4:47 PM
ދީނީ މިނިވަންކަމަށް ގޮވާލި އެއްވުމުގައި ބައިވެރިވި އިސްމާއިލް ހިލްއަތު ރަޝީދު އެއްވެސް ޝަރުތަކާ ނުލައި ދޫކޮށްލުމަށް އެމްނެސްޓީ އިންޓަނޭޝަނަލް އިން އިއްޔެ ގޮވާލައިފި އެވެ.
އިންސާނީ ހައްގުތަކަށް މަސައްކަތްކުރާ އެމްނެސްޓީން ނެރުނު ބަޔާނެއްގައި ބުނީ ހިލްއަތު ހައްޔަރުކޮށްފައި ވަނީ ގާނޫނާއި ގަވާއިދާ އެއްގޮތަށް ނޫން ކަމަށާއި އެހެންވެ ސަރުކާރުން އޭނާ އަށް ބަންދުގެ ބަދަލު ދޭން ޖެހޭނެ ކަމަށެވެ.
ބަޔާނުގައި ބުނެފައި ވަނީ މި މަހުގެ 10 ވަނަ ދުވަހު ހިލްއަތާ އެކު ތިރީހަކަށް މީހުން ބާއްވާފައި ވަނީ "ހިމޭން މުޒާހަރާ"އެއް ކަމަށެވެ. އަދި އެ މީހުންގެ ތެރެއަށް ބަޔަކު ގާ އުކުމުގެ ސަބަބުން ހިލްއަތުގެ ބޯ ފެޅި ފަރުވާ ހޯދާފައިވާކަން ފާހަގަކޮށްފައިވެ އެވެ. އަދި ހިލްއަތު ހައްޔަރުކުރީ އޭނާއާ މެދު ފިޔަވަޅު އެޅުމަށް އަދާލަތު ޕާޓީ އާއި ދީނީ ޖަމާއަތްތަކުން ގޮވާލާފައި ވަނިކޮށް ކަމަށް ވެސް ވަނީ ފާހަގަކޮށްފަ އެވެ.
ހިލްއަތަކީ ސޫފީ މުސްލިމެއް ކަމަށް އޭނާ ބުނާ ކަމަށާއި އެކަމަކު ރާއްޖޭގައި އެހެން ދީންތަކަށް ގޮވާލުމަކީ ގާނޫނުއަސާސީއާ ހިލާފު ކަމެއްކަން އެމްނެސްޓީން ފާހަގަކޮށްފައިވެ އެވެ. ނަމަވެސް ހިލްއަތު ހައްޔަރުކޮށްފައި ބެހެއްޓުން ހިޔާލު ފާޅުކުރުމުގެ މިނިވަންކަމާއި އެއްވެ އުޅުމުގެ މިނިވަންކަމާ ބެހޭ ބައިނަލްއަގުވާމީ މުއާހަދާތަކާ ހިލާފުވާ ކަމަށް އެމްނެސްޓީން ވަނީ ބުނެފަ އެވެ.
އެ ޖަމާއަތުން ބުނީ ހިލްއަތުގެ ހިޔާލު ފާޅުކުރުމުގެ މިނިވަންކަމަށް ސަރުކާރުން އަރައިގެންފައިވާ ކަމަށާއި ހިލްއަތަށް ހަމަލާ ދިން މީހުންނާ މެދު ސަރުކާރުން އެއްވެސް ފިޔަވަޅެއް ނާޅައި ކަމަށެވެ. އަދި މިކަމާ ކަންބޮޑުވާ ކަމަށް ބުނެފައިވެ އެވެ.
މި މަހުގެ 14 ވަނަ ދުވަހު ހިލްއަތު ހައްޔަރުކުރުމަށް ފަހު އޭގެ އަނެއް ދުވަހު ވަނީ އޭނާގެ ބަންދުގެ މުއްދަތު ކްރިމިނަލް ކޯޓުން 10 ދުވަހަށް އިތުރުކޮށްފަ އެވެ. އޭނާގެ ބަންދުގެ މުއްދަތާ މެދު ގޮތެއް ނިންމުމަށް ބޭއްވި ޝަރީއަތުގައި ފުލުހުން ވަނީ ހިލްއަތު އޭނާގެ ބްލޮގްގައި ލިޔާ ވާހަކަތަކުގެ މައްސަލަ ފާހަގަކޮށްފަ އެވެ.
0 comments:
Post a Comment