5:20 PM
އެހެނަސް ﷲ ތަޢާލާގެ ހެޔޮ ރަޙުމަތްފުޅުން މިކަންތައް ބަދަލުވެ އަހަރުމެން އުއްމީދުކުރަމުން އައި ދުވަސް އައެވެ. ދީނީ ޢިލްމުވެރިންނަށް ޙައްޤު ބަސް ބުނުމުގެ ފުރިހަމަ އިޚްތިޔާރު ލިބިގެންދިޔައެވެ. ޙައްޤު ބަސް ބުނެގެން އަނިޔާއެއް ލިބިދާނެ ކަމުގެ ބިރު ކެނޑިގެން ދިޔައެވެ. ދުވަސްތައް ފާއިތުވަމުން ދިޔައެވެ. ރައްޔިތު މީހާއަށް ޙައްޤު ފޯރުކޮށްދިނުމަށް ޢިލްމުވެ އަހުލުވެރިން ބުރަ މަސައްކަތް ކުރިއެވެ. އަދި ﷲގެ ރަޙުމަތް ފުޅުން އަހަރުމެންގެ ތެރޭގައި ޢާއްމުވެފައިވާ ބިދުޢަތަކާއި ޚުރާފާތްތަކުގެ ތެރެއިން ގިނަ ބައެއް ނެތިގެން ދިޔައެވެ. ޙަމްދު ހުރީ ﷲއަށެވެ.
މިިގޮތުން ރާއްޖޭގެ ހުރިހާ ކަންކޮޅުތަކެއްގައިވެސް ބިދުޢައާއި ޚުރާފާތްތައް ވަރަށްބޮޑަށް ނެތިގެން ފަނޑުވެގެން ދިޔައެވެ. މިގޮތުން މިލިޔުމުގައި މިބަލާލަނީ ނަމާދުގައި އަޑުހަރުކޮށް ބިސްމި ކިޔުމާއި ފަތިސް ނަމާދުގައި ދާއިމަށް ޤުނޫތު ކިޔުމުގެ މައްސަލައަށެވެ. ލިޔުން ލިޔަން ޖެހުމުގެ އަސްލާ މިކަންތަކާ ގުޅިފައިވީތީއެވެ.
ނަމާދުގައި އަޑުހަރުކޮށް ބިސްމި ކިޔުމަކީ ރަސޫލުﷲ ޞައްލަﷲ ޢަލައިހި ވަސައްލަމްގެ ސުންނަތާ ދުރު ގޮތް ކަމުގައި ބަޔާންވެގެން ދިޔަ ހިނދު، އަދި ފަތިސް ނަމާދުގައި ދާއިމީ ކޮށް ޤުނޫތު ކިޔުމަކީ ބިދުޢައެއް ކަމުގައި ބަޔާންވެގެން ދިޔަ ހިނދު ގިނަ ބަޔަކު ވަނީ ޙައްޤަށް ރުޖޫޢަ ވެފައެވެ. އެމީހުން ޤަބޫލުކުރާ ގޮތް ދޫކުރަން ބޭނުންނުވެފައި ފިނޑިވެފައި ތިބި ކައްޓަރަ މަދު ބަޔަކު ފިޔަވައެވެ. ޙަމްދު ހުރީ ﷲއަށެވެ.
މިކަންތައް މިގޮތަށް ވެގެން ދިއުމުން ފުރަތަމަ ކޮޅުގައި ބަޔަކު މީހުން ނުރުހުން ފާޅުކޮށް ވައްތަރުތައް ޖައްސާފައިވީނަމަވެސް މިމައްސަލަތަކަކީ މިހާރު ހައްލުވެފައިވާ މައްސަލަ ތަކެވެ. ދެން މިޖެހިލަނީ މައިގަނޑު މައްސަލައަށެވެ. މިލިޔުން ލިޔަން ޖެހުމުގެ އަސްލަށެވެ.
އާދެ! އަހަރުމެންގެ އުއްމީދުތައް އިސްލާމިކް އެފެއާރޒް އާއި އެ މިނިސްޓްރީގެ އިސްވެރިންނާއި މަސްޢޫލުވެރިންނާމެދު ވަރަސް ގިނައެވެ. ރާއްޖޭގެ ދީނީ ޙާލަތު މިއަދަށްވުރެ މާދަމާ ރަނގަޅުވާނެ ކަމަށް އަހަރުމެން އުއްމީދު ކުރީމެވެ. އެހެނަސް....
އެހެނަސް ދުވަސްތައް ފާއިތުވަމުން ގޮސް ޙާލަތު ބަދަލުވެގަން އަންނަން ފަށައިފިއެވެ. ކުރީގެ އަނިޔާވެރިކަމާއި ދީނީ ކަންކަން މުށުތެރެއަށް ލުމުގެ ހުތުރު ގޮތް ރުޖޫޢަ ވުމުގެ މަލަމަތި ފެންނަން ފަށައިފިއެވެ. އެގޮތުން މިއަދު ވަރަސް އިތުބާރު ހުރި ގޮތެއްގައ އިވިގެން ދިޔަ އެންމެ ހޫނު އެއް ހަބަރަކީ އިސްލާމިކް މިނިސްޓްރީއިން ސާކިއުލާރ އެއް ކަންސިލުތަކަށް ފޮނުވި ހަބަރެވެ. މީގައިވާ ގޮތުން ނަމާދުގައި މިސްބި އަޑުހަރުކޮށް ކިޔުން މަޖުބޫރުވާނެއެވެ. ފަތިސް ނަމާދުގައި ޤުނޫތު ކިޔަން ޖެހޭނެއެވެ. މިގޮތަށް ޢަމަލު ނުކޮށްފިނަމަ ވަޒީފާއިން ވަކިކުރެވޭނެ ވާހަކައެވެ. މި ސާކިއުލާ ޢީދު ބަންދަށްފަހު ރަށު އޮފީސްތަކަށް ފޮނުވޭނެ ކަމަށާއި އަދި މިއަށް ޢަމަލު ކުރުމަށް މިސްކިތްތަކުގެ އިމާމުންނާއި މުދިމުންނަށް އެންގޭނެއެވެ.
މާލޭގެ މިސްކިތްތަކުގެ ބައެއް އިމާމުންނަށް މިހާރުވެސް ބިސްމި ބާރަށް ކިޔުމަަށާއި ފަތިސް ނަމާދުގައި ޤުނޫތު ކިޔުމަށް ބުނެފައިވާކަމަށް އެފަރާތްތަކުން މައުލޫމާތު ދެއެވެ. ޚުދު އަޅުގަނޑު ގާތުވެސް މާލޭގެ މިސްކިތްތަކުގެ އިމާމުން މިވާހަކަ މިފަދައިން ބުނެފައިވެއެވެ. އަދި ޤުނޫތު ނުކިޔައިފި ނަމަ ވަޒީފާއިން ވަކިކުރާނެ ކަމަށާއި، ތިމަންނަމެން މީ ޢިލްމުވެރިން ކަމަށާއި ތިމަންމެންނަށް ވުރެ މޮޅަން އިމާމުންނަށް ދީން ނޭގޭނެ ކަމަށާއި، ދިވެހިރާއްޖޭގައި ހުރި އެންމެ ޢިލްމީ މީހަކީ ތިމަންނަ ކަމުގައި ހުސައިން ރަޝީދު ބުނެފައިވެއެވެ.
މިލިޔުން ލިޔަންވެގެން ހުސައިން ރަޝީދުއަށް ގުޅާވެސްލިމެވެ. ސާކިއުލާރ ފޮނުވި ވާހަކަ ބުނިއެވެ. އެގޮތަށް ޢަމަލު ނުކުރާމީހުން ވަޒީފާއިން ވަކިކުރެވޭނެ ވާހަކަވެސް ބުނިއެވެ.
މިކަންތައްތަކަކީ މިރޯދަމަހު މައުލާނާ އިދްރީސް ޙުސައިން އައްޑޫސިޓީ އަށް ގޮސް ދައްކާފައިވާ ވާހަކަތަކަށް ޢަމަލީ ފިޔަވަޅު އެޅުމަށް އިސްލާމިކް މިނިސްޓްރީގައި ތިބޭ މިކަލޭގެއަށް ތަބަޢަވާ މީހުން އަޅާ ޢަމަލީ ފިޔަވަޅެއް ކަމުގައިވުން ވަރަށް ގާތެވެ. މިގޮތުން އިދްރީސް އައްޑޫގައި ދައްކާފައިވާ ވާހަކަތަކުގެ ތެރޭގައި ނަމާދުގައި ބިސްމި ސިއްރުން ކިޔުމަކީ ބިދުޢައެއް ކަމަށާއި، ތަރާވީޙު ނަމާދުގައި 8 ރަކުޢަތް ކުރުމަކީ ބިދުޢައެއް ކަމަށާއި އަދި ފަތިސް ނަމާދުގައި ދާއިމީކޮށް ޤުނޫތުކިޔަން ޖެހޭނެ ކަމަށް ބުނެފައިވެއެވެ. މިއީ ސީދާ މިކަލޭގެގެ ތަޤްރީރުތަކަށް ޙާޟިރުވެ މިވާހަކަތައް އަޑުއަހާފައިވާ އަޚުންގެ ފަރާތުން ލިބިފައިވާ މައުލޫމާތުތަކެވެ.
ކޮންމެއަކަސް އަހަރުމެން އުއްމީދު ކުރި ކަންތައްތައް މިދަނީ ދިމާ އިދިކޮޅަށެވެ. ގޮނޑި ލިބުމުން ޙުސައިން ރަޝީދުމެން ހަލާކު ވެގެން ދިޔައީއެވެ. ހިތާމައިގެ ކޮޅެއްވެސް ނެތެވެ. ބިދުޢަ ސުންނަތަށް ހަދައި ސުންނަތް ބިދުޢަކުރަން ފެށީއެވެ.
ޙައްޤު ގޮތް ފާޅުވުމަށްފަހު ބާޠިލަށް ރުޖޫޢަވާ ބައެއް ކަމުގައި އަހަރުމެން ވާނޭ ކަމަށް ބޮޑު ފިޤުހުވެރިޔާ ހީކުރަނީތޯއެވެ؟ ﷲ ގަންދީ ބުނަމެވެ. ހަމަހިލާ އެހެންނަކުން ނުވާނެއެވެ. އަހަރުމެންގެ ﷲ އަށް އުރެދުމުގައި އެއްވެސް މަޚްލޫޤަކަށް ކިޔަމަން ނުވާ ހުށީމެވެ. ހަމަކަށަވަރުން އަހަރުމެން ކިޔަމަންވަނީ އަހަރުމެންގެ ވެރި ރައްބު ﷲ އަށެވެ.
ޙުސައިން ރަޝީދު އެވެ. އަހަރުމެންނަށް ނަމާދު ކުރަން ދަސްކޮށްދިނީ ކަލެއެއް ނޫނެވެ. ތިއުޅުއްވަނީ އޮޅިގެނެވެ. ކަލޭ ބުނިގޮތަކަށް ނަމާދު ކުރާކަށް ނުޖެހެއެވެ. އެހެނީ ރަސޫލުﷲ ޞައްލަﷲ ޢަލައިހި ވަސައްލަމް ޙަދީޘް ކުރެއްވިއެވެ.
صلوا كما رأيتموني أصلي (رواه البخاري(
މާނައީ: "ތިމަންކަލޭގެފާނު ނަމާދުކުރައްވާތީ ތިޔަބައިމީހުންނަށް ފެނުނު ގޮތަށް ނަމާދު ކުރާށެވެ!"
ޙުސައިން ރަޝީދުއެވެ. ހޭފުޅު ބަލިވެގެން ނޫޅުއްވާށެވެ. މަތީގައި ބަޔާންކުރެވުނު ޙަދީޘް އޮތް އިރު ކަލޭ ބުނާ ބަހަށް ކަލޭ ބުނާ ގޮތަކަށް އަހަރުމެން ނަމާދު ކުރާނޭ ހަމަ އެއްގޮތެއްވެސް ނެތެވެ. އެހެނީ ރަސޫލުﷲ ޞައްލަﷲ ޢަލައިހި ވަސައްލަމްގެ ސުންނަތުން އެކަލޭގެފާނު ނަމާދު ކުރެއްވި ގޮތް ވަރަށް ސާފުކޮށް ފެންނަން އެބައޮތެވެ. އެހެންކަމުން އަހަރުމެން މޮޔަ ހައްދަން ތިމަންނަ އަށް މާބޮޑަށް އެގެއޭ ކަލޭމެންނަށް ނޭގެއޭ ކިޔައިގެން މޮޔަ ގޮވަން ނޫޅުއްވާށެވެ.
ޙުސައިން ރަޝީދުއެވެ. ތިމަންނަ މާމޮޅު މީހަކު ކަމަށް ދައްކަން އުޅުމުން މިފެނުނީ ކަލޭގެ ހުރި ލަދުހަޔާތް ކުޑަކަމާއި ކަލޭގެ ޖާހިލު ކަމާއި މުނާފިޤުކަމެވެ. ކަލޭތީ ނިކަމެތި އިންސާނެއްކަންވެސް ހަނދާންނެތުނީ ތޯއެވެ؟ ރަސޫލާ ޞައްލަﷲ ޢަލައިހި ވަސައްލަމްގެ ބަސްފުޅުގެ މައްޗައް ކަލޭގެ ބަސް ގަދަ ކުރަން އުޅުމުން ހުރި ހަލާކެއްގެ ބޮޑު ކަމާއެވެ!
ﷲ ގަންދީ ބުނަމެވެ. ވަޒީފާ އިން ކެނޑިޔަސް އަހަރުމެންގެ ފަރުވާލެއް ނެތެވެ. އަހަރުމެން މިނަމާދު ކުރާނީ ރަސޫލާ ދަސްކޮށްދެއްވި ގޮތަށެވެ. އެހެނީ އެއީ އަހަރުމެން ކާމިޔާބު ވުމުގެ މަގެވެ. އެނަމާދު ނުބައިވެއްޖެ ނަމަ އަހަރުމެންގެ ހުރިހާ ހެޔޮކަމެއް ނުބައި ވެގެން ދިޔައީހެވެ. ކަލޭގެ ހުރި ނުބައި ކަމާއެވެ. މުޅި ޤައުމު ފަސާދަކުރަން އުޅެނީތާއެވެ.
ޔާ ﷲ! އިބަﷲ އިރާދަކުރައްވަނީ މިކަލޭގެއާއި މިކަލޭގެ އައުވާނުންނަށް ތެދުމަގު ދެއްކެވުން ކަމުގައިވާނަމަ އިބަﷲއަށް ޙަމްދު ހުއްޓެވެ! ޔާ ﷲ. މިކަލޭގެއާއި މިކަލޭގެ އައުވާނުންނެގެ ކިބައިން ޤައުމު ސަލާމަތް ކުރައްވާނދޭވެ! އާމީން!!ނިންމާލަމުން ބުނަމެވެ. ކަލޭމެން ﷲގެ ދީނަށް ފުރިހަމައަށް ރުޖޫޢަވުމަށް ދާންދެން އަހަރުމެން ކަލޭމެންގެ ކިބައިން ބަރީޢަވެގެން ވަމެވެ. ﷲ ތަޢާލާ އަހަރުމެންގެ ފާފަ ފުއްސަވާށިއެވެ. އަދި ޙައްޤު މަގު ފެނި އެމަގުގައި ޘާބިތުވުމުގެ ހެޔޮ ތައުފީޤު ދެއްވާށިއެވެ. އާމީން.
0 comments:
Post a Comment