ފާފައެއް ކުރެވުމުން އެކަމުގެ ޢަޛާބުން ދުރުވެވޭނެ 10 ގޮތް

ޝެއިޚުލް އިސްލާމް އިބްނި ތައިމިއްޔާ (رحمه الله) ވިދާޅުވިއެވެ. މުއުމިނު އަޅަކަށް ކުރެވޭ ފާފައެއްގެ އަޛާބު ފޮހެލެވޭނެ 10 ގޮތެއްވެއެވެ.

1- އޭނާ ﷲ ތަޢާލާއަށް ތައުބާވުން: އެހެންކަމުން ﷲ ތަޢާލާ އޭނާގެ ތައުބާ ޤަބޫލުކުރެއްވުމެވެ. އެހެނީ، ފާފައަށް ތައުބާވާ މީހާގެ މިޘާލަކީ ފާފައެއް ނުކުރާ މީހެއްގެ މިޘާލެވެ.

2- އޭނާ ﷲތަޢާލާގެ ހަޟްރަތުން ފާފަފުއްސެވުމަށް އެދުމެވެ. އެހެން ކަމުން، ﷲ ތަޢާލާ އޭނާގެ ފާފަ ފުއްސަވައެވެ.

3- އޭނާގެ ފާފަ ފުހެލުމަށްޓަކައި ހެޔޮ ޢަމަލު ކުރުމެވެ. އެހެނީ، ހެޔޮ ޢަމަލްތަކުން ނުބައި ޢަމަލްތައް ފޮހެދެއެވެ.

4- އީމާންކަމުގައި އޭނާގެ އަޚުން އޭނާ ދުނިޔޭގައި ހުންނަ އިރު ނުވަތަ މަރުވުމަށްފަހުގައި އޭނާގެ ފާފަފުއްސެވުމަށް އެދި ދުޢާކުރުމެވެ.

5- ނުވަތަ އެމީހުން އޭނާ އަށް ކޮށްދޭ ޞަދަޤާތެއްގެ ގޮތުގައި އޭނާއަށްޓަކައި ﷲ ތަޢާލާގެ ހަޟްރަތުން އެދުމުގެ ސަބަބުން އޭނާއަށް އެކަމުން މަންފާކުރުން.

6- އޭނާގެ ނަބިއްޔާ މުޙައްމަދު (صلى الله عليه وسلم)، އޭނާގެ މައްޗަށް ޝަފާޢަތްތެރިވުމެވެ.

7- މިދުނިޔެމަތީގައި ﷲ ތަޢާލާ އޭނާއަށް މުޞީބާތްތައް ޖައްސަވާ އިމްތިޙާން ކުރައްވާ، އަދި އޭގެ ސަބަބުން އޭނާގެ ފާފަތައް ފޮހެވެއެވެ.

8- ﷲތަޢާލާ ބަރުޒަޚުގެ ޢާލަމުގައި (މަރުވުމާއި މަޚްޝަރުކުރެވުމާއި ދެމެދުގައިވާ ޙަޔާތް) އޭނާ އިމްތިޙާން ކުރެއްވާ އެކަމުން އޭނާގެ ފާފަތައް ފޮހެވެއެވެ.

9- ޤިޔާމަތްދުވަހުގެ އެކިއެކި މަރުޙަލާތަކުގައި އޭނާ އިމްތިޙާން ކުރެއްވުމެވެ. އަދި އޭގެ ސަބަބުން އޭނާގެ ފާފަތައް ފޮހެވެއެވެ.

10- ރަޙުމްކުރެއްވުމުގައި އެންމެ ރަޙްމާންތަންތަ އިލާހު، އޭނާގެ މައްޗަށް ރަޙުމްކުރުމެވެ.

މި 10 ގޮތްތައް ފަހަނަޅައިފި މީހަކަށް، އޭނާގެ ނަފްސު ފިޔަވާ އެހެން ފަރާތެއް ކުށްވެރިއެއް ނުކުރެވޭނެއެވެ.