إبْنُ جَحْش އާއި سَعْد އެއްބޭކަލަކު އަނެއް ބޭކަލަށް ދުޢާކުރުން

   އުޙުދު ހަނގުރާމާގެ ކުރީކޮޅުގައި، ޢަބްދުﷲ އިބްނު ޖަޙްޝު، ސަޢުދު އިބްނު ވައްޤާޞްއަށް ވިދާޅުވިއެވެ.

   "އޭ ސަޢުދެވެ! އަހަރުމެން ދެމީހުން ދުޢާކުރަން އަންނާށެވެ.
ކޮންމެ މީހަކުވެސް އެމީހަކު ބޭނުންވާ ކަމަކަށް، މާތްﷲގެ ޙަޟްރަތަށް ދުޢާކުރުމުން، އަނެކާ އާމީން ވިދާޅުވާންވާނެއެވެ. މިހެން ދުޢާކުރުމުން، މާތްﷲ އެދުޢާ އިޖާބަކުރުން ގާތްވެގެންވެއެވެ."

   ސަޢުދުގެފާނު އެކަމާ އެއްބަސްވެވަޑައިގެން، އެދެބޭފުޅުން ކަނަކަށް، ދުޢާކުރައްވަން ވަޑައިގަތެވެ. އެންމެ ފުރަތަމަ ދުޢާކުރެއްވީ ސަޢުދުގެފާނެވެ.

 

 "يَا الله! މާދަމާ ހަނގުރާމަ ވަރުގަދަވުމުން، ތިމަންކަލޭގެފާނު، އެހާއްމެ ވަރުގަދަ، ހުނަރުވެރި ދުޝްމަނަކާއި ބައްދަލުކުރައްވާފާނދޭވެ. އޭނާގެ ގައިގައި ހުރި ބާރުން ތިމަންކަލޭގެފާނާއި ހަމަލަދެއްވުމަށް ދޫކޮށްލަ ދެއްވަފާނދޭވެ. އަދި ތިމަން ކަލޭގެފާނު، ރައްދުގައި ހަމަލާދިނުމަށް ދޫކޮށްލަދެއްވާނދޭވެ. يَا الله! ދެން ތިޔަﷲ އަށްޓަކައި، ތިމަންކަލޭގެފާނު، އޭނާގެ މައްޗަށް ގަދަކަން ދެއްވާ އޭނާ ޤަތުލުކޮށްލުމަސް ދޫކޮށްލަދެއްވާނދޭވެ. އަދި އޭނާގެ މިލްކުގައިވާ ތަކެތި، ތިމަންކަލޭގެފާނު، ޣަނީމާގެ ގޮތުގައި ނަގަން ހުއްދަދެއްވާނދޭވެ."

 

            ޢަބްދުﷲ އިބްނު ޖަޙްޝު، އާމީން ވިދާޅުވިއެވެ. ދެން އެކަލޭގެފާނު ދުޢާކުރައްވަން ފެއްޓެވިއެވެ.

     "يَا الله! މާދަމާ، ދުޝްމަނުން ތެރޭ އެންމެ ވަރުގަދަ މީހުން ތެރެއިން މީހަކާއި ތިމަންކަލޭގެފާނާއި ބައްދަލުކޮށްދެއްވާނދޭވެ. އޭނާ ރުޅިއައިސް ފުފިހުރެ ތިމަންކަލޭގެފާނާއި ހަމަލާދެއްވުމަށް ދޫކޮށްލަ ދެއްވާނދޭވެ. އަދި ތިމަންކަލޭގެފާނުގެ ގައިގައިހުރި ބާރާއި އެކު އޭނާއާއި ހަމަލާ ދެއްވުމަށް ދޫކޮށްލަ ދެއްވާނދޭވެ. ދެން އޭނާއަށް، ތިމަންކަލޭގެފާނުގެ މައްޗަށް ގަދަކަން ދެއްވާ، އޭނާގެ އަތުން ތިމަންކަލޭގެފާނުގެ ޤަތުލުވުން މިންވަރުކުރައްވާނދޭވެ. އޭނާ، ތިމަންކަލޭގެފާނުގެ ނޭފަތާއި ކަންފަތް، ތިމަންކަލޭގެފާނުގެ ހަށިގަނޑުން ވަކިކުރާނެއެވެ.

            އަދި ޤިޔާމާތް ދުވަހު، ތިޔަﷲގެ ކުރިފުޅު މައްޗަށް ހުއްޓޭއިރު، ތިޔަﷲ، ތިމަންކަލޭގެފާނާއި ވަޙީކުރައްވާނެއެވެ. "އޭ ޢަބްދުﷲއެވެ! ކަލޭގެފާނުގެ ނޭފަތާއި ކަންފަތް ގެއްލުނީ ކިހިނަކުން ހެއްޔެވެ؟" ދެން ތިމަންކަލޭގެފާނު ޖަވާބުގައި މިހެން ވިދާޅުވާނަމެވެ. "މިގުނަވަންތައް ގެއްލުނީ ތިޔަﷲއާއި ތިޔަﷲގެ ނަބިއްޔާގެ މަގުގައިވަނިކޮށެވެ." ދެން ތިޔަﷲ ވަޙިކުރައްވާނެއެވެ. "އާނއެކެވެ! ހަމަގައިމުވެސް ތިގުނަވަންތައް ގެއްލުނީ ތިމަންﷲގެ މަގުގައެވެ.""

      ސަޢުދުގެފާނު އާމީން ވިދާޅުވިއެވެ
.

   ހަނގުރާމައިގެ މައިދާނުގައި، ދެޞަހާބީންގެ ދުޢާއާއި އެއްގޮތަށް ކަންތައްވެގެން ދިޔައެވެ. ސަޢުދުގެފާނު ވިދާޅުވިއެވެ.

   "ތިމަންކަލޭގެފާނުގެ ދުޢާއަށްވުރެ، ޢަބްދުﷲގެފާނުގެ ދުޢާ މާރަނގަޅެވެ. ހަވީރުގައި، ތިމަންކަލޭގެފާނު، އެކަލޭގެފާނުގެ ނޭފަތާއި ކަންފަތް ރޮއްޖެއްގައި އެލުވައިފައިވަނިކޮށް ދެކެވަޑައިގަތީމެވެ."

މަޞްދަރު: މުޙައްމަދު ޒަކަރިއްޔާގެ ފަޟާއިލުލް އަޢްމަލޭ