ސުވަރުގޭ ނަންފުޅުތައް

   ސުވަރުގޭގައިވާ ދޮރުކޮޅުތަކުގެ ޢަދަދަކީ، އަށެއްކަމަށް ދަލީލު ލިބޭ ޙަދީޘްފުޅުތައް ވެއެވެ. ޠާޢަތާއި ނަމާދާއި ރޯދައާއި ޖިހާދާއި އެނޫން ހެޔޮކަންކަމުގެ ނަމުން ނަންދެއްވާފައިވާ ސުވަރުގޭގެ ދޮރުކޮޅުތައް ހިމެނޭ ޙަދީޘްފުޅުތަކެއް ބަޔާންކުރެއްވުމަށްފަހު، ޤުރުޠުބީ ވިދާޅުވެފައި ވެއެވެ. "މިއިން ދަލީލު ލިބޭ ގޮތުގައި، ސުވަރުގޭގެ ދޮރުކޮޅުތަކުގެ ޢަދަދު، އަށަކަށްވުރެ ގިނައެވެ. އެހެނީ، އެ ދޮރުކޮޅުތަކުގެ ޢަދަދު ތޭރައަށް އެބަ އަރައެވެ."

ސުއާލަކީ، އެ ދޮރުކޮޅުތައް ވަނީ، އެއް ސުވަރުގޭގައިތޯއެވެ؟ ނުވަތަ އެއީ އެތައް ސުވަރުގެއެއްތޯއެވެ؟

އެއީ ދަރަޖައިގެ ގޮތުން ތަން ތަފާތުވާ ޙާލު، އެއް ލެވެލެއްގައިވާ ސުވަރުގެތަކެއް ތޯއެވެ؟ ނުވަތަ އެއީ، ފަންގިފިލާތަކެއްގެ ސިފައިގައިވާ ސުވަރުގެތަކެއްތޯއެވެ؟


ޙަދީޘްފުޅެއްގައި ވެއެވެ. (إِذَا سَأَلْتُمُ اللَّهَ فَاسْأَلُوهُ الْفِرْدَوْسَ الأعْلَى) މާނައީ، "ތިޔަބައިމީހުން، ﷲ ގެ ޙަޟުރަތުގައި ސުވަރުގެއަށް އެދޭ ހިނދު، މަތިވެރިވެގެންވާ ފިރުދައުސް ދެއްވުމަށް، އެކަލާނގެ ޙަޟުރަތުގައި ދަންނަވާހުށިކަމެވެ." މި ޙަދީޘްފުޅުގައި މިވާ، މަތިވެރިކަމަކީ، ތަނުގެ ގޮތުން މަތިވެރިވުންތޯއެވެ؟ ނުވަތަ އެއީ، ދަރަޖައިގެ ގޮތުން މަތިވެރިވުންތޯއެވެ؟

މި ސުއާލުތަކުގެ ޖަވާބުތައް ދެނެވޮޑިގެންވަނީ ގަދަ ކީރިތި ވަންތަ މާތް ﷲ އެވެ. އަޅުގަނޑުމެންނަކަށް އެޔެއް ނޭގެއެވެ.


އެއް ސުވަރުގެއަށްވުރެ ގިނަ ސުވަރުގެ ވާކަމަށް ދަލީލު ލިބޭ އާޔަތްތައް ކީރިތި ޤުރުއާނުގައި ވެއެވެ. ކީރިތި ޤުރުއާނުގައި ނަންގަނެވިފައިވަނީ، (جَنَّات) މިފަދައިންނެވެ. މާނައީ ސުވަރުގެތަކެވެ. މާތ ްﷲ ޥަޙީކުރައްވާފައި ވެއެވެ. (وَلِمَنْ خَافَ مَقَامَ رَبِّهِ جَنَّتَانِ) (އައްރަޙުމާން: 46) މާނައީ، "އެމީހާގެ ވެރިރަސްކަލާނގެ ޙަޟުރަތުގައި ހުންނަންޖެހޭ ހުރުމާމެދު، ބިރުވެތިވެއްޖެ މީހާއަށް ދެ ސުވަރުގެ ހުށްޓެވެ." އަދި އެހެން އާޔަތެއްގައި ވެއެވެ. (وَمِن دُونِهِمَا جَنَّتَانِ) (އައްރަޙުމާން: 62) މާނައީ، "އަދި އެ ދެ ސުވަރުގެ ފިޔަވައި ދެ ސުވަރުގެ ވެއެވެ."


ކީރިތި ޤުރުއާނާއި ޙަދީޘްފުޅުތަކުގައި، ސުވަރުގޭގެ ސިފަފުޅުތައް ބަޔާންކުރައްވާފައި ވެއެވެ. އެއް ސުވަރުގޭގެ ގޮތުގައްޔާއި ގިނަ ސުވަރުގެ ތަކުގެ ގޮތުގައެވެ. ގިނަ ސުވަރުގެތަކުގެ ގޮތުގައި ބަޔާންކުރައްވާއިރު، ސުވަރުގެތަކަށް ނަންތައް ވެއެވެ. އެގޮތުން ހަތް ނަންފުޅެއް ވާރިދުވެފައި ވެއެވެ. އެއީ، ޖަންނާތު ޢަދުން، ދާރުއްސަލާމް، ދާރުލްޚުލްދި، އަލްފިރުދައުސް، ޖަންނަތުލްމައުވާ، ޖަންނަތުއްނަޢީމް، ދާރުލްއިޖުލާލި މިއެވެ. އިބްނު ޢައްބާސްގެފާނާއި އެކަލޭގެފާނުގެ އިތުރުން ބައެއް ޢިލްމުވެރިން އިޚުތިޔާރުކުރައްވާފައިވަނީ މިނަންފުޅުތަކެވެ.


ޢިލްމުވެރިންގެ ތެރެއިން ގިނަ ބޭކަލުން ދެކެވަޑައިގަންނަވާ ގޮތުގައި، ސުވަރުގެތަކުގެ ޢަދަދު ހަތަރެކެވެ. އެ ބޭކަލުން ދަލީލު ދައްކަވަނީ، އައްރަޙުމާން ސޫރަތުގެ ނަންގަނެވިދިޔަ ދެ އާޔަތުންނެވެ. މާތް ﷲ ގެ ޙަޟުރަތަށް ބިރުވެތިވެއްޖެ މީހަކަށް ދެ ސުވަރުގެ ލައްވާފައި ވެއެވެ. އެއީ، ޖަންނަތުއްނަޢީމާއި ޖަންނަތުލްމައުވާ އެވެ. އަނެއް ދެ ސުވަރުގެއަކީ، ޖަންނަތު ޢަދުނާއި ޖަންނަތުލްފިރުދައުސް އެވެ.


ދެންފަހެ، އަޅުގަނޑުމެން އީންވުން ވާޖިބުވެގެންވަނީ، މާތް ﷲ ގެ އަޅުތަކުންގެ ތެރެއިން މުއުމިނުންނަށް ދަރުމައާއި ޘަޥާބު ދެއްވުމަށްޓަކައި، ސުވަރުގޭގެ ނަމުގައި ތަނެއް ތައްޔާރުކުރައްވާފައިވާ ކަމަށެވެ. ދުވަހަކު ވެސް މީހެއްގެ ލޮލަށް ނުފެންނަ، އަދި ކަންފަތަށް އަޑު ނީވޭ، އަދިކިއެއްތަ، ދުވަހަކު ވެސް މީހެއްގެ ހިތަށް ވެސް ނާރާ ތަކެތި ސުވަރުގޭގައި ލައްވާފައި ވެއެވެ. އެތަކެތި ލިބިގަތުމަށް ހިތްތައް ޝައުޤުވެރިވާނެއެވެ. އަދި އެތަކެތި ފެނުމުން ލޯތަކަށް އެއިން އަރާމާއި ލައްޒަތު ލިބޭނެއެވެ.


އައުލާކަން ބޮޑީ، އެއީ އެއް ސުވަރުގެ ކަމަށްވިޔަސް، އަދި ގިނަ ސުވަރުގެތަކެއް ކަމަށް ވިޔަސް، އެކަން މާތް ﷲ ގެ ޢިލްމުފުޅަށް ދޫކޮށްލުމެވެ. އެތަން މޮޅަށް ދެނެވޮޑިގެންވާނީ އެކަލާނގެއެވެ. އަދި އީމާންކަންމަތީގައި އަޅުގަނޑުމެން މިދުނިޔެއާ ވަކިވެއްޖެނަމަ، އެކަލާނގެ އިޒުނަފުޅާއެކު، އެތަން ފެނިއްޖައުމަށްދާންދެން ތިބުމެވެ.                                 
ސުވަރުގޭ ދޮރުކޮޅުތަކާއި ނަރަކައިގެ ދޮރުތައް
"މަޝާރިޤުލް އަންޥާރި" ނަމަކަށް ކިއުނު ފޮތުގެ 178 ވަނަ ޞަފުޙާގައި ވެއެވެ. ބުޚާރީއާއި މުސްލިމު ރިވާކުރައްވާފައިވާ ގޮތުގައި، ސުވަރުގޭގައި އަށް ދޮރުކޮޅު ވެއެވެ. އޭގެ ތެރެއިން އެއް ދޮރުކޮޅަކީ، ރައްޔާން ދޮރުކޮޅެވެ. ރޯދަވެރިން ސުވަރުގެއަށް ވަންނާނީ އެ ދޮރުކޮޅުންނެވެ. އަދި ރިވާވެފައިވާ އެހެން ޙަދީޘްފުޅެއްގައި ވެއެވެ. (مَنْ أَنْفَقَ زَوْجَيْنِ مِنْ مَالِهِ فِي سَبِيْلِ اللهِ دُعِيَ مِنْ أَبْوَابِ الجَنَّة، وَلِلْجَنَّةِ أَبْوَاب. فَمَن كَانَ مِنْ أَهْلِ الصَّلاَةِ دُعِيَ مِنْ بَابِ الصَّلاَةِ وَمَنْ كَانَ مِنْ أهْلِ الصِّيَامِ دُعِيَ مِنْ بَابِ الرَّيَّان، وَمَنْ كَانَ مِنْ أَهْلِ الصَّدَقَة دُعِيَ مِنْ بَابِ الصَّدَقَة وَمَنْ كَانَ مِنْ أَهْلِ الجِهَادِ دُعِيَ مِنْ بَابِ الجِهَادِ)

މާނައީ، "ﷲ ގެ މަގުގައި، އެމީހެއްގެ މުދަލުން ދެގުނައަށް ހޭދަކޮށްފި މީހާއަށް، ސުވަރުގޭގެ ދޮރުކޮޅުތަކުން ގޮވާލެވޭނެއެވެ. ފަހެ، އޭނާއަކީ، ނަމާދުކުރުމަށް އަރާހުރި މީހެއްނަމަ، އޭނާއަށް ގޮވާލެވޭނީ، ނަމާދުގެ ދޮރުކޮޅުންނެވެ. އަދި އޭނާއަކީ، ރޯދަހިފުމަށް އަރާހުރި މީހެއް ނަމަ، އޭނާއަށް ގޮވާލެވޭނީ، ރައްޔާން ދޮރުކޮޅުންނެވެ. އަދި އޭނާއަކީ، ޞަދަޤާތް ދިނުމަށް އަރާހުރި މީހެއް ނަމަ، އޭނާއަށް ގޮވާލެވޭނީ، ޞަދަޤާތުގެ ދޮރުކޮޅުންނެވެ. އަދި އޭނާއަކީ، ޖިހާދުކުރުމަށް އަރާހުރި މީހެއް ނަމަ، އޭނާއަށް ގޮވާލެވޭނީ، ޖިހާދުގެ ދޮރުކޮޅުންނެވެ."

އައްޠަބަރާނީ ތަޚުރީޖުކުރައްވާފައިވާ ޙަދީޘްފުޅެއްގައި ވެއެވެ. (وَإنَّ فِي الجَنَّةِ بَابًا يُقَالُ لَهُ الضُّحَى) މާނައީ، "އަދި ސުވަރުގޭގައި އައްޟުޙާ ނަމަކަށް ކިޔޭ ދޮރުކޮޅެއް ވެއެވެ." އެ ދޮރުކޮޅު ޚާއްޞަވެގެންވަނީ، ޟުޙާ ނަމާދުކުރުންމަތީ ދެމިތިބި މީހުންނަށެވެ.

ސުވަރުގޭގެ ދޮރުކޮޅުތަކުގެ ނަންތަކާ ބެހޭގޮތުން ވާރިދުވެފައިވަނީ މިވަރަށެވެ. އެ ދޮރުކޮޅުތަކުގެ ޢަދަދަކީ، އަށެކެވެ. ނަމަވެސް އެ ހުރިހައި ދޮރުކޮޅުތަކެއްގެ ނަންތައް ބަޔާންކުރައްވާފައި ނުވެއެވެ.

އެހެންވީމާ، ޞައްޙަ ގޮތުގައި ވާރިދުވެފައިވާ ހިސާބަށް ކުރުކޮށްލަން ޖެހެއެވެ.

"އައްތަޛުކިރާ" ގައި ތިރުމިޛީގެ އަރިހުން، ޤުރުޠުބީ ނަކަލުކުރައްވާފައިވެއެވެ. "ސުވަރުގޭގައި، މުޙައްމަދުގެފާނު (صلى الله عليه وسلم) ގެ އުންމަތު މީހުންނަށް ޚާއްޞަ ދޮރުކޮޅެއް ވެއެވެ. އެ ދޮރުކޮޅުން އެބައިމީހުން ނޫން ބަޔަކު ނުވަންނާނެއެވެ. ކީރިތި ރަސޫލާ (صلى الله عليه وسلم) ވެދެވަޑައިގަންނަވާނީ، މުޙައްމަދު ނަމަކަށް ކިއުނު ދޮރުކޮޅުންނެވެ. އެއީ ރަޙުމަތާއި ތައުބާގެ ދޮރުކޮޅެވެ."

ސުވަރުގޭގެ ދޮރުކޮޅުތަކާ ބެހޭ ގޮތުން މީގެ އިތުރުން، ޟަޢީފު ރިވާޔަތްތައް ވާރިދުވެފައި ވެއެވެ. ޢަޤީދާއާއި ޣައިބިއްޔާތުގެ ކަންކަމުގައި އެފަދަ ރިވާޔަތްތައް ޤަބޫލުނުކުރެވޭނެއެވެ. މާތްﷲ ގެ އިރާދަފުޅާއެކު، އަޅުގަނޑުމެންނަށް ސުވަރުގެއަށް ދެވުމުން، އެތަން ފެނި، ޙަޤީޤަތް އެނގޭނެއެވެ.

"މަޝާރިޤުލް އަންޥާރި" ނަމަކަށް ކިއުނު ފޮތުގެ 175 ވަނަ ޞަފުޙާގައި ވެއެވެ. ނަރަކައިގައި ހަތް ދޮރު ވެއެވެ. އެކަމުގެ ދަލީލަކީ، އަލްޙިޖުރު ސޫރަތުގެ 43 ވަނަ އާޔަތާއި 44 ވަނަ އާޔަތެވެ. وَإِنَّ جَهَنَّمَ لَمَوْعِدُهُمْ أَجْمَعِينَ (43) لَهَا سَبْعَةُ أَبْوَابٍ لِّكُلِّ بَابٍ مِّنْهُمْ جُزْءٌ مَّقْسُومٌ (44) މާނައީ، "އަދި ހަމަކަށަވަރުން، ނަރަކައަކީ، އެ އެންމެނަށް ﷲ ވަޢުދުކުރައްވާފައިވާ ތަނެއްކަން ކަށަވަރެވެ. (43) އެ ނަރަކައަށް ހަތް ދޮރު ވެއެވެ. އެއިން ކޮންމެ ދޮރަކަށް ކަނޑައެޅިގެންވާ ބައެއް ވެއެވެ. (44)"

ރިވާވެފައި ވެއެވެ. ނަރަކައިގެ ފުރަތަމަ ދޮރުގެ ނަމަކީ، ޖަހަންނަމަ އެވެ. ދެނަވަ ދޮރުގެ ނަމަކީ، ލަޡާ އެވެ. ތިންވަނަ ދޮރުގެ ނަމަކީ، ސަޤަރު އެވެ. ހަތަރުވަނަ ދޮރުގެ ނަމަކީ، އަލްޙުޠަމާ އެވެ. ފަސްވަނަ ދޮރުގެ ނަމަކީ، "އަލްޖަޙީމް" އެވެ. ހަވަނަ ދޮރުގެ ނަމަކީ، "އައްސަޢީރު" އެވެ. ހަތްވަނަ ދޮރުގެ ނަމަކީ، "އަލްހާވިޔާ" އެވެ. މި ނަންތައް ނެގިފައިވަނީ، ނަރަކައިގެ ބައިތަކުގެ ނަމުންނެވެ.

މިކަންކަމުގެ ޙަޤީޤަތް މޮޅަށް ދެނެވޮޑިގެންވާނީ، މާތް ﷲ އެވެ.




ތަރުޖަމާ: އަލްއުސްތާޛު ޢަބްދުލްމުޢީދު ޙަސަން