ޚިޔާލު ތަފާތުވުންތައް ވެސް، އެންމެ ބޮޑަށް އޮތީ ދީނީ އިލްމުވެރިންގެ މެދުގައި ނޫން ކަމަށާއި އެ ޚިޔާލު ތަފާތުންތައް ބޮޑުވެފައިވަނީ އާންމު ރައްޔިތުންގެ މެދުގައި ކަމަށް، އިސްލާމިކް އެފެއާޒް މިނިސްޓަރު ޑރ. އަބްދުލްމަޖީދު އަބްދުލްބާރީ ރޭ ވިދާޅުވެއްޖެ އެވެ.

ރާއްޖޭގައި އާންމު ރައްޔިތުންގެ މެދުގައި ދީނީ ގޮތުން މި ފަހަކަށް އައިސް އެންމެ ބޮޑަށް ޚިޔާލު ތަފާތުވެ ދެބަސްވުން އުފެދިފައިވާ މައިގަނޑު ޚިލާފުތަކާ މެދު އިލްމުވެރިންގެ މެދުގައި އެއްބަސްވެ، އިލްމުވެރިންގެ މަހާސިންތާ ނިންމާލައިފި އެވެ.

އިސްލާމް ދީނުގެ ބައެއް ފަރުއީ މައްސަލަތަކާ މެދު އުފެދިފައިވާ ޚިޔާލު ތަފާތުވުންތައް ވެސް، އެންމެ ބޮޑަށް އޮތީ ދީނީ އިލްމުވެރިންގެ މެދުގައި ނޫން ކަމަށާއި އެ ޚިޔާލު ތަފާތުންތައް ބޮޑުވެފައިވަނީ އާންމު ރައްޔިތުންގެ މެދުގައި ކަމަށް، އިސްލާމިކް އެފެއާޒް މިނިސްޓަރު ޑރ. އަބްދުލްމަޖީދު އަބްދުލްބާރީ ރޭ ވިދާޅުވެއްޖެ އެވެ.

އިސްލާމީ މަރުކަޒުގައި ދެ ދުވަހަށް ކުރިއަށް ދިޔަ އިލްމުވެރިންގެ މަހާސިންތާ ރޭގައި ނިންމައިލުމަށް ފަހު، ނޫސްވެރިންނާ ބައްދަލުކުރައްވައި "ހަވީރު"ން ދެންނެވި ސުވާލެއްގެ ޖަވާބުގައި މިނިސްޓަރު ޑރ. މަޖީދު ވިދާޅުވި ގޮތުގައި އާންމުންގެ މެދުގައި ދީނީ ޚިލާފުތައް ބޮޑުވެފައިވަނީ ދީނީ ހުކުމްތައް ރަނގަޅަށް އޮޅުންނުފިލާ ބައެއް މީހުން، އިލްމުވެރިން ދެއްވާ ފަތުވާތައް އެއަށް ވުރެ ވެސް ހަރުކަށިކޮށް ގަބޫލުކުރަމުންދާތީ އެވެ. އަދި އާންމުންގެ ތެރެއިން އެ ތަފާތުންތައް ފެންނަހާ ބޮޑުކޮށް ދީނީ އިލްމުވެރިންގެ މެދުގައި އެ ޚިޔާލު ތަފާތުވުންތައް ނެތް ކަމަށް ވެސް ޑރ. މަޖީދު ވިދާޅުވި އެވެ.

މިނިސްޓަރު ވިދާޅުވީ ކުރިން އާންމުންގެ މެދުގައި ހުރި ދީނީ ގިނަ ޚިޔާލު ތަފާތުވުންތައް މިހާރު މަޑުމަޑުން ނެތެމުން އަންނަ ކަމަށާއި އެއީ ދީނީ ހޭލުންތެރިކަން އިތުރުކުރުމަށް ވެއަތުވެ ދިޔަ ދެތިން އަހަރު ސަރުކާރުން ކުރި މަސައްކަތުގެ ނަތީޖާ ކަމަށެވެ.

"ޚިޔާލު ތަފާތުވުންތަކެއް ހުރި ކަމުގައި ވިޔަސް މި ކަންތަކުގައި ހަރުކަށި ގޮތެއްގައި ހިފަނީ ދީނީ އިލްމުވެރިންނަށް ވުރެ ބޮޑަށް އެ ބޭފުޅުން ކުރެން ފަތުވާތަކާ އެއްޗެހި އައްސަވައިގެން އެއަށް އަމަލުކުރައްވާ އާންމު ރައްޔިތުން. އާންމު ރައްޔިތުންނަށް ގިނަ ފަހަރަށް އެ ބޭފުޅުން އެ ވިދާޅުވާ އެއްޗެއްގެ މަފްހޫމް ނުވަތަ ދޭހަވާ ތަންކޮޅެއް އެ ބޭފުޅުން ވިދާޅުވާ ވަރަށް ވުރެ ހަރުކަށިކޮށް ވެސް ވިސްނިފައި އޮވެދާނެ،" ޑރ. މަޖީދު ވިދާޅުވި އެވެ.

އެ ކަމުގެ މިސާލެއްގެ ގޮތުން ޑރ. މަޖީދު ވިދާޅުވީ ރާއްޖޭގައި 35: 12 ގައި ހުކުރުކުރާ ގޮތަށް އޮތުމަކީ ސުންނަތާ ތަންކޮޅެއް ދުރު ގޮތެއް ކަމަށް ބައެއް އިލްމުވެރިން ވިދާޅުވި ނަމަވެސް، އެއީ ސުންނަތާ ޚިލާފު ގޮތެއް ކަމަށް އެ އިލްމުވެރިން ވެސް ވިދާޅުނުވާ ކަމަށެވެ. އެހެން ނަމަވެސް އެ ވާހަކަ އަޑުއަހާ މީހާ އެއަށް ވުރެ ހަރުކަށި ގޮތަކަށް އެކަން ގަބޫލުކޮށްގެން ގޮސް ވަކިން ޖަމާއަތް ހަދައިގެން ހުކުރުކުރާ ހިސާބަށް ކަންތައް ގޮސްފައިވާ ކަމަށް ޑރ. މަޖީދު ވިދާޅުވި އެވެ.

"އެހެންވީމާ ގިނަ ފަހަރަށް އިލްމުވެރިންގެ މެދުގައެއް ނޫން އެހާ ބޮޑަށް ޚިޔާލު ތަފާތުވެގެން އުޅެނީ،" ޑރ. މަޖީދު ވިދާޅުވި އެވެ.

"މީގެ އިތުރުން ވެސް އެކި ކަހަލަ އިޚްތިލާފީ މައްސަލަތަކުގައި ވެސް އަޅުގަނޑުމެންނަށް މި ތާނގައި ވާހަކަދެއްކި ދެއްކުމުން އެނގުނީ ދީނީ އިލްމުވެރިންގެ ތެރޭގައި މާ ބޮޑު ޚިޔާލު ތަފާތުވުންތަކެއް ނެތް ކަން. މުޖްތަމައުގައި އެ ކަންތައްތަކާ މެދު ކޮންމެވެސް ވަރަކަށް ހަރުކަށި ވިސްނުންތަކެއް ހުރި ކަމުގައި ވިޔަސް ރާއްޖޭގައި ތިއްބެވި ދީނީ އިލްމުވެރިންގެ މެދުގައި މާ ބޮޑު ޚިޔާލު ތަފާތުވުންތަކެއް އޭގައި ނެތް ކަން ފާހަގަކުރެވުނު،" މަހާސިންތާގެ ކާމިޔާބީ ފާހަގަކުރައްވަމުން ޑރ. މަޖީދު ވިދާޅުވި އެވެ.

މިނިސްޓަރު ވިދާޅުވީ ރާއްޖޭގެ ދީނީ އިލްމުވެރިންނަށް އަމާޒުކޮށްގެން ބޭއްވި މި މަހާސިންތާ ކުރިއަށް ދިޔައީ ވަރަށް ތަނަވަސް ޚިޔާލުތަކެއްގެ ތެރޭގައި ކަމަށެވެ. އަދި މަހާސިންތާގެ އެންމެ ބޮޑު ކާމިޔާބީ އަކީ ރާއްޖޭގެ ގިނަ އިލްމުވެރިންތަކެއް އެއް ތަނަކަށް އެއްވެ ހިތްހެޔޮކަމާ އެކު ޚިޔާލު ފާޅުކޮށް މަޝްވަރާކުރެއްވުން ކަމަށް ވެސް މިނިސްޓަރު ވިދާޅުވި އެވެ.

"ދިވެހި ރާއްޖޭގައި ތިއްބެވި ދީނީ އިލްމުވެރިންގެ ތެރެއިން ކޮންމެވެސް ސަބަބަކާ ހުރެ އެކި ބޭފުޅުންގެ މެދުގައި ހިތް ނުތަނަވަސްކަން އުފެދިފައިވީ ނަމަވެސް އެ ހުރިހާ ބޭފުޅުން ވެސް އެއް ތަނަކަށް އެއްވެ އެކި ބޭފުޅުން ބައްދަލުކޮށް ވާހަކަދައްކައި ހިނިތުން މޫނަކާ އެކީގައި އުފާވެރި ޖައްވެއްގައި ދެ ދުވަހުގެ މުއްދަތަށް މި ހޭދަކޮށްލި ހޭދަކޮށްލުމަކީ ކުރިއަށް އޮތް ތާނގައި އަޅުގަނޑުމެންނަށް އަޅުގަނޑުމެންގެ ޚިޔާލު އެއްގޮތް ކުރުމަށް ނުވަތަ ކައިރިކުރުމަށް މަގު ހުޅުވިގެންދާނެ ކަމެއް،" ޖުމްލަ 64 އިލްމުވެރިން ބައިވެރިވި މަހާސިންތާއާ ބެހޭ ގޮތުން ޑރ. މަޖީދު ވިދާޅުވި އެވެ.

ޑރ. މަޖީދު ވިދާޅުވީ މި މަހާސިންތާގެ ކާމިޔާބަށް ބަލާއިރު، މިފަދަ ގިނަ ބައްދަލުވުންތަކެއް އިލްމުވެރިންގެ މެދުގައި ބޭއްވުމަށް އިލްމުވެރިން ވެސް ހުށަހަޅުއްވާފައިވާތީ އެފަދަ އިތުރު މަހާސިންތާތައް ބާއްވަން މިނިސްޓްރީން ގަސްދުކުރާ ކަމަށެވެ.

ހޮނިހިރު ދުވަހު ހެނދުނު ފަށައިގެން ފަސް ދަންފަޅިއެއްގައި ޚިޔާލު ބަދަލުކޮށް މަޝްވަރާކުރެއްވުމަށް ފަހު، ރޭ ނިންމައިލި މަހާސިންތާގައި އެއްބަސްވި މުހިންމު ކަންތައްތަކުގެ ތެރޭގައި ރާއްޖޭގައި ހުކުރު ކުރަން ފަށާ ގަޑީގެ މައްސަލަ އާއި ފަތިސް ނަމާދުގައި ގުނޫތު ކިޔުމާއި ތަރާވީހް ނަމާދުގައި 20 ރަކުއަތްކުރުމުގެ މައްސަލަ ހިމެނެ އެވެ. އޭގެ އިތުރުން ޣައިބަށް ކަށުނަމާދުކުރުމުގެ މައްސަލަ އާއި ސަފުގެ ތެރެއަށް ތަނބު ވަންނަ ގޮތަށް ސަފުހެދުމުގެ މައްސަލަ އާއި ބިސްމީގެ މައްސަލައިގައި ވެސް އިލްމުވެރިން މި މަހާސިންތާގައި ވަނީ ގޮތެއް ނިންމަވައިފަ އެވެ.

އެ ގޮތުން ފަތިސް ނަމާދުގެ ފަހު ރަކުއަތުގައި ގުނޫތު ކިޔުމަކީ ބިދުޢައެއް ނޫން ކަމަށާއި ކިޔުމާއި ނުކިޔުން ވެސް ހުއްދަ ކަމަށާއި އިލްމުވެރިންވެ މެދުގައި ޚިލާފު އުފެދެނީ އޭގެ ތެރެއިން އެންމެ އައުލާކަން ބޮޑު ގޮތަކާ މެދުގައި ކަމަށް މަހާސިންތާގައި އިލްމުވެރިން އެއްބަސްވެފައިވެ އެވެ. ގުނޫތު ކިޔުމަކީ ބިދުއައެއް ކަމަށް ވިދާޅުވަނީ ކޮން ބޭފުޅެއްތޯ ރިއާސަތުން އެހުމުން އެ ކަމަށް އަތް ނެގީ އެންމެ ދެ ބޭފުޅުންނެވެ. އެއީ ޝައިޚް އިބްރާހީމް ފަރީދު އަހްމަދާއި ޝައިޚް އިލްޔާސް ޖަމާލެވެ. ބާކީ ތިއްބެވި 62 އިލްމުވެރިން އެއްބަސްވީ އެއީ ބިދުއައެއް ނޫން ކަމަށެވެ.

ތަރާވީޙް ނަމާދުގެ ރަކުއަތްތަކުގެ އަދަދާ މެދު އިލްމުވެރިން އެއްބަސްވެލެއްވީ 20 ރަކުޢަތް ވެސް ނުވަތަ އެއަށް ވުރެ ގިނައިން ނުވަތަ މަދުން ވެސް ކުރެވިދާނެ ކަމަށެވެ. މި ގޮތަށް އިލްމުވެރިން މި އެއްބަސްވެލެއްވީ، ތަރާވީހްގައި އަށް ރަކުއަތަށް ވުރެ ގިނައިން ކުރުމަކީ ބިދުއައެއް ކަމަށް ގިނަ ބަޔަކު ގަބޫލުކޮށް އަށް ރަކުއަތް ހަމަވުމުން ގިނަ ބަޔަކު މިސްކިތުން ފައިބައިގެން ދިއުން އާންމުވެފައިވާ ދުވަސްވަރެއްގަ އެވެ.

މި ގޮތަށް ނިންމުނީ ވެސް އިލްމުވެރިންގެ މެދުގައި ހޫނު ބަހުސްތަކެއް ކުރުމަށް ފަހުގަ އެވެ. ޝައިޚް ހުސައިން ރަޝީދު އަހްމަދު ވިދާޅުވީ ތަރާވީހް ނަމާދުގެ ރަކުއަތްތަކުގެ އަދަދު ކަނޑައެޅުމަކީ ގުރްއާނުގެ ނައްސާ ޚިލާފު ކަމެއް ކަމަށެވެ. އޭނާ ވިދާޅުވީ އެ މީހަކު ބޭނުން އަދަދަކަށް ތަރާވީހް ނަމާދު ކުރެވިދާނެ ކަން ގުރްއާނުން ސާބިތުވާ ކަމަށެވެ. ހުސައިން ވިދާޅުވީ ހަތަރު ހަލީފާއިންގެ ތެރެއިން 20 ރަކުއަތް ކަމަށް ތިން އިމާމުން އަދި 36 ރަކުއަތް ކަމަށް އެންމެ އިމާމަކު ވިދާޅުވެފައިވާ އިރު، ތަރާވީހްގައި 20 ރަކުއަތް ކުރުމަކީ ބިދުއައެއް ނޫން ކަމަށް ނިންމައިފި ނަމަ އެއަށް ވުރެ ގިނަ އިން ނުކުރެވޭނެ ކަމުގެ މާނަ ދޭހަވާ ކަމަށެވެ. އަދި އަށް ރަކުއަތަށް ވުރެ ގިނައިން ކުރެވިދާނެ ކަމަށް އޮވެއްޖެ ނަމަ، އަށް ރަކުއަތަށް ވުރެ މަދުން ނުކުރެވޭނެ ކަމަށް ދޭހަކުރެވިދާނެ ކަމަށެވެ.

ޝައިޚް އިލްޔާސް ޖަމާލު ވިދާޅުވީ އެއީ ވަކި އަދަދެއް ކަނޑައެޅިފައިވާ ނަމާދެއް ނޫން ކަމަށް އޮތުމަށެވެ. ނަމަވެސް ޝައިޚް އިލްޔާސް ހުސައިން ވިދާޅުވީ އެހެން ހަދައިފި ނަމަ ވެސް މައްސަލައަކަށްވާނެ ކަމަށެވެ. އެންމެ ފަހުން އިލްމުވެރިންނަށް އެއްބަސްވެވުނީ ތަރާވީހް ނަމާދުގައި 20 ރަކުއަތް ނުވަތަ އެއަށް ވުރެ މަދުން ނުވަތަ ގިނައިން ވެސް ކުރެވިދާނެ ކަމަށެވެ.

ފިތުރު ޒަކާތް ނެރުމުގެ މައްސަލައިގައި އިލްމުވެރިން އެއްބަސްވީ ފައިސާ އިން ނުވަތަ ގޮވާމުން ވެސް ފިތުރު ޒަކާތް ނެރެވިދާނެ ކަމަށެވެ. ފިތުރު ޒަކާތް ނެރެވޭނީ ގޮވާމުން އެކަނި ކަމަށް ވިދާޅުވީ ޝައިޚް އިލްޔާސް ޖަމާލް އެކަންޏެވެ.

މީގެ އިތުރުން ރޭ ނިމުނު މަހާސިންތާގައި ފާސްކުރި އެންމެ މުހިންމު އަނެއް ކަމަކީ ރާއްޖޭގައި ޒަމާނުއްސުރެ ހުކުރުކުރަން ފަށާ ގަޑި ކަމަށްވާ 35: 12 ގައި ހުކުރުކުރަން ފެށުމަކީ ދީނީ ގޮތުން މައްސަލައެއް ނޫން ކަމަށެވެ. މި ގޮތަށް އިލްމުވެރިން އިއްތިފާގުވެފައިވާ އިރު، މިހާރު ވެސް މާލޭގައި އަމިއްލަ ބަޔަކު ވަކިން ޖަމާއަތް ހަދައިގެން، މެންދުރު ނަމާދަށް ގޮވުމާ އެކު ހުކުރުކުރަމުން އާދެ އެވެ.

ނަމާދުގެ ސަފުގެ ތެރެއަށް ތަނބު ވަންނަ ގޮތަށް ސަފު ހެދުމާ މެދު އިލްމުވެރިންނަށް އެއްބަސްވެވުނީ، މިސްކިތުގައި ޖާގައިގެ ދަތިކަން ނެތް ނަމަ ސަފުގެ ތެރެއަށް ތަނބު ވަންނަ ގޮތަށް ސަފު ނުހެދުމަށެވެ. ނަމަވެސް ސަފުގެ ތެރެއަށް ތަނބު ވަންނަ ގޮތަށް ސަފު ހެދުމަކީ ބިދުއައެއް ކަމަކަށް އިލްމުވެރިން އެއްބަހެއްނުވެ އެވެ.

ޣައިބަށް ކަށު ނަމާދުކުރުމާ މެދު އިލްމުވެރިން އެއްބަސްވީ، މައްޔިތާގެ މައްޗަށް ހާޒިރުގައި ކަށުނަމާދުކޮށްފައިވާ ނަމަ، އެ މީހެއްގެ މައްޗަށް ޣައިބަށް ކަށުނަމާދު ނުކުރުމަށެވެ. މި ގޮތަށް ފާސްކުރުމަށް ފަސް އިލްމުވެރިއަކު ދެކޮޅު ހެއްދެވި އެވެ.

އަޑުހަރުކޮށް ކިޔަވާ ނަމާދުތަކުގައި ބިސްމި ހަރުއަޑުން ކިޔުމާ މެދު އިލްމުވެރިންނަށް އެއްބަސްވެވުނީ އެ ފަދަ ނަމާދުތަކުގައި ސިއްރުން ނުވަތަ އަޑު ހަރުކޮށް ބިސްމި ކިޔުމަކީ ޖާއިޒު (ހުއްދަ) ކަމެއް ކަމަށެވެ. އެ ގޮތަށް ފާސްކުރުމަށް ދެކޮޅު ހެއްދެވީ އެންމެ އިލްމުވެރިއެކެވެ.

މީގެ އިތުރުން ވެސް ދީނީ ހޭލުންތެރިކަން އިތުރުކުރުމާ ގުޅޭ ގިނަ ނިންމުންތަކެއް ވެސް މި މަހާސިންތާގައި ނިންމި އެވެ. އެ ގޮތުން އިތުބާރު ހުރި ގޮތެއްގައި އައިސްފައިވާ އިޚްތިލާފީ މައްސަލަތަކުގައި ހަރުކަށިނުވުމަށް ބާރުއެޅުމަށާއި ޚިޔާލު ތަފާތުވެފައިވާ ފަރުއީ މައްސަލަތަކުގައި ހުރިހާ އިލްމުވެރިންނަށް އިހްތިރާމްކުރުމަށް ވެސް މަހާސިންތާގެ ބައިވެރިން އެއްބަސްވި އެވެ. އަދި ފަތުވާ ދިނުމުގައި ރާއްޖޭގައި ހުރި އިސްލާމީ ޝަރީއަތާ ޚިލާފުނުވާ އާދަކާދަ އާއި ސަގާފަތްތަކަށް ރިއާޔަތްކޮށްގެން ފަތުވާ ދިނުމަށް ވެސް ނިންމި އެވެ.

ދީނީ ހޭލުންތެރިކަން އިތުރުކުރުމުގެ މަގްސަދުގައި ދީނީ އިލްމުވެރިންގެ ޖަމިއްޔާއެއް އުފެއްދުމަށް ވެސް ފާސްކުރި އެވެ. އަދި ސުންނަތާ މެދު ޝައްކު އުފައްދާ މީހުންނަށް ރައްދުދިނުމުގައި މަހާސިންތާގެ ބައިވެރިން އިސްލާމިކް މިނިސްޓްރީ އަށް އެއްބާރުލުން ދިނުމަށް ވެސް މަހާސިންތާ އިން ނިންމި އެވެ.

މީގެ އިތުރުން ޝަރުއީ ގޮތުން ދީނުގައި އޮތް ގޮތް ބަޔާންކޮށްދިނުމަށްޓަކައި ރައްޔިތުންގެ މަޖިލީހަށާއި މިނިވަން މުއައްސަސާތަކަށް އިލްމުވެރިންގެ ފަރާތުން ދައުވަތު ދީގެން ހޭލުންތެރިކުރުމަށް ވެސް މި މަހާސިންތާގައި ނިންމި އެވެ.

މި ފަހަކަށް އައިސް އާންމުންގެ މެދުގަޔާއި ދީނީ އިލްމުވެރިންގެ މެދުގައި އެންމެ ބޮޑަށް ދެކެވެމުންދާ، ސާކް ސަމިޓަށް ބެހެއްޓި ބުދު ހިމެނޭ މޮނިއުމަންޓްތަކުގެ މައްސަލައިގައި އިލްމުވެރިން ނިންމީ، އެ މޮނިއުމަންޓްތަކުގެ ތެރެއިން އަޅުކަންކުރެވޭ ބުދު ހިމެނޭ ހުރިހާ މޮނިއުމަންޓްތަކެއް ނެގުމަށް ކަމާ ބެހޭ ފަރާތްތަކުގައި ދެންނެވުމަށެވެ.

އަދި އިޒްރޭލުގެ ފްލައިޓް ރާއްޖެ އައުމާ ބެހޭ ގޮތުން އިލްމުވެރިންގެ އަޣުލަބިއްޔަތުން ފާސްކުރީ، އެ ކަމާ ބެހޭ ގޮތުން އިސްލާމިކް އެފެއާޒް މިނިސްޓަރު ޑރ. އަބްދުލްމަޖީދު އަބްދުލްބާރީ ރައްޔިތުންގެ މަޖިލީހުގެ ގައުމީ ސަލާމަތުގެ ކޮމިޓީގައި ދައްކާފައިވާ ވާހަކަތަކަށް މަހާސިންތާގެ ގިނަ ބައިވެރިން އެއްބަސްވެ އެ ގޮތަށް ތާއީދުކުރާ ކަމަށެވެ.

މަހާސިންތާ ނިންމުމުގެ ރަސްމިއްޔާތުގައި ބައިވެރިއެއްގެ ހައިސިއްޔަތުން ވާހަކަދައްކަވަމުން ޑރ. އިބްރާހީމް ޒަކަރިއްޔާ މޫސާ ވިދާޅުވީ މިއީ ވަރަށް ކާމިޔާބު ބައްދަލުވުމެއް ކަމަށާއި މަހާސިންތާގެ އެންމެ ބޮޑު ކާމިޔާބަކީ ވަރަށް ގިނަ އިލްމުވެރިންތަކެއް ހިތްހެޔޮކަމާ އެކު ބައްދަލުވެލުމުގެ ފުރުސަތު ލިބުން ކަމަށެވެ.

ޑރ. ޒަކަރިއްޔާ ވިދާޅުވީ މީހަކު ވަކި ކަމަކާ ގުޅޭ ގޮތުން ޚިޔާލެއް ފާޅުކުރުމުން ވަކި ގޮތަކަށް އެ މީހަކު ލޭބަލްކުރުމުގެ އާދަ ނައްތައިލަންޖެހޭ ކަމަށެވެ. އެ ސަގާފަތް ދޫކޮށްނުލައިފި ނަމަ ވަރަށް ގިނަ އޮއްޓަރު ހުރި ވާހަކަތައް ތިލަވެގެން އައުމުގެ ފުރުސަތު ގެއްލިދާނެ ކަމަށް އޭނާ ވިދާޅުވި އެވެ.

އޭނާ ވިދާޅުވި ގޮތުގައި ގުނޫތު ކިޔުމާއި ދެ ތަނބު ދޭތެރޭގައި ސަފު ހެދުމުގެ މައްސަލައަކީ ވަރަށް އާދައިގެ ކުދިކުދި ކަންތައް ކަމަށް ވިޔަސް މިފަދަ ބޮޑު މަހާސިންތާއެއްގައި އެފަދަ ކަންކަމާ މެދު ގޮތްތަކެއް ނިންމަންޖެހުނީ އެ ކަންތަކާ މެދު ގޮތްތަކެއް ނިންމަން އާންމުންގެ ގިނަ ބަޔަކު މަޖުބޫރުކުރުމުން ކަމަށެވެ.

ދެ ދުވަހުގެ މުއްދަތަށް ކުރިއަށް ދިޔަ މި މަހާސިންތާގައި ޖުމްލަ ފަސް ކަރުދާހެއް ހުށަހަޅައި ބައިވެރިންގެ މެދުގައި މަޝްވަރާކުރި އެވެ. އެއީ؛ "އިލްމުވެރިންގެ ތެރޭގައި ޚިލާފު އުފެދިފައިވާ މައްސަލަތަކާ މެދު އަމަލުކުރާނެ ގޮތުގެ މަންހަޖް" މި މައުލޫއަށް ޑރ. އަފްރާޝީމް އަލީ ހުށަހެޅުއްވި ކަރުދާހާއި، "ކޮންމެ އިޚްތިލާފީ މައްސަލައަކީ ދެ ގޮތް ހުއްދަ ކަމެއްތޯ" މި މައުލޫއަށް އައްޝައިޚް މުހައްމަދު ޢިޔާޟް ހުށަހެޅުއްވި ކަރުދާހާއި، "ޚިލާފީ މައްސަލަތަކުގައި އިންކާރުކުރުން" މި މައުލޫއަށް އައްޝައިޚް އަބޫބަކުރު އިބްރާހީމް ހުށަހެޅުއްވި ކަރުދާހާއި، "ޚިލާފީ މައްސަލަތަކުގައި އަމަލުކުރާނެ ގޮތް / ތަނބުތަކުގެ ދޭތެރޭ ނަމާދުކުރުމާ މެދު ދަންނަބޭކަލުން" މި މައުލޫއަށް އައްޝައިޚް ހުސައިން ރަޝީދު އަހްމަދު ހުށަހެޅުއްވި ކަރުދާހާއި، "ސުންނަތް، އިސްލާމީ ޝަރީއަތުގެ ދެ ވަނަ މަސްދަރު" މި މައުލޫއަށް ޑރ. އަބްދުލްމަޖީދު އަބްދުލްބާރީ ހުށަހެޅުއްވި ކަރުދާހާއި "މުސްލިމުންގެ މެދުގައި އުފެދިފައިވާ ބައެއް ޚިލާފީ މައްސަލަތައް" މި މައުލޫއަށް އައްޝައިޚް ނަސްރުﷲ މުސްތޮފާ ހުށަހެޅުއްވި ކަރުދާހާއި، "އިލްމީ ޚިލާފުތަކުގައި ޢިލްމުވެރިންގެ މައުގިފު" މި މައުލޫއަށް އައްޝައިޚް އަހްމަދު ސަލީމް ހުސައިން ހުށަހެޅުއްވި ކަރުދާހެވެ.