12:00 AM
ޑރ. ކަޔާލީ ވިދާޅުވީ، ކޮންމެ ދުވަހަކު ފަސް ފަހަރު، ވުޟޫކުރުމަކީ، އިންސާނާގެ ހަށިގަނޑުގައިވާ އިދި ކަނިތައް ފިލުވައިލާ ކަމެއް ކަމަށެވެ. އެކަނިތައް މީހެއްގެ ހަށިގަނޑުގައިވާނަމަ، އެމީހެއްގެ ހުޅުތަކުގައި ރިއްސާނެ އެވެ. އަދި ހުޅުތަކަށް އެކިއެކި ބަލިތައް ޖެހޭނެ އެވެ. ބަރާބަރަށް ނަމާދުކުރާ މީހަކު ކޮންމެ ދުވަހަކު ފަސް ފަހަރު ވުޟޫކުރާނެ އެވެ. ވުޟޫކުރުމުން ލިބޭ ފައިދާތައް ޙާޞިލުވާނީ އީމާންކަމާއެކު ރަނގަޅަށް އެކަން ކުރާ މީހުންނަށެވެ.
ކީރިތި ޤުރުއާނުގެ އަލީގައި ވާހަކަފުޅުދައްކަވަމުން، ޑރ. ކަޔާލީ ވިދާޅުވީ، މި ކާއިނާތުގައި ދެ ވައްތަރެއްގެ ހަކަތައެއް ވާކަމަށެވެ. އެއް ވައްތަރަކީ، ފަހި ހަކަތަ އެވެ. އަނެއް ވައްތަރަކީ، އިދި ހަކަތަ އެވެ. ފަހި ހަކަތަ އަކީ، މަލާއިކަތްބޭކަލުންނާ ގުޅިފައިވާ ހަކަތަ އެވެ.
އެބޭކަލުން ދުނިޔެއަށް ފައިބާވަޑައިގަންނަވަނީ ފަހި ހަކަތައާއިގެންނެވެ. އިދި ހަކަތައަކީ، ޝައިޠާނުންނާ ގުޅިފައިވާ ހަކަތަ އެވެ. ޝައިޠާނުންގެ ކިބައިން މީހުންނަށް ލިބެނީ އެ ހަކަތަ އެވެ. ޑރ. ކަޔާލީ ވިދާޅުވި ގޮތުގައި، މީހަކު ކީރިތި ޤުރުއާނާ ދުރުވެއްޖެނަމަ، އެމީހަކާ ޝައިޠާނުން ގާތްވާނެ އެވެ. ޝައިޠާނުންގެ ކިބައިން މީހުންނަށް ލިބޭ އިދި ހަކަތައަކީ ނުބައި ހަކަތައެކެވެ.
ކީރިތި ޤުރުއާނަކީ، ހަކަތައިގެ މަޞްދަރެއްކަން ޑރ. ކަޔާލީ ހާމަކުރެއްވި އެވެ. މުސްލިމުން ކީރިތި ޤުރުއާން ކިޔަވައި އެފޮތުން ހަކަތަ ލިބިގަންނަން ޖެހެ އެވެ. ކީރިތި ޤުރުއާނުގެ އާރާއި ބާރު ބަޔާންކުރައްވައި، މާތް ﷲ މިސާލުޖައްސަވާފައިވަނީ، މީހުން އެއާމެދު ވިސްނާ ފިކުރުކޮށް، ތެދުމަގުގައި ފައިތިލަ ސާބިތުކުރުމަށްޓަކަ އެވެ.
ޑރ. ކަޔާލީ އަކީ، ޤުރުއާނާއި ސައިންސްގެ ރޮނގުން ޚިދުމަތްތަކެއް ކުރައްވާފައިވާ ސައިންޓިސްޓެކެވެ. އޭނާގެ ޢިލްމީ ޙަޔާތް ފަށްޓަވާފައިވަނީ، އާކިޓެކްޗަރަލް އިންޖިނިއަރެއްގެ ގޮތުގަ އެވެ. އެއަށްފަހު، ހިސާބާއި، ފިޒިކްސް އާއި، ކެމިސްޓްރީގެ ރޮގުން މަތީ ތަޢުލީމުގެ ހަރުފަތްތައް ގިރާކުރެއްވި އެވެ.
ކީރިތި ޤުރުއާން ދިރާސާކުރެއްވުމުގައި އޭނާވަނީ ތިރީސް އަހަރު ހޭދަކުރައްވާފަ އެވެ. އަދި 10 މުޖައްލަދުގެ މައްޗަށް އެކުލެވޭ، ކީރިތި ޤުރުއާނުގެ ޢިލްމީ އެކުމާފާނެއް ވެސް އޭނާވަނީ އެކުލަވައިލައްވާފަ އެވެ.
ޑރ. ކަޔާލީ
| މުޞަންނިފު: | އަލްއުސްތާޛު ޢަބްދުލްމުޢީދު ޙަސަން |
0 comments:
Post a Comment