5:34 PM
އަދާލަތު ޕާޓީން ސަރުކާރުން ވަކިވުމާ ގުޅިގެން ޑރ. މަޖީދުގެ އިތުރުން ސްޓޭޓް މިނިސްޓަރު ޝޭހު ހުސެއިން ރަޝީދު އަހުމަދު ވެސް ސަރުކާރުން އިސްތިއުފާ ދެއްވުމަށް ޕާޓީގެ މަޝްވަރާ މަޖިލީހުން ވަނީ ކުރިން އެދިފަ އެވެ. އަދި އެ ޕާޓީގެ ނިންމުމަށް އިހުތިރާމް ކުރެއްވުމަށް ކަމަށް ވިދާޅުވެ މިނިސްޓަރު ކަމުން އިސްތިއުފާ ދެއްވުމަށް ފަހު ހަފުތާއެއްހާ ދުވަސް ފަހުން އަލުން އެ މަގާމުގެ ހުވާ ޑރ. މަޖީދު ކުރެއްވުމާ ގުޅިގެން އަދާލަތު ޕާޓީން ވަނީ ވަރަށް ބޮޑަށް ފާޑު ކިޔައިފަ އެވެ.
"ޑރ. މަޖީދު އިސްތިއުފާ ދެއްވި ދުވަހު އަޅުގަނޑު ދެންނެވިން އެއީ ވަރަށް ނަމޫނާ ނިންމެވުމެކޭ. އެ މަގުން އެހެން ބޭފުޅުން ވެސް ވަޑައިގަތުމަށް ދެންނެވިން. އެކަމަކު މިއަދު އަޅުގަނޑަށް ވަރަށް ހިތާމައާ އެކު ދަންނަވަން ޖެހެނީ އެއީ ޕާޓީގެ ނިންމުންތަކަށް އިހުތިރާމް ކުރުމުގެ ސިފަ ގެއްލިގެން ދިޔަ ނިންމުމެކޭ،" ޝެއިޚު އިމްރާން ވިދާޅުވި އެވެ. "ޕާޓީއެއްގެ އިސް މަގާމެއްގައި ހުންނެވި ބޭފުޅަކު ޕާޓީއާ މަޝްވަރާ ކުރުމެއް ނެތި މި ގޮތަށް ކަންތައް ކުރުމަކީ ހަގީގަތުގައި ޕާޓީ އަށް އިހުތިރާމް ނުކުރުމާއި ލޯޔަލްޓީ ނެތްކަން ހާމަކޮށްދޭ ކަމެއް."
ޑރ. އިމްރާން ވިދާޅުވި ގޮތުގައި ޑރ. މަޖީދު އަލުން މިނިސްޓަރުކަމުގެ ހުވާ ކުރެއްވީ އަދާލަތު ޕާޓީއާ މަޝްވަރާ ކުރެއްވުމެއް ނެތި އަދި އެ ޕާޓީގެ އެއްވެސް ބައިވެރިވުމެއް ނެތި އެވެ. އަދި އެ ޕާޓީން ޑރ. މަޖީދު ވަކިވެވަޑައިގެންފައި ނެތް ކަމަށް ވެސް އޭނާ ވިދާޅުވި އެވެ.
ޑރ. މަޖީދު ވަޒީރުކަމުގެ ހުވާ މިއަދު ކުރެއްވިއިރު، އެފަދަ ކަމެއް ގަސްދު ކުރައްވަންތޯ މިދިޔަ ހުކުރު ދުވަހުގެ ރޭ "ހަވީރު" ން ދެންނެވުމުން ވިދާޅުވެފައި ވަނީ "އަޅުގަނޑު އަދި ތިޔަ ކަހަލަ ވިސްނުމެއް ނުގެންގުޅެން" ކަމަށެވެ. އެހެން ނަމަވެސް އޭނާ އަލުން ވަޒީރު ކަމަށް ވަޑައިގަންނަވާކަން އަދާލަތު ޕާޓީގެ އިސް ވެރިންނަށް އެ ރޭ ދެންނެވި ކަމުގެ އަޑުތައް ވަނީ ފެތުރިފަ އެވެ.
އަދާލަތުން ސަރުކާރާ އެކު ވެފައިވާ ކޯލިޝަނަށް އުވާލުމާ ގުޅިގެން އިސްތިއުފާ ދެއްވައި އަލުން މިނިސްޓަރުކަމާ ހަވާލުވެވަޑައިގެންނެވީ، އަމިއްލަ މަސްލަހަތަށް ވުރެ ގައުމަށް ޚިދުމަތް ކުރެއްވުމުގެ ބޭނުމުގައި ކަމަށް ޑރ. އަބްދުލް މަޖީދު އަބްދުލް ބާރީ މިއަދު ވިދާޅުވެއްޖެ އެވެ.
އިސްލާމިކް މިނިސްޓްރީ ހިންގެވުމާ ދެ ވަނަ ފަހަރަށް ހަވާލުވެވަޑައިގެން ނޫސްވެރިންނާ ބައްދަލުކުރައްވައި ޑރ. މަޖީދު މިއަދު ވެސް ވިދާޅުވީ އިސްތިއުފާ ދެއްވީ އަދާލަތު ޕާޓީގެ ނިންމުމަށް އިހްތިރާމްކުރެއްވުމުގެ ގޮތުން ކަމަށެވެ. އެކަމަކު ދެ ވަނަ ފަހަރަށް މިނިސްޓަރުކަން ސަރުކާރުން ހުށަހަޅާނެ ކަމަށް އުއްމީދުނުކުރައްވާ ކަމަށް ވެސް އޭނާ ވިދާޅުވި އެވެ.
"އަޅުގަނޑު ދެކޭ ގޮތުގައި އަދާލަތު ޕާޓީ ވެސް އުފެއްދީ ދީނީ ގޮތުންނާއި ގައުމީ ޚިދުމަތް ފުޅާ ދާއިރާއެއްގައި ކުރުމަށް. އެހެންކަމުން ކޮންމެ ސިފައެއްގައި ނަމަވެސް އަމިއްލަ މަސްލަހަތަށް ވުރެ ގައުމީ ޚިދުމަތަށް އިސްކަންދޭން ޖެހޭ،" ޑރ. މަޖީދު ވިދާޅުވި އެވެ.
އޭނާ ވިދާޅުވީ އެ މަގާމު އަދާކުރެއްވުމަށް ދެ ވަނަ ފުރުސަތެއް ލިބިވަޑައިގަތުމުން ރާއްޖޭގެ ދީނީ އިލްމުވެރިންނާއި ތަޖުރިބާކާރުންނާއި ވިޔަފާރިވެރިންގެ އިތުރުން އާއްމުންނާ ވެސް މަޝްވަރާކުރެއްވި ކަމަށެވެ. އެ މަޝްވަރާތަކުގައި ގައުމީ ޚިދުމަތަށް އެނބުރި ވަޑައިގަތުމަށް 98 ޕަސެންޓް މީހުން އެދިފައިވާ ކަމަށް ޑރ. މަޖީދު ވިދާޅުވި އެވެ. އަދި އޭނާ ވިދާޅުވި ގޮތުގައި މަގާމް ގަބޫކުރެއްވީ ދީނުގައި ވެސް ކަންތައްތައް ކުރުމަށް އޮންނަ އުސޫލް ބެއްލެވުމަށް ފަހު އެންމެ ރަނގަޅު ގޮތަށެވެ.
"ދީނުގައި ތިމާ އަށް ކަމެއް އިހްތިޔާރުކުރުމަށް ދަތިވެއްޖެ ހާލަތެއްގައި އެކަންތައްތައް ކުރުމަށް އަންގަވާފައި އޮންނަ ޕްރޮސެސް ވެސް ފުރިހަމަކޮށްފައި އަޅުގަނޑު މިއައީ. ކޮންމެ ސިފައެއްގައި ނަމަވެސް މިއީ ރަނގަޅު ނިންމުމެއް ކަމަށް އަޅުގަނޑު ދެކެނީ،" ޑރ. މަޖީދު ވިދާޅުވި އެވެ.
މިނިސްޓަރުކަމާ ހަވާލުވެވަޑައިގެންނެވުމުގެ ކުރިން ރައީސް މުހައްމަދު ނަޝީދާ ވެސް މަޝްވަރާކުރެއްވި ކަމަށާއި އެ ބައްދަލުވުމުގައި އަދާލަތު ޕާޓީން ވަކިވެވަޑައިނުގަންނަވާނެކަން ރައީސަށް ދަންނަވާފައިވާނެ ކަމަށް ވެސް ޑރ. މަޖީދު ވިދާޅުވި އެވެ. އެ ނިންމެވުމަށް ރައީސް ނަޝީދު މަރުހަބާ ވިދާޅުވިކަން ޑރ. މަޖީދު ފާހަގަކުރެއްވި އެވެ.
އޭނާ ވިދާޅުވި ގޮތުގައި އަދާލަތު ޕާޓީން ސަރުކާރާ އެކު ވެފައިވާ އެއްބަސްވުން އުވާލިޔަސް އަމިއްލަ ފަރުދެއްގެ ހައިސިއްޔަތުން ގައުމީ ވާޖިބު އަދާކުރުމަށް އެ ޕާޓީން ދެކޮޅު ހަދަން ޖެހޭނެ ކަމަށް ދެކެވަޑައެއް ނުގަންނަވަ އެވެ.
"ހަގީގަތުގައި ޕާޓީން ވެސް އިތުބާރު ހިފޭ މީހަކު މިނިސްޓްރީގައި ހުރުމަކީ ޕާޓީން ހިތްހަމަޖެހޭނެ ކަމެއް ކަމަށް އަޅުގަނޑު ގަބޫލުކުރަނީ،" ޑރ. މަޖީދު ވިދާޅުވި އެވެ.
އޭނާ ވިދާޅުވި ގޮތުގައި ގައުމީ ވާޖިބުގައި ދެމިހުންނެވުމަށް ޕާޓީގެ އިސް ބޭފުޅުން ވެސް ބުރަވާ ކަމަށާއި އެހެންކަމުން ޕާޓީގެ މަދު ބައެއްގެ ވިސްނުމަކީ މުޅި ޕާޓީގެ ވިސްނުމެއް ނޫނެވެ.
"އަޅުގަނޑު ނެތް އަދާލަތު ޕާޓީ ދޫކޮށްފައި ދިއުމުގެ ވިސްނުމެއް،" ޑރ. މަޖީދު ވިދާޅުވި އެވެ.
އޭނާ ވިދާޅުވި ގޮތުގައި ސަރުކާރުގެ މައްސަލަތައް ފާހަގަކޮށް އަދާލަތުން އެކުލަވާލާފައިވާ ގަރާރުގައި ސުވާލު އުފެދޭ ކަންތައްތަކެއް އެބަ ހުއްޓެވެ. އެގޮތުން އެ ގަރާރު އެކުލަވާލުމަށް މަޝްވަރާ މަޖިލީހުގެ ބައްދަލުވުމެއް ބޭއްވުމުގެ ކުރިން ވެސް އެ ނިންމުން ނިންމާފައިވާ ކަމުގެ މައުލޫމާތު ލިބިވަޑައިގެންފައިވާ ކަމަށް ވިދާޅުވި އެވެ.
"ފުޅާ ދާއިރާއެއްގައި ބަހުސްކޮށްގެން ކުރި ކަމަކަށް އެކަން [އެއްބަސްވުން އުވާލުމުގެ ގަރާރު ނެރުން] ނުވޭ. ގަވާއިދު ބުނާ ގޮތުން މަޝްވަރާ މަޖިލީހުގެ ބައްދަލުވުމަށް މެމްބަރުންނަށް އެޖެންޑާކޮށްފައިވާ ކަންތައްތަކެއް ފޮނުވާފައެއް ވެސް ނުވޭ،" ޑރ. މަޖީދު ވިދާޅުވި އެވެ.
އަދާލަތު ޕާޓީގެ ނިންމުމަށް އިހްތިރާމްނުކުރެއްވި ކަމަށް އެ ޕާޓީން ބުނިބުނުމަށް ޑރ. މަޖީދު ރައްދުދެއްވީ ސަރުކާރުން ވަކިވެވަޑައިގެން ތިއްބެވި ބައެއް މެމްބަރުން ބޭނުންވާ ގޮތަށް އަދާލަތު ޕާޓީ އަނބުރާލުމުގެ ވިސްނުމަކީ ޑިމޮކްރެޓިކް ގޮތެއް ނޫން ކަމަށް ވިދާޅުވެ އެއީ ޚުދުމުހްތާރު އުސޫލެއް ކަމަށް ސިފަކުރައްވަމުންނެވެ.
ޑރ. މަޖީދު ވިދާޅުވީ އެ ޕާޓީގެ މަޝްވަރާ މަޖިލީހުގައި ސަރުކާރުގެ ކޯލިޝަން އުވާލުމުގެ ވާހަކަތައް ކުރިއަށް ގެންދިއުމުން، އެއީ މިވަގުތަށް އެންމެ ރަނގަޅު ގޮތް ކަމަށް ފެނިވަޑައިނުގަންވާ ކަމަށް އެންގެވި ކަމަށެވެ.
"އެއީ އަޅުގަނޑުމެން ވަކިވެގެން ދިޔައަސް ހާސިލްކުރެވޭނެ ވަކި އިތުރުކަމެއް ނެތޭ ދަންނަވާފައިވާނެ. ކޯލިޝަންގައި ތިބީމަ ކުރެވޭނެ ކިތައްމެ ކަންތައްތަކެއް އެބަ ހުއްޓޭ،" ޑރ. މަޖީދު ވިދާޅުވި އެވެ.
0 comments:
Post a Comment