5:36 PM
ޓްރިޕޮލީ (އޮކްޓޫބަރު 25) - މުއައްމަރުލް ގައްޒާފީގެ ވެރިކަން ނިމުމަކަށް ގެނެސް އުފާ ފާޅުކުރަމުން ދާއިރު އެ ގައުމުގައި ގާއިމުކުރާނީ އިސްލާމީ ޝަރީއާ ކަމަށް މިހާރުގެ ވެރިން ވިދާޅުވުމާ އެކު ލީބިއާގެ އެތެރެއިންނާއި ބޭރުން ވަނީ ފާޑުކިޔުންތައް އަމާޒުވާން ފަށައިފަ އެވެ.
ވަގުތީ ލީޑަރު މުސްތަފާ އަބްދުލް ޖަލީލް ބެންގާޒީގައި ވާހަކަ ދައްކަވަމުން ވިދާޅުވެފައި ވަނީ އާ ލީބިއާގެ ގާނޫނުއަސާސީ އާއި ގާނޫނުތަކުގެ އަސްލަކަށް ވާނީ އިސްލާމީ ޝަރީއާ ކަމަށެވެ. އަދި އިސްލާމީ ޝަރީއަތާ ހިލާފް އެއްވެސް ގާނޫނަކީ ބާތިލް އެއްޗެއް ކަމަށް ފާހަގަކުރައްވަމުން ޖަލީލް ވިދާޅުވީ ލީބިއާގައި ގާއިމުކުރައްވާނީ އިސްލާމީ ޝަރީއާގެ މެދު މިނުގެ އުސޫލުތައް ކަމަށެވެ.
ގައްޒާފީގެ 42 އަހަރުގެ ވެރިކަމަށް ފަހު އޭނާ ހައްޔަރުކޮށް އަވަހާރަކޮށްލާފައި ވާއިރު ޖަލީލް ވިދާޅުވީ ލީބިއާގައި މިހާރު އޮތް ވަރި އާއި ކައިވެންޏާ ބެހޭ ގާނޫނު ޝަރީއަތާ ހިލާފް ކަމަށާއި އެހެންވެ މިހާ ހިސާބުން އެ ގާނޫނު ބާތިލް ކަމަށެވެ.
އަރަބި ދުނިޔެ އަށް އަންނަމުންދާ ބަދަލުތަކާ އެކު ދީނީ ފިކުރު މާބޮޑަށް ފުޅާވެގެން ހިނގައިދާނެ ކަމަށް ބުނެ މިހާރުވެސް ދަނީ އެއް ބަޔަކު ކަންބޮޑުވުން ފާޅުކުރަމުންނެވެ. އަދި މިގޮތަށް ވާހަކަ ދައްކާ މީހުންގެ އަޑު ވަނީ ޖަލީލްގެ ވާހަކަތަކާ އެކު ގަދަވެފަ އެވެ.
އެއް ބަޔަކު ބުނަމުން ދަނީ ލީބިއާ އަށް މި ވަގުތަށް އެންމެ މުހިންމީ ސަލާމަތީ ކަންތައް ރަނގަޅު ކުރުމާއި ތައުލީމީ ކަންކަމަށް އިސްކަން ދިނުން ކަމަށެވެ. މިގޮތަށް ވިސްނާ ލީބިއާ މީހުން ބުނަމުން ދަނީ ނެޝަނަލް ޓްރާންސިޝަނަލް ކައުންސިލް (އެންޓީސީ)ގެ ލީޑަރު މިނިވަންކަމުގެ ވާހަކަ އިއުލާނުކުރެއްވި ތަގުރީރުގައި އެ ވާހަކަތައް ނުދައްކަވާ ޝަރީއާގެ ވާހަކަ ދެއްކެވުމުން ވަރަށް ބޮޑަށް ހައިރާންވާ ކަމަށެވެ.
"މިއީ ވަރަށް ބޮޑު ސިހުމެއް ލިބުނު އަދި ގައުމަށް ރައްދުކުރެވެނު އިހާނެތި ބަސްތަކެއް. ލީބއާ ރައްޔިތުން ފުރާނައިން ގުރުބާން ވުމުން އާ ލީޑަރުން އެންމެ ފުރަތަމަ އިސްކަން ދިން ކަމަކަށް މިވީ ސިއްރުން ކައިވެނިކުރެވޭނެ ގޮތް ހެދުމަށް،" އަންހެނުންގެ ހައްގުތަކަށް މަސައްކަތްކުރާ އުމުރުން 40 އަހަރުގެ ލީބިއާ އަންހެނަކު ބުންޏެވެ.
ވަގުތީ ލީޑަރު ވަނީ ލީބިއާގައި އިސްލާމިކް ބޭންކިން ތައާރަފްކުރައްވާނެ ކަމަށް ވެސް ވިދާޅުވެފަ އެވެ.
މިދިޔަ ހަފުތާގައި އުފެއްދި ޕާޓީ އޮފް ނެޝަނަލް ސޮލިޑާރިޓީގެ ފައުންޑަރެއް ކަމަށްވާ އަބްދުލްރަހްމާން އަލް ޝަތުރު ވިދާޅުވީ ގައުމުގެ އާ ސިޔާސަތުތަކާ ބެހޭ ގޮތުން އެންޓީސީގެ ލީޑަރުން ވާހަކަ ދައްކަވަން އަދި މާ އަވަސް ކަމަށެވެ.
"އެއީ ލީބިއާ ރައްޔިތުންނާއި ސިޔާސީ އެކި ޖަމާއަތްތަކުގެ މެދުގައި މަޝްވަރާކުރެވިގެން ދައްކަން ޖެހޭ ވާހަކައެއް،" އޭނާ ވިދާޅުވި އެވެ.
އޭނާ ވިދާޅުވީ އާ ލީޑަރުން ދެއްކެވި ވާހަކަތަކުގެ ސަބަބުން ގައުމުގެ އަންހެނުންގެ މެދުގައި ނުތަނަވަސްކަމުގެ ވިސްނުމެއް އުފެދިގެން އަންނާނެ ކަމަށެވެ. އަދި މިހާރު އޮތް ކައިވެންޏާއި ވަރިއާ ބެހޭ ގާނޫނަށް އަމަލު ނުކުރަން ނިންމައިފި ނަމަ އޭގެ މާނަ އަކީ ވަރިކުރުމާ އެކު އޭނާ ފިރިމީހާގެ ގެއިން ނިކުމެގެން ދާން މަޖުބޫރުވުން ކަމަށް ވިދާޅުވި އެވެ. އަދި މިއީ ގިނަ އަންހެނުންނަށް ވަރަށް ބޮޑު ދަތި ކަމަކަށް ވާނެ ކަމަށް ވިދާޅުވި އެވެ.
ހުޅަނގުގެ ލީޑަރުން ވެސް ޖަލީލްގެ ވާހަކަތަކަށް ވަރަށް އަވަހަށް ވަނީ ރައްދު ދެއްވައިފަ އެވެ. ޔޫރަޕްގެ އިއްތިހާދުގެ ޚާރިޖީ ސިޔާސަތާ ބެހޭ ވެރިޔާ ކެތަރިން އެޝްޓަން ވިދާޅުވީ ލީބިއާގައި ޝަރީއާ ގާއިމުކުރި ކަމުގައި ވިޔަސް "އިންސާނީ ހައްގުތަކާއި ޑިމޮކްރަސީގެ ހަމަތަކަށް ތަބާވާން ޖެހޭނެ" ކަމަށެވެ.
އިސްލާމީ ޝަރީއާގެ ވާހަކައާ އެކު ބަޔަކު ކަންބޮޑުވުން ފާޅުކުރަމުން ދާއިރު އާ ލީޑަރު ޖަލީލް އަކީ ގައްޒާފީގެ ވެރިކަމުގައި ޖަސްޓިސް މިނިސްޓަރެވެ. ގައްޒާފީގެ ފިކުރާ ދުރުގައި ހުންނެވި ޖަލީލަކީ ސޫފީ މަޒްހަބުގެ ބޭފުޅެކެވެ. އޭނާ ވަނީ ލީބިއާގައި ދީނީ ގޮތުން ހަރުކަށި އެއްވެސް ކަމެއް ފެތުރިގެން ދިޔަ ނުދެއްވާނެ ކަމަށް ވިދާޅުވެފަ އެވެ. އެކަމަކު ކުރިން އަލްގާއިދާއާ ވެސް ގުޅުން އޮތް ލީބިއާގެ ޖަމާއަތެއް ކަމަށްވާ ލީބިއަން އިސްލާމިކް ފައިޓިން ގްރޫޕްގެ ބާރު ގަދަވަމުން އަންނަ ކަމަށާއި އެ މީހުންނަށް ސިޔާސީ މައިދާނުން ބާރުގަދަ މަގާމުތަކެއް ލިބޭނެ ކަމަށް ބެލެވިފަ އެވެ. --އޭއެފްޕީ
0 comments:
Post a Comment