1:40 PM
އޭ އެކުވެރިންނޭވެ. މާތްﷲ އަހަރުމެންނަށް ދެއްވަނީ ގާތްގަނޑަކަށް 60 އަހަރުކަމަށް ވަނީނަމަ، އެވާނީ 22000 ދުވަހަށެވެ. މިހުރިހާ ދުވަހެއް ދެއްވަނީ އެއްދުވަހެއްގެ ސުވާލުކުރެއްވުމަކަށެވެ.
އެދުވަހު އަހަރެމެންނާއި އެކަލާނގެ ސުވާލުކުރެއްވުމުން އެދެވޭ ޖަވާބެއް ހުށަހަޅަން ޖެހޭނެއެވެ. އެކަލާނގެ ރަޙުމަތްފުޅުން އަހަރުމެންނަށް ކުރެވޭނެ ސުވާލުތައް ޤުރުއާނާއި ސުންނަތުން ވަނީ އަންގަވައިފައެވެ. ދެން ވިސްނާށެވެ. އަހަރުމެން ދުނިޔެ މަތީގައި ޓެސްޓެއް، ހަދަންޖެހިފައިވާ ޙާލަތެއް ޚިޔާލަށް ގެންނަވާށެވެ. އަހަރުމެން ސުވާލު ކަރުދާސް ބަލާއިރު އެއްފުށުގައި އެވަނީ ސުވާލުތަކެވެ. އަދި ސުވާލުކަރުދާހުގެ އަނެއްފަރާތުގައިވަނީ ޖަވާބުތަކެވެ. މިފަދަ ޓެސްޓަކުން ފާސްނުވެއްޖެނަމަ، އަހަރުމެން ވާނީ މޮޔަ ބަޔަކަށްށެވެ. އަހަރުމެންނަށް ސުވާލާއި ޖަވާބު ލިޔެވިފައި އޮތްއިރު ދެރަ މާރކުހެއް ލިބިއްޖެނަމަ، ދެރައިގެ ކޮޅެއްކޮބައިތޯއެވެ؟
އޭ ޒުވާނާއެވެ. ޒުވާން ދުވަސްވަރަކީ ދިރިއުޅުމުގެ އެންމެ ބާރުހުރި ދުވަސްވަރެވެ. މިދުސްވަރަކީ ބޮޑެތި ކަންތައްތަކާއި މެދު ގޮތެއް ނިންމަންޖެހޭ ދުވަސްވަރެވެ. މިޘާލަކަށް ދިރިއުޅުމަށް ޓަކައި ކުރާނީ ކޮން މަސައްކަތެއްކަން ނިންމަންވީ މިދުވަސްވަރުއެވެ. މިދުވަސްވަރުކުރާ ހުރިހާ ކަންތައްތަކުން ޙަޔާތުގައި ބާކީވާ ދުވަހަށް އަސަރުކުރާނެއެވެ. އެހެންވެ، ތިބާގެ ދިރިއުޅުމަށް އިސްލާމްކަމުގެ ރޫޙު ވައްދަންވީ ދުވަސްވަރަކީ މިއެވެ. ބައެއްމީހުން ހީކޮށްގެން އުޅެނީ އިސްލާމީ އުސޫލުތަކަށް އުޅެން ފަށާނީ ޢުމުރުން ދުވަސް ވެލުމުން ކަމަށެވެ. އަހުރެންނާއި ތިބާގެ ޤަޞްދަކީވެސް މިއީ ކަމުގައި ވެދާނެއެވެ. އެކަމަކު މިކަމާ ދޭތެރޭ މިގޮތަށް ވިސްނާލާށެވެ. ތިބާ ރަނގަޅު ފުޓްބޯޅަ ކުޅުންތެރިއަކަށްވާން ބޭނުންނަމަ، ކުޅެން ފަށާނީ މިއަދުއެވެ. ދެން ޕްރެކްޓިސް ލިބުނުވަރަކަށް އަދި ޢުމުރުން ދުވަސްވި ވަރަކަށް ވަރަކަށް ތިބާގެ ކުޅުމުގެ ފެންވަރު ދާނީ ރަނގަޅު ވަމުންނެވެ. އެކަމަކު ތިބާގެ ޢުމުރުން ދުވަސްވުމުން، ފުޓުބޯޅަ ކުޅުމުގެ ޚިޔާކުކުރާނަމަ، މޮޅު ކުޅުންތެރިއަކަށްވުމުގެ ޗާންސު ސުމެކެވެ. މިއީ ޙަޤީޤަތެކެވެ. އަހަރުމެން މުސްކުޅިވުމުން، ތެދުވެ ނަމާދުކުރާން ހުންނާނެހާ ބާރެއްވެސް ހަށިގަނޑަކު ނުހުންނާނެއެވެ.
ޒުވާންކަމަކީ ޙަޔާތުގެ އެންމެ ބާރުވެރި ދުވަސްވަރަށްވާތީ، އެކަލާނގެ ޙަޟްރަތުގައި އެދުވަސްވަރުވަނީ އެންމެ މުހިއްމު ދުވަސްވަރަށެވެ. ޒުވާން ޢުމުރުގައި އަޅުކަންކޮށްއުޅޭ މީހުންނަށް އެކަލާނގެ ޤިޔާމަތް ދުވަހުގައި ހިޔަލެއް ދެއްވާނެއެވެ. އެދުވަހު، އެކަލާނގެ ކިބަފުޅަށް ނޫނީ އެއްވެސް ހިޔަލެއް ނުލިބޭނެއެވެ. އޭ ޒުވާނާއެވެ. އަވިގަދަ ދުވަހަކު ދެތިން ގަޑިއިރު އަވީގައި ހުންނަން ޖެހުން ޚިޔާލަށް ގެންނަވާށެވެ. ހިޔަލަކަށް އެދޭނޭ ދަހިވެތިކަން ފިކުރުކުރާށެވެ. އެދުވަހު އިރު ގާތްވެގެންވެއެވެ. އަވީގެ ތޫނުކަން ބޮޑުވެގެންވެއެވެ. ހިޔަލެއް ބޭނުމެއްނޫން ހެއްޔެވެ؟
ތިބާއަށައި އަހުރެންނަށް އެކަލާނގެ އެންގެވި ގޮތައް އުޅުމުގައިވަނީ ފަރުވާ ކުޑަކުރެވިފައިއެވެ. އެކަން އެކަލާނގެ ދެނެވޮޑިގެންވެއެވެ. އެކަލާނގެ އަންގަވައިފައިވަނީ ހެޔޮގޮތަށް އުޅުމަށް މަސައްކަތް ކުރުމަށެވެ. ވިސްނާށެވެ. ކުޑަކުއްޖަކު ހިގަން ދަސްކުރާއިރު އޭނަ ވެއްޓެއެވެ. ނަމަވެސް ތެދުވެ، އަނެއްކާ ހިނގަން ފަށައެވެ. ވެއްޓުމުން ނުތެދުވެ ނީންދެއެވެ. ދެން ފަހުން އޭނާ ނުވެއްޓި ހިނގައެވެ. ހަމަ މިގޮތައް، ރަނގަޅަށް އުޅުމުގައި އަހަރެމެން ނާއުއްމީދުވެ ޢަޒުމް ނަގައިލައިގެން ނުވާނެއެވެ. އިރާދަ ކުރެއްވިއްޔާ އެއްދުވަހަކުން އެކަލާނގެ އެންގެވި ހުރިހާ ގޮތަކަށް އުޅުމަށް އަހަރުމެންނަށް ކާމިޔާބު ހޯދޭނެއެވެ. އެ ޒުވާނާއެވެ. މިއަދު ޢަޒުމެއް ކަނޑައަޅަމާ ހިނގާށެވެ. މިދުނިޔެއަށް އަހަރުމެން ފޮނުއްވެވި ކަންތައްތައް ކުރުމަށް ފަށަމާ ހިނގާށެވެ. އެހެންނޫނީ އަހަރުމެން ވާނީ ޖަވާބާއިއެކު އޮތް ސުވާލު ކަރުދާސް ލިބި ޓެސްޓުން ފޭލުވި ހިތާމަކުރާ މޮޔަ ބައެކެވެ.
0 comments:
Post a Comment