ފަލަޞްތީނުގެ މަންމަޔަކު އޭނާގެ ކުޑަދަރިފުޅަށް

 އޭ ތުއްތު ތުއްތު ފުރާނަޔާއެވެ! ތިބާގެ ޙަޔާތް ފުރިހަމަ ވެއްޖެއެވެ. ތިބާ އަހަރެން ދޫކޮށްފަދާނެއެވެ. އަހަންނަށް އޮތީ ކުރިއަށްދިއުމެވެ. އެއްވެސްފަދަ މަކަރެއް ޙީލަތެއް ނުދަންނަ ތިޠާހިރު ފުރާނައިގެ މައްޗަށް އެންމެ ޙައްގުވެރި ފަރާތަކީ ތިބާ ހެއްދެވި ފަރާތެވެ.

 އަހަރެމެން ދެމައިން އެކުގަވީ ކުރުމުއްދަތަކަށެވެ. އެހެނަސް ތިބާގެ ވޭނުގައި އަހަރެންގެ ކަރުނަތައް ޝާމިލްވީ ވަގުތުތަށް ދުވަހަކުވެސް އަހަރެންގެ ހަނދާނުން ފިލައި ނުމެދާނެއެވެ. ތިބާގެ ފަނޑު ހިނިތުންވުންތަކުން އަހަރެންގެ ހިތް މިވަނީ ބަރުވެ ފުރިފައެވެ. އަދި އަހަރެމެންގެ ދެމެދުގައި މިވަނީ އެއްވެސް ދުރުމިނަކަށް ދުރުކޮށްނުލެވޭނެ ފަދަ ލޯތްބެކެވެ. ތިބާގެ ޤާތިލުން ހަނދާންކުރަންޖެހޭނެއެވެ.

އެބައިމީހުން އެވަނީ ތިބާ ހެއްދެވި ފަރާތާއި ހަނގުރާމަ ފަށާފައިކަމެވެ. މައުސޫމު ލެއާއެކު ތިބާގެ ނާޒުކު ދެލޮލުން ފުރިހަމަ އިތުބާރަކާއި އުންމީދާއިއެކު އުޑުތަކާއި ދިމާއަށް އެނބުރުނު ހިނދެވެ. އަދި އެތަނެއްގެމަތިން ހުރިހާކަމެއް ދެނެވޮޑިގެންވާ އިލާހު ވެރިކަމާއި ބާރުތައް ހިންގެވުމުގައި ދެމިވޮޑިގެން ވެއެވެ.

 އެއިލާހީ އެންމެހާކަމެއް ބައްލަވާވޮޑިގެންވާ އަދި ތިބާގެ މަރާއި މެދު ހެކިވެ ވޮޑިގެންވާ އިލާހެވެ. އެހެނަސް އެބައިމީހުން އެބައިމީހުންގެ ބާރުގަދަ ކަމާއިމެދު އުފާކުރާ ޙާލުގައި ބަޑިތަކާއި ޓޭންކުތަކުން އަހަރެމެން ވަށާލައިގެން ދެމިތިބެއެވެ. އެކަމަކު އެބައިމީހުން އެހަނގުރާމަކުރާ ކުޑަކުދިންނާއި މެދުގައި ބިރުވެތިވެބަލާށެވެ. އެންމެހައި ކަމެއް ބައްލަވާވޮޑިގެންވާ އިލާހު އަނިޔާވެރިކަމާއި ނާއިންޞާފު ދެކެވޮޑިގެންފި ހިނދު، އެދުވަހަކާއި މެދު އެއްވެސް ޝައްކެއްނެތް ދުވަހުގައި އެބައިމީހުން ވާނީ ކޮންފަދައަކުން ހެއްޔެވެ. ފަހެ މިއަދު އަހަރެން ތިބާގެ ތުއްތު ހަށިގަނޑު އެތަނަކުން ތިބާއުފެއްދެވިފައިވާ ފަސްގަނޑުގެ ދަށުގައި ބާއްވާލަމެވެ.

 އަލުން އަނބުރައި އެތަނަށް ރުޖޫޢަކުރަމެވެ. އަހަރެން ތިބާގެ މަހާނަ މަތީ މަޑުމަޑުން ފިރުމާލަމެވެ. އަދި އެހިނދު ހަމަހިމޭން ކަރުނަތަކުން އަހަރެންގެ ލޯފުރާލައެވެ. އެހެނީ ތިބާ އަމާންކަމުގައި ދިރިހުރިކަން އަހަންނަށް އިޙްސާސްކުރެވެއެވެ. މައުސޫމު ތުއްތު ފުރާނައެކެވެ. ބިރުގަތުމެއް ނުދަނެއެވެ. އެންމެހައި ޙަރަކާތްތަކާއި ޢަމަލްތަކެއްވަނީ ލޯބިންފުރިގެނެވެ.

 ތިބާ މިދުނިޔެއަށް އުފަންވީފަދައިން ފިޠުރަތުގެ ސާފު ޠާހިރުކަން މަތީގައެވެ. އަހަރެން އެނބުރި އައިސް މިބިންމަތީ ހިނގާބިނގާވެ އުޅެމެވެ. އެތަނަކަށް އިންތިހާއަށް ބިރުވެތިވެ ރުޅިއަންނަ ތަނެކެވެ. އަދި އެތަނަކުން ޢަދުލު އިންޞާފު ނެތިފިލާ ގޮސްފައިވާ، އެތަނެއްގައި އަހަރެމެންގެ އެންމެހައި ގާތްމީހުން ޤަތުލުކުރެވިފައިވާ މިބިމެވެ. އެކަމަކު ޙައްޤުގެ މަގުގައި އަހަރެން ދެމިހުންނާނަމެވެ. ފިޔަވަޅަކަށްފަހު ފިޔަވަޅެއް ކަނޑައްތު ކުރާނަމެވެ. ބޮޑުވެގެންވާ ދުވަހަށް އިންތިޒާރު ކުރާޙާލުގައި ޚާލިޤުވަންތަ އިލާހުގެ ޤާނޫނަށް ތަބަޢު ވާނަމެވެ.

 އަހަރެން ތިބާއާއި އެކުގައި ދާއިމީ އަމާންކަމުގައި ބައިވެރިވާނަމެވެ. އެހެންކަމުން ލޯބިވާ ތުއްތު ފުރާނަޔާއެވެ. އަހަންނަށް އިންތިޒާރުކުރާށެވެ. ހަމަކަށަވަރުން އަހަރެންގެ ވަގުތު ވަރަށް އަވަހަށް ނިމޭނެހެން ހީވެއެވެ .

މިއީ ފަލަޞްތީނުގެ މަންމަޔަކު އޭނާގެ ކުޑަދަރިފުޅު ޤަތުލުވެގެންދިއުމުގެ ހިތާމައިގައި ލިޔެފައިވާ ލިއުމެކެވެ.

އަދި ﷲގެ މަގުގައި އެބައިމީހުންގެ ދަރިންތައް ޤަތުލުވެ ގޮސްފައިވާ އުންމަތުގެ އެންމެހައި މައިންނަށް ހަދިޔާކޮށްފައިވާ ލިޔުމެކެވެ. ”އެންމެހައި އާރަކާއި ބާރެއް މިލްކުވެވޮޑިގެންވާ އިލާހު، އެމައިންގެ ހިތްތަކަށް ހަމަޖެހުމާއި ރަޙްމަތް ދުނިޔެއާއި އާޚިރަތުގައި މިންވަރުކޮށްދެއްވަވާންދޭވެ! އަދި އަހަރުމެންނަށް ލިބިގެންވާ އެއްޗަކާއިމެދު ޝުކުރުވެރިވުމުގެ ނިޢުމަތް ރަޙްމާނުވަންތަ އިލާހު އަހަރުމެންގެ ހިތްތަކަށް ބާވައިލައްވަވާންދޭވެ!

 އަދި އުންމަތުގައި ތިބި ހިތްދަތިކަމާއި ވޭން ތަޙަންމަލު ކުރަމުންދާ ނިކަމެތީން ދިފާޢުކުރުމުގައި އެއްބާރުލުންދީ މަސަތްކަތްކުރުމުގައި (އެބައިމީހުންގެ) އޯގާތެރިކަމާއި ހިތްހެޔޮކަމުގެ ފިޔަތަށް ތިރިކޮށްދެއްވަވާނދޭވެ!“