް ބޮޑަށް ހީނަރުވެ، އެ ކުންފުނިތަކަށް ދައުލަތުގެ ބައިތުލްމާލުން އެތައް ބައިވަރު ފައިސާއެއް ބޭކާރުގޮތުގައި ޚަރަދުވަމުން ދިޔުން.
7.    ސަރުކާރުގެ ދޯދިޔާ އިޤްތިޞާދީ ސިޔާސަތުތަކުގެ ސަބަބުންނާއި ޤައުމަށް ދިމާވެފައިވާ އިޤްތިޞާދީ ބޮޑެތި މައްސަލަތައް ޙައްލުކުރުމަށް ސަރުކާރު ނުކުޅެދިފައިވުމުގެ ސަބަބުން ބޭރުގެ އިންވެސްޓަރުންގެ މެދުގައި ރާއްޖެއަށް އޮތް އިތުބާރު ގެއްލެމުން ދިޔުމާއި، ވިޔަފާރިތައް ތަރައްޤީވެ ފުޅާވުމަށް ހުރަސްއެޅެމުން ދިޔުން.
8.    ސަރުކާރުގައި ކޮރަޕްޝަންގެ ކަންތައް ހައްދުފަހަނައަޅާފައި ވުމާއި އެކަމާއި އިދިކޮޅަށް އެކަށީގެންވާވަރާއި ގާތަށްވެސް ފިޔަވަޅުތަކެއް އަޅާފައިނުވުމާއި ކަމާބެހޭ މިނިވަން މުއައްސަސާތަކުގެ އެންގުންތަކަށް އިޙްތިރާމްނުކުރުން.
9.    ކޮރަޕްޝަނަށް މަގުފަހިވާގޮތަށް ދައުލަތުގެ އަގުހުރި ތަރިކަތައް ބޭރުގެ ކުންފުނިތަކަށް ދިގުމުއްދަތަށް ދޫކުރަމުންދިޔުން.
10.    ޔުޓީލިޓީޒް ކުންފުނިތަކުގެ ވަޒީފާތައް، ކޮރަޕްޝަނަށް މަގުފަހިވާގޮތަށް، ދެމުންދިޔުމާއި މިކުންފުނިތައް ޒިންމާދާރުކަންކުޑަގޮތަކަށް ހިންގަމުންދިއުމާއި މިކަމުގެ ސަބަބުން ރައްޔިތުންނަށް ތަޙައްމަލު ކުރަން އުނދަގޫވާވަރުގެ ބޮޑެތި ދަތިތަކާއި ޙާލަތްތައް މެދުވެރިވަމުންދިޔުމާއި، އަދި މިކަމުގެ ސަބަބުން އުފެދޭ ހަމަނުޖެހުންތަކުގެ ސަބަބުން ރަށްރަށުގެ އަމަންއަމާންކަން ގެއްލި ބިރުވެރިކަން ފެތުރެމުންދާ ރަށްތައް ގިނަވަމުންދިޔުމާއި، އަދި މިކަންކަން ޙައްލުކުރުމަށްޓަކައި އެކަށީގެންވާ ފަދަ ފިޔަވަޅެއް ސަރުކާރުން އަޅާފައި ނެތުން.
11.    ޕަބްލިކް ހެލްތު ސެކްޓަރ ލާމަރުކަޒީކުރުމާއި، ސަރުކާރުގެ ދޯހަޅި ސިޔާސަތުތަކުގެ ސަބަބުން ރާއްޖޭގެ ބޮޑެތި ހޮސްޕިޓަލްތަކުގެ ޙާލަތު ދަށަށްގޮސް އެ ސެކްޓަރ އެއްކޮށް ފެއިލްވެފައިވާއިރު އެކަން ރަނގަޅު ކުރުމަށް ހަރުދަނާ މަސައްކަތްތަކެއް ނުކުރުން.
12.    ޤާނޫނީ އިންތިޤާލީ މަރުޙަލާ ނިމުނު ދަނޑިވަޅުގައި ސުޕްރީމްކޯޓުގައި ތަޅު އަޅުވައި ދައުލަތުގެ ޢަދުލުއިންސާފު ހިންގުމުގެ ބާރުގެ މައްޗަށް ނުފޫޒުފޯރުވުން.
13.    ޢަދުލު އިންސާފު ޤާއިމުކުރުމުގެ ބާރަށް ނުފޫޒުފޯރުވުމަށާއި ބިރު ދެއްކުމަށް އެކި ފަހަރު މަތިން، ތަފާތު ގޮތްގޮތަށް އެމް.ޑީ.ޕީގެ އިސް ފަރާތްތަކުން ކުރަމުން އަންނަ މަސައްކަތަށް ސަރުކާރުން ހުއްޓުމެއް ގެނެސްފައިނެތުން.
14.    ރައްޔިތުންގެ މަޖިލީހުގެ ޖަލްސާކުރާމާލަމުގެ ދޮރުގައި ތަޅުއަޅުވައި ރައްޔިތުންގެ ޢިއްޒަތްތެރި މެންބަރުން ރަހީނުކޮށް، އެއްވުން މަނާ ސަރަޙައްދެއްގައި ކޭމްޕު ޖަހައިގެން ސަރުކާރުގެ އިސްވެރިންނާއި ސަރުކާރު ހިންގާ ޕާޓީގެ އެކްޓިވިސްޓުން ތިބުމާއި، މި ޣައިރުޤާނޫނީ ޢަމަލު ހުއްޓުވުމަށް ސަރުކާރުން އެއްވެސް ކަމެއް ނުކުރުން.
15.    މޯލްޑިވްސް ބްރޯޑްކާސްޓިންގ ކޯޕަރޭޝަން (އެމް.ބީ.ސީ)ގެ ޤާނޫނާއި އެއްގޮތްވާގޮތުގެ މަތިން، އަދި ކޯޓުގެ ޙުކުމާއި އެއްގޮތްވާގޮތުގެ މަތިން ސަރުކާރުން ޢަމަލުކޮށްފައިނެތުމާއި އަދި ސަރުކާރުގެ ބަޖެޓުގައި ހިމެނިފައިވާ އެމް.ބީ.ސީގެ ބަޖެޓު ދޫނުކޮށް ހިފަހައްޓާފައިވުން. ހަމައެހެންމެ ދިވެހި ރާއްޖޭގައި އަލަށް ތަރައްގީވަމުން ދިޔަ މިނިވަން މީޑިއާގެ ދޮރުތައް ބަންދުކުރުމަށް ސަރުކާރުން މަސައްކަތްކޮށް އެފަދަ މީޑިއާއެއް އުފެދުމަށް ސީދާގޮތުން ހުރަސްއަޅާފައިވުން.
16.    އިންސާނީ ޙައްޤުތަކާއި ބައިނަލްއަޤުވާމީ ހަމަތަކާއި އުޞޫލުތަކާ ޚިލާފަށް ފަލަޞްޠީނުގެ ލޮބުވެތި ރައްޔިތުންނަށް އަނިޔާކޮށް، މުސްލިމުންގެ މުޤައްދަސް ބިންތަށް ހިފައި އަލްއަޤްޞާ މިސްކިތް ޙިޞާރުކޮށްފައިވާ ޒަޔަނިސްޓު އިޒްރޭލް ސަރުކާރާއެކު ގުޅުން ބަދަހި ނުކުރުމަށް މިނިސްޓްރީ އޮފް އިސްލާމިކް އެފެއާރޒުން ރައީސުލްޖުމްހޫރިއްޔާއަށް ދަންނަވާފައިވަނިކޮށް، ދިވެހި ރައްޔިތުންގެ ނަމުގައި ސިއްރު އެއްބަސްވުންތަކެއް އިޒްރޭލާއިއެކު ވެ، ޤައުމުގެ ސިޔާދަތާއި އިސްތިޤުލާލަށް ނުރައްކާތެރި މިންވަރަކަށް އިޒްރޭލާއި އެކު ގުޅުން ބަދަހިކުރަމުން ދިޔުން.
17.    ރާއްޖޭގެ ތަޢުލީމީ މުޤައްރަރުގެ ތެރެއަށް އިޒްރޭލުގެ ނުފޫޒު ފޯރުވޭގޮތަށް ސަރުކާރުން އެއްބަސްވެފައިވުން.
18.    މަތީ ސާނަވީ މަރްޙަލާގައި އިސްލާމް އަދި ދިވެހި މާއްދާ އިޚްތިޔާރީ މާއްދާއަކަށް ހަދަން ބޮޑެތި މަސައްކަތްތަކެއް ކޮށްފައިވުން.
19.    ކުއްލިއްޔަތުއްދިރާސާތިލްއިސްލާމިއްޔާގެ ޖާގައިތުރު ކުރުމަށް ކުރީގެ ސަރުކާރުން އެ ކުއްލިއްޔާއަށް ދީފައިވާ ބިން އަތުލުން.
20.    އަލްމަދްރަސަތުލް ޢަރަބިއްޔަތުލް އިސްލާމިއްޔާގެ ދަރިވަރުންގެ ޙައްޤުތައް ހޯދުމަށް އެ މަދްރަސާގެ ބެލެނިވެރިންކުރި މަސައްކަތުގައި ރައީސުލްޖުމްހޫރިއްޔާއާއި ބައްދަލުކުރަން ދިއުމުން، އެމީހުންގައިގައި ތަޅައި ޕެޕަރ ސްޕްރޭ ޖަހައި ރަޙުމްކުޑަގޮތަކަށް މުޢާމަލާތުކޮށްފައިވުން.
21.    ޢަރަބި އިސްލާމީ ތަޢްލީމު ހީނަރުކުރުމަށްޓަކައި ސަރުކާރުން މަސައްކަތްކުރާކަން ފާހަގަކުރެވިފައިވުމާއި  އަލްއަޒްހަރު ޔުނިވަރސިޓީއާއި އެހެންނިހެން ޢަރަބި އިސްލާމީ ޤައުމަތަކަށް ދަރިވަރުން ތަޢުލީމް ޙާސިލްކުރުމަށް ދާތީވެ އެކަމާ ކަންބޮޑުވުން ފާޅުކޮށް ސަރުކާރުގެ ވެރިން ބޭރުގެ އިސްފަރާތްތަކާ ވާހަކަތައް ޙިއްސާކޮށްފައިވާކަން ސާބިތުވެފައިވުން.
22.    ދިވެހިރާއްޖޭގެ މީހުން ދިރިއުޅޭ ރަށްރަށުގައި ބަނގުރާ ވިއްކާތަންތަން ނުހެދުމަށް ތަކުރާރުކޮށް މިނިސްޓްރީ އޮފް އިސްލާމިކް އެފެއާޒުން ރައީސުލްޖުމްހޫރިއްޔާއަށް ދަންނަވާފައި ވަނިކޮށް، އެކަމަށް އިޖާބަދިނުމަކާއިނުލައި މީހުން ދިރިއުޅޭ ރަށްރަށުގައި ބަނގުރާވިއްކުމާ ބެހޭ ޤަވާޢިދު ޢާއްމުކުރުން.
23.    ހަށިވިއްކާ ތަންތަން ބަންދު ކުރުމަށްއެދި މިނިސްޓްރީ އޮފް އިސްލާމިކް އެފެއާރޒާއި ޢަދާލަތު ޕާޓީއިން ކުރި މަސައްކަތްތަކަށް ސަރުކާރުން އެކަށީގެންވާ އެއްބާރުލުމެއްދީފައިނުވުން.
24.    ހިންގުމުގެ އެއްވެސް ތަޖުރިބާއެއްނެތް، ނާޤާބިލު މީހުންނަށް ބައެއް އޮފީސްތަކުގެ ހިންގުން ޙަވާލުކުރުމުން، އޮފީސްތައް ނުހިންގި، ތަނުންދޭންޖެހޭ ޚިދުމަތްތަކުގެ ފެންވަރު ދަށްވެ، ބޮއްސުންލާ، އެކަމުގެ ސަބަބުން ޢާއްމު ރައްޔިތުންނަށް ބޮޑެތި ގެއްލުންތަކެއް ލިބެމުން ދިއުން.
25.    ދީނީ އެއްބައިވަންތަކަމުގެ ޤަވާޢިދު އިސްލާމިކް މިނިސްޓްރީއިން ނިންމާ 11 ޢިލްމުވެރިންނާއި ދައުލަތުގެ ތިން ބަންޑާރަނައިބުން ބައްލަވައި ރުހުން ދެއްވުމަށް ފަހު ގެޒެޓްކުރަން ފޮނުވުމުން، އެ ޤަވާޢިދު ސޯޅަ މަސްދުވަސްވަންދެން ހިފަހައްޓައި އެއަށް ބޮޑެތި ބަދަލުތައް ގެނެސް،  އޭގެ އަސްލު ގެއްލޭގޮތަށް، ޒިންމާދާރުކަން ކުޑަގޮތެއްގައި ނެރެފައިވުން.
26.    ދީނީގޮތުން ހަރުކަށި ވިސްނުން ގެންގުޅޭ ފަރާތްތަކަށް އެކި ގޮތްގޮތުން ވާގިވެރިވެ، ދިވެހިރާއްޖޭގެ އިސްލާމީ ވަޙްދަތު  ނަގާލުމަށް މަސައްކަތްކުރަމުން ދިއުން.
27.    ދީނީ ޢިލްމުވެރިންގެ އަގު ވައްޓާލުމަށް ކެނޑިނޭޅި ސަރުކާރުގެ ބައެއް އިސްފަރާތްތަކުން ކުރަމުންދާ މަސައްކަތަށް ސަރުކާރުން އެއްވެސް ފިޔަވަޅެއް އަޅާފައިނުވުމާއި އެފަދަ ކަންކަން ރާވާ ހިންގުމަށް ސަރުކާރުގެ ތެރެއިން މަގުފަހިކޮށްދިނުން.
28.    ޢަދާލަތުޕާޓީގެ ޢިލްމުވެރިންގެ މަޖިލީހުގެ ނާއިބްރައީސް ފަޟީލަތުއްޝައިޚް އިލްޔާސް ޙުސައިންއަކީ ޓެރަރިސްޓެއްކަމަށް ބުނެ ސަރުކާރުގެ ކަމާބެހޭ ފަރާތްތަކުން ބޭރުގެ ނޫސް މަޖައްލާތަކަށް ދޮގު މަޢުލޫމާތު ދީފައިވުން.

އިސްވެ ބަޔާން ކުރެވުނު ސަބަބު ތަކަކާއި އަދި އެފަދަ އިތުރު އެތައް ސަބަބު ތަކައްޓަކައި، 30 ޖޫން 2009 ގައި މޯލްޑިވިއަން ޑިމޮކްރެޓިކް ޕާޓީ އާއި ޢަދާލަތު ޕާޓީއާއި ދެމެދު ވެފައިވާ އެއްބަސްވުން އުވާލާ، ސަރުކާރާއި އެކު ހަދާފައިވާ ކޯލިޝަނުން ޢަދާލަތު ޕާޓީ ވަކިވުމަކީ، ރައްޔިތުންނަށް ލާބައާއި މަންފާހުރި ގޮތުގައި ސަރުކާރު ޒިންމާދާރު ކުރުވުމަށާއި، ދީނާއި ޤައުމުގެ މަސްލަޙަތު އިސްކުރާ ވެރިކަމެއް ދިވެހިރާއްޖޭގައި ޤާއިމުކުރުމަށްޓަކައި ރައްޔިތުންގެ ޙައްގުގައި ކުރަންޖެހޭކަމެއް ކަމުގައި ޢަދާލަތު ޕާޓީގެ މަޝްވަރާ މަޖިލީހަށް ފެންނަ ހިނދު، އިސްވެދެންނެވުނު އެއްބަސްވުން އުވާލާ ސަރުކާރާއިއެކު ހަދާފައިވާ ކޯލިޝަނުން ޢަދާލަތު ޕާޓީ 26 ސެޕްޓެމްބަރ 2011 ވަނަ ދުވަހު ވަކިވުމަށް މަޝްވަރާ މަޖިލީހަށް ޙާޟިރުވީ 34 މެންބަރުންގެ ތެރެއިން 32 މެންބަރުންގެ އަޣްލަބިއްޔަތުން ފާސްކޮށް، ޢަދާލަތު ޕާޓީގެ ދުސްތޫރުގެ 18.1 ވަނަ މާއްދާގެ (ށ) އިން ލިބިދޭ ބާރުގެ ދަށުން މިޤަރާރު ނެރެމެވެ.

    يَا أَيُّهَا الَّذِينَ آمَنُوا إِنْ تَتَّقُوا اللَّهَ يَجْعَلْ لَكُمْ فُرْقَانًا وَيُكَفِّرْ عَنْكُمْ سَيِّئَاتِكُمْ وَيَغْفِرْ لَكُمْ وَاللَّهُ ذُو الْفَضْلِ الْعَظِيمِ – الأنفال: 29

     މާނައީ: ” އޭ إيمان ވެއްޖެ މީސްތަކުންނޭވެ! ތިޔަބައިމީހުން، اللَّه އަށް تقوى ވެރިވާނަމަ، ތިޔަބައިމީހުންނަށް حق އާއި، باطل ވަކިކުރާނެ މަގު، އެކަލާނގެ ދައްކަވާނެތެވެ. އަދި ތިޔަބައިމީހުންގެ ކިބައިން ކުށްފާފަތައް ފިއްލަވާނެތެވެ. އަދި ތިޔަބައިމީހުންނަށް ފާފަފުއްސަވާނެތެވެ. اللَّه އީ، ބޮޑުވެގެންވާ فضل ވަންތަކަމުގެ ވެރިރަސްކަލާނގެއެވެ. “

                   وصلى الله على نبينا محمد وعلى آله وأصحابه أجمعين. والحمد لله رب العالمين، وسيعلم الذين ظلموا أي منقلب ينقلبون.

28 ޝައްޥާލް 1432

26 ސެޕްޓެމްބަރ 2011

                                                                 އަލްމުޚްލިޞް

                                                                عمران عبد اللـّـه صــادق

މަޝްވަރާ މަޖިލީހުގެ ރިޔާސަތު، އަދި ޕާޓީގެ ރައީސް