5:23 PM
ދީނީ މިނިވަންކަމަށް ގޮވާލާ މީހުންނާ މެދު ފިޔަވަޅު އެޅުމަށް ގާނޫނީ ހުރަސްތަކެއް އެބަހުރި ކަމަށް އިސްލާމިކް މިނިސްޓަރު ޑރ. އަބްދުލް މަޖީދު އަބްދުލްބާރީ މިއަދު ވިދާޅުވެއްޖެ އެވެ.
ދީނީ މިނިވަންކަމަށް ގޮވާލައި މި މަހުގެ 10 ގައި ބަޔަކު މީހުން އާޓިފިޝަލް ބީޗަށް އެއްވި މައްސަލާގައި ރައްޔިތުންގެ މަޖިލީހުގެ ގައުމީ ސަލާމަތާ ބެހޭ ކޮމެޓީގައި ވާހަކަ ދައްކަވަމުން ޑރ. މަޖީދު ވިދާޅުވީ، އެކަމަށް ގޮވާލާ މީހުންނަށް ގާނޫނަކުން އަދަބެއް ސީދާ ކަނޑައަޅާފައި ނެތުމުން ވަކި ގޮތަކަށް އެފަދަ ކަންކަން ގެންދެވިދާނެ ކަމަށް ގަބޫލުނުކުރެއްވޭ ކަމަށެވެ. އެހެންވެ ގާނޫނު އަސާސީން ލާޒިމްކުރާ ގާނޫނުތައް ހެދުމުގެ މަގެއް ހޯއްދަވައި ދެއްވުމަށް ރައްޔިތުންގެ މަޖިލީހުގައި އޭނާ އެދިވަޑައިގަތެވެ.
ޑރ. މަޖީދު ވިދާޅުވީ މިހާރު ރައްޔިތުންގެ މަޖިލީހުގައި އޮތް ގާނޫނުލް އުގޫބާތް ފާސްކުރާއިރު އެފަދަ ކަންކަމަށް އަދަބުތައް ކަނޑައެޅިދާނެ ކަމަށެވެ.
ގާނޫނަކުން ވަކި ކުށަކަށް އަދަބު ދޭން ކަނޑައަޅާފައި ނެތް ނަމަ ގާނޫނުލް އުގޫބާތުގެ 88 ވަނަ މާއްދާގެ ހ. ށ. އަދި ނ. ގެ ދަށުން އަދަބު ދެވޭނެ ކަމަށް ގުރައިދޫ ދާއިރާގެ މެމްބަރު އިބްރާހިމް ރިޒާ ދެންނެވުމުން ޑރ. މަޖީދު ވިދާޅުވީ އެއީ ވަރަށް ލުއި އަދަބެއް ކަމަށެވެ.
އިސްލާމިކް މިނިސްޓަރު ވިދާޅުވީ ދީނީ މިނިވަންކަމަށް ގޮވާލާ މީހުންނަށް ދެވޭނެ އަދަބަކާ ބެހޭ ގޮތުން ގާނޫނީ މާހިރުންނާ ވެސް ވާހަކަދެއްކެވި ކަމަށާއި އެކަމަކު މިހާރު ހުރި ގާނޫނުތަކުން އެ މީހުންނަށް އަދަބު ދެވޭނެ ގޮތެއް ނެތް ކަމަށް އެ ބޭފުޅުން ވިދާޅުވާ ކަމަށެވެ.
"އެ ބަޔަކު ގޮވާލީ ތިމަންނާމެން ސީދާ ދީން ދޫކޮށްލި ވާހަކައަކަށް ނޫން. ގޮވާލީ ދީނީ މިނިވަންކަން އޮންނަން ޖެހޭ ކަމަށް. އެކަމަކީ ކަނޑައެޅިގެން ވަކި އަދަބެއް އޮންނަ ކަމެއް ވެސް ނޫން. އެއީ ރާއްޖޭގެ ދީނީ އެއްބައިވަންތަކަމާ ހިލާފު އެ ވެވެނީ. ޝަރުއީ ހުކުމެއް އެއަށް ނާންނާނެ ތިމާ އަމިއްލަ އަށް ތިމާ ދީން ގަބޫލުނުކުރާ ކަމަށް ނުބުނާހާ ހިނދަކު. އެހެންވީމަ އެކަމަކީ އަޅުގަނޑަށް ގަބޫލެއް ނުކުރެވޭ ކަނޑައެޅިގެން ދީނުގައި ހުކުމެއް އޮތް ކަމަކަށް،" އިސްލާމިކް މިނިސްޓަރު ވިދާޅުވި އެވެ.
0 comments:
Post a Comment