ބިދުޢަވެރިން

ކޮއިފުޅާއެވެ. ފުރިހަމަ އިސްލާމަކަށް ވަންޏާމު ބިދުޢަވެރިން ދަންނަން ވާނެއެވެ. އެބައިމީހުންނަކީ ކޮންބައެއްކަމާއި އެބައިމީހުންގެ ބޭނުމަކީ ކޮބައިކަމާއި އެބައިމީހުން ބިދުޢަވެރިންނަށް ވީ ކީއްވެކަމާއި މިހިރި މިހިރަ ކަންކަމީ މުސްލިމުންގެ އަހުލުއް ސުންނަތަށް ނިސްބަތްވަންޏާމު ކޮންމެހެންވެސް  ދަންނަން ޖެހޭނެ ކަންކަމެވެ.

 އަދި އެބައިމީހުން އުފެދުނީ ކިހިނެއްކަމާއި އެބައިމީހުން ގޯސްވަނީ ކޮން ހިސާބު ހިސާބަކުން ކަމާއި މިހިރީވެސް ހަމަ ނުދަނެ ފަރުނުޖެހޭނެ ކަންކަމެވެ. އެހެންޏާމު އަހަރެމެންނަށް މުސްލިމުންނޭ ކިޔަކަސް މުސްލިމަކަށް ނުވާނެކަމީ ބުއްދިއެއް ހުރި ކޮންމެ މީހަކު ދަންނާނެ ކަންކަންވިއްޔާއެވެ.

ތިމަންނާއަކީ ހަސްފަތާލެއްގެ ދަކުތަރެކޭ ބުންޏަސް ދަކުތަރުކަން ނުކިޔަވާނަމަ އެމީހަކު ދަކުތަރަކަށް ނުވާނޭ ކަމާއި މަސްބާނަން ބުޅިލައިގެން ދޮށިއުކަން ނުދަންނަ މީހަކު ތިމަންނާއަކީ މަސްވެރިޔެކޭ ބުންޏަސް މަސްވެރިޔަކަށް ނުވާނެކަމާއި އަދި ރާވެރިންގެ ދަރިންނަށްވެސް ތިނެތިން އެކަތި އޮވެޔޭ ތިމަންނާވެސް މީ ރާވެރިޔެކޭ ބުންޏަސް ބަޅުވަޅިއާއި އެތާއި ރުކުގެ ހަރުވަކިނުވާނަމަ ރާވެރިޔަކަށް ނުވާނެކަމާއި މިހިރި މިހިރީ އަހަރެމެން ދިވެހިން އެތައް އަހަރެއް ވަންދެން ދަންނަ ކަންކަމެވެ. ކޮޔާއެވެ. ހަމަ އެބީދައިން މީހަކު އައިސް ތިމަންނާއަކީ ޢިލްމުވެރިޔެކޭ ބުންޏަސް އިލްމުވެރިއަކަށް ނުވާނޭކަން ކޮއިވެސް ދަންނަންވާނެއެވެ.

ޝަރަޙައް ސުންނާގައި އިމާމު ބަރްބަހާރީ އެވިދާޅުވަނީތާއެވެ. “މީހަކު މޮޅު ބޮޑު އިލްމުވެރިޔަކަށްވަނީއަކީ ގިނަ ރިވާޔަތްތަކާއި ބޮޑެތި ބޮޑެތި ފޮތްތަކުން ލިޔެގެނެއް ނޫނިއްޔާއެވެ. ނަމަވެސް ޢިލްމުވެރިޔާއަކީ މަދު ޢިލްމާއި އެކުވެސް އެޔަށް ޢަމަލުކޮށް ﷲގެ ފޮތަށާއި އަދި މާތް ފޭތާންބަރު ޞައްލަﷲ ޢަލައިހި ވަސައްލަމަގެ ސުންނަތަށް ޢަމަލުކުރާ މީހާއެވެ. އަދި ދަންނާށެވެ. އޭނާ ކިތަންމެ މޮޅެތި ބޮޑެތި ފޮތްތަކާއި ބޮޑެތި ދަރުސްތަކާއި ރިވާޔަތްތައް ގިނަވެފައިވީ ކަމުގައިވިޔަސް ﷲގެ ފޮތާއި ސުންނަތާއި ޚިލާފުވާނަމަ އެމީހަކީ ބިދުޢަވެރީންގެ ރަތްލާޖެހި ބިދުޢެވެރިއެކެވެ. “

މާތްފޭތާންބާރު ޞަލަވާތާއި ސަލާމުގެ ވެރި ޞައްލަﷲ އަލައިހި ވަސައްލަމަ ހަދީޘްކުރެއްވި ބަސްފުޅުގެ މާނައިގައި އެވަނީތާއެވެ. ” ތިމަންކަލޭގެފާނު ނުގެންނަވާ ކަމެއް ގެނައިމީހަކަށް އެކަމެއްވަނީ ރައްދުކުރެވިގެންނެވެ.” އެހެނީ މިދީން ވަނީ ފުރިހަމަވެފައެވެ. މިދީން ފުރިހަމަކޮށްދެއްވިކަން މާތް ޖައްބާރުވަންތަ އިލާހުގެ ފުރިހަމަ ފޮތުގައި ބަޔާންކޮށްފައި އެއޮތީއެވެ. މިދީނަށް އެހެންމީހަކު އެއްޗެއް އިތުރުކުރާކަށް ނުޖެހެއެވެ. އަދި ކިއެއްހެއްޔެވެ؟ މިއުއްމަތުގެ ފޭތާންބަރު ނަބިއްޔާވަނީ މިކަން ބަޔާންކޮށްދެއްވައި އެމާތް ކަލޭގެފާނުގެ ވަދާޢީ ޚުތުބާގައި އެކަން މީސްތަކުންނަށް އަންގަވައި ސިއްކަޖައްސަވައި ނިންމަވައިފައެވެ.

ނަމަވެސް ބިދުއަވެރިން ދަންނަ ހުއްޓެވެ. އެބައިމީހުން އެމާތް ފޭތާންބަރު ނުގެންނަވާ އެތައްކަމެއް އެތިބަގެން ހުއްދަކުރަނީއެވެ. ހިތްއެދޭހައި ކަމެއް ދީނަށް އިތުރުކުރަނީއެވެ. އެބައިމީހުންގެ ހާލުގެ ދުލުން ބުނާކަހަލައެވެ. ބަލަގަ މާތްފޭތާންބަރު ކަލޭގެފާނަށް ނުކުރެވި ހުރި ހެޔޮކަންތައް ތިމަންނާމެން މިތިބަކުރަނީއެވެ. ތިމަންނާމެން މިއީ ހެޔޮކަމެއްކަން ހޯދީ އަމިއްލައަށޭ، ދެން ތިބޭށޭ އަހަރެމެންގެ ފަތަށް ސަވާބު އިތުރުވާ ކަމެއްކަމުގައި މެނުވީ މިކަން ނުވެއެވެ. އަދިވެސް އެބައިމީހުން ބުނާކަހަލައެވެ. މާތްފޭތާންބަރު ކަލޭގެފާނު ދުނިޔެ ދޫކުރެއްވީ އެކަލޭގެފާނުގެ ރިސާލަތު ފުރިހަމަ ނުކުރައްވައެވެ. 

ތިމަންނަމެން މިކުރާ “މާތް މޮޅެތި ކަންކަން” އެކަލޭގެފާނު އެޔޮތީ ސިއްރުކުރައްވާފައިތާއެވެ. މި ފަދަ ހާލުގެ ދުލުން ބުނާ ބަސްތަކުގެ ނުބައިކަމާއި ޖާހިލުކަމާއެވެ. ކޮޔާއެވެ. މިބައިމީހުންގެ ނުބައިކަންހުރިވަރީ މިބައިމީހުން ނުސީދާކޮށް އެބުނެވެނީ ރަސޫލުﷲގެފާނު އެކަލޭގެފާނުގެ ރިސާލަތަށް ޚިޔާނަތްތެރިވީކަމަށެވެ. ނަޢޫޛުބިﷲ. އަހަރެމެންގެ ދުލާއި އަތްތަކުން މިބިދުޢަވެރީންގެ ކިބައިން ބަރީއަވެގެންވަމެވެ.

އެބައިމީހުންނަކީ މާތްފޭތާންބަރު ކަލޭގެފާނުންގެ އެކުވެރި ޞަހާބީ ބޭކަލުންނަށްވެސް ދުލާއި އަމަލުން ބަދުބަސް ބުނާ މީހުންނެވެ. ފަހެ މާތްވެގެންވާ މަތިވެރިވެގެންވާ ކަލާމްފުޅުގައި ހަތްއުޑުމަތިން މާތްއިލާހު ޞަހާބީންނަށް ޘަނާ ދަންނަވައި، ބަލަގަ އެބައިމީހުންނަށްވަނީ ރުއްސަވައި އެބައިމީހުންގެ އެބައިމީހުންގެ ވެރިރައްބާއި ރުހިގެންވާ މީހުންކަމަށް އެއޮތީ އަންގަވާފަތާއެވެ. ނަމަވެސް ބިދުޢަވެރިން ބުނާހުށީ ބަލަ އެމީހުންނީ ވެސް އަހަރެމެންހެން ދެކަމު ހާޖަތަށް ދާ އިންސާނުން ކަމަށެވެ.

 މިބައިމީހުން ބޭނުންހާ ގޮތަކަށް ދީންބަދަލުކުރަން ބުނާ މިބަހުގެ ނުބައިކަމާއެވެ. މިހެން މިބައިމީހުން ބުނަނީ އަޞްޙާބު ބޭކަލުންކުރެއްވި ކަންތައްތައް ގޯސްކުރުމަށްޓަކައެވެ. ނުވަތަ މިބައިމީހުން ހިތުހުރިހާ ގޮތަކަށް ދީނުގެ ޙުކުމްތައް އަނބުރައި މޮޑޭށެވެ. ހެޔޮވާނެހޭ، ހެޔޮނުވާނެއެވެ. މިބައިމީހުންގެ ކިބައިން އަހަރެމެންގެ ދުލާއި އަތްތަކުން އަދި މުޅި ޖިސްމުތަކުން ބަރީއަވެގެންވާ ވަރުގަދަ ބަރީއަވުމަކުން ބަރީއަވަމެވެ.

ނަމަވެސް މީހަކު ހައިރާނުން އަންތަރީސް ނުވަނީ ފަހެ ކީއްވެތޯއެވެ؟ މިބައިމީހުންގެ މަޅިތަކަކީ ޝައިތާނާގެ މަޅިތަކެވެ. އެހެނީ ޝައިތާނާ އެންމެ ފުރަތަމަ އަހުލުއް ސުންނަތުގެ މީހުން ވައްޓާލަން މަސައްކަތްކުރާހުށީ ޝިރުކާއި ކުފުރުގެ އަނދަވަޅަށެވެ. އެވަރުން ނުވިއްޔާ ބޮޑެތި ނުބައިވެގެންވާ ބިދުޢަތަކުގެ މަޅިގަނޑަށެވެ. އެވަރުން ނުވިއްޔާ އިއުތިޤާދާއި މާތް ފޭތާންބަރު މުހައްމަދު ޞައްލަﷲ ޢަލައިހި ވަސައްލަމައަށް ތަބަޢަނުވުމުގެ ބިދުޢައާއި އަދި އެމާތް ފޭތާންބަރުގެ ޞަޙާބީންނަށް ތަބަޢަނުވުމުގެ ބިދުޢައިގެ މަޅިގަނޑަށެވެ. ދެންފަހެން އެއިން ދޮރަކުން މަގެއްނުފެނުނުނަމަ ބޮޑެތި ފާފަތަކުގެ އަނދަވަޅަށެވެ.

 އެވަރުންވެސް އޭނާއަށް މަގެއްނުފެނުނުނަމަ ކުދި ފާފަތަކުގެ މަޅިގަނޑަށެވެ. އެވަރުންވެސް ނުވިނަމަ ހުއްދަ އަރާމުތައް ކަމަށްވާ ނިދުންފަދަ ކަންކަމުގައި ގިނަކޮށް ދިގުދަންމައި ހެޔޮޢަމަލުތަކުން ދުރުކުރުމުގެ މަޅިގަނޑުގައި ޖައްސައެވެ. އެވަރުންވެސް ނުވީނަމަ ހެޔޮބޮޑެތި ކަންކަމަށްވުރެ އެޔަށްވުރެ ދަށްކަމަށް ހިތްޖައްސުވައި ހަދައެވެ. އެވަރުންވެސް ނުވީނަމަ ޖިންނީންނާއި އަދި އިންސީންގެ ތެރެއިންވާ ޝައިތާނުން އޭނާގެ މައްޗަށް ފާކުރުވައެވެ.

އެހެނީ ކީރިތިމޫރިތި ހަތްއުޑު މަތިން ބާވާލެއްވި އެންމެ ފަހު ސޫރަތުގެ އެންމެ ފަހު އާޔަތުގައިވަނީ މިބައިމީހުންގެ ކިބައިން ރައްކާތެރިވުމަށް އެދިއެވެ. މިއާޔަތުން އިންސާނުންގެ ތެރެއިންވެސް ޝައިތާނުން ވާނެކަމަށް ދަލީލުކުރެއެވެ. އެމީހާއަކީ މޮޅު ޑޮކްޓަރެއްކަމުގެ ސިފަ ޖެހިގެން އައިސްފާހުއްޓެވެ. ނޫނީ މޮޅު ޢިލްމުވެރިއެއްގެ ސިފައިގައި ނޫނީ އިންޖިނޭރެއްގެ ސިފައިގައި ނޫނީ ވެބް ޑިޒައިނަރެއްގެ ސިފައިގައިވެސް އައިސްފާހުއްޓެވެ.

 ނޫނީ ވެބްސައިޓެއްގެ އެޑިޓަރުކަމުގައި ނުވަތަ ބުލޮގަރެއްގެ ސޫރައިގައިވެސް އައިސްފާ ހުއްޓެވެ. މޮޅު ޅެންވެރިޔެއްކަމުގައިވެސް ވެދާހުއްޓެވެ. ނޫނީ ސިޔާސީ ޖަމާޢަތެއްގެ ޗެއަރޕާސަން ނުވަތަ ޒަޢީމުކަމުގައިވެސް ވެދާހުއްޓެވެ. ނޫނީ ބޮޑުގެ ޤަބީލާއެއްގެ ދިހަބާރަ އައްޑިހަ ޖަމާޢަތުގެ އިމާމަކަށްވެސް ވެދާހުއްޓެވެ.

ނަމަވެސް މިބައިމީހުންގެ ހެދުންތައް ކިތަންމެ ހުދުނަމަވެސް ކަޅުއިސްތަށިތަކުގެ ތެރެއިން ހުދުއިސްތަށި ފާޅުވާހެން މިބައިމީހުންފާޅުވާނެތެވެ. ސަބަބަކީ މިބައިމީހުންނަކީ ބިދުޢަވެރިންކަމުގައި ވީތީއެވެ. އެބައިމީހުން ލޯބިކުރާހުށީ ބިދުޢަވެރިންގެ މަޖިލިސްތަކަށެވެ.

 އެބައިމީހުންގެ ބަސްތަކަށެވެ. ދިވެހި ހަރުބަހެއްގައިވާހެން ލަނޑަޔާ ވާނީ ލަނޑަޔާއަށް ނޫންތޯއެވެ؟ މިބައިމީހުން ލޯބިކުރާ ހުށީ ބިދުޢަވެރިން ފަސްބަޔަށެވެ. އެލިގެން ތިބޭނީ އެފަސްބައިތަކުގައެވެ. ޢަރަބި ހަރުބަހެއްގައި ބުނާހެން އެކަންވާރަކުން ތިކިޖަހާނީ އެކަންވާރުގައި ހުރި އެއްޗެކެވެ.

 ހަމަ އެފަދައިން މިބައިމީހުންގެ ކިބައިން ފާޅުވާހުށީވެސް ބިދުޢަވެރިންގެ ބިދުޢަތަކެވެ. އެބައިމީހުންގެ ކަންވާރުތަކުން ތިކިޖަހާނީ ބިދުޢައިގެ ތިއްކެވެ. ރޮއިހޭރޭނީ މާތްފޭތާންބަރުގެ ސުންނަތާއި ޞަޙާބީންގެ މަގުދޫކޮށް އެބައިމީހުންގެ އިމާމުން ހިމާޔަތް ކުރުމަށެވެ. އެފަދަ މީހުންގެ ކިބައިން އަޅުގަނޑުމެން ސަލާމަތްވުމުގެ ތައުފީޤުދެއްވާށިއެވެ. އާމީން.

ކޮޔާއެވެ. ކުޑަކޮށްނަމަވެސް އެބައިމީހުންނާއި ބެހޭގޮތުން އެއްޗެއް އަންގައިދެވުނު ކަމުގެ އުއްމީދުގައި އެބައިމީހުންގެ ނުބައިކަމުން ޢާލަމްތަކުގެ ވެރިއިލާހުގެ ޙަޟްރަތުން ރައްކާތެރިކަމަށް އެދޭ ހިނދު، ދުޢާކުރާ ހާލު މިލިޔުން ކުރުކޮށްލީމެވެ. ބިދުޢަވެރިންގެ ވާހަކައިގެން އެހެންލިޔުމަކުން އަޅަމެންގެ ވެރިއިލާހުގެ ހެޔޮރަޙުމަތާއެކުގައި ބައްދަލުކުރެވޭނެ ކަމުގެ އުއްމީދު ކުރާ ހާލުގައެވެ.

 އޭ ހައްދަވައި ގެންގުޅުއްވައި ބައްލަވައި ވޮޑިގެންވާ އިލާހެވެ. މިބައިމީހުންނަށް ތެދުމަގު ދައްކަވާށިއެވެ. ނުވަތަ އެބައިމީހުން ބޮޑުވެގެންވާ ފަޟީހަތްކުރެއްވުމަކުން ފަޟީހަތްކުރައްވައި އިބައިލާހަށް ނިޔަތް ޚާލިސްކުރާ މީހުންގެ ހިތްތަކަށް ހިތްހަމަ ޖެހުން ދެއްވާ އެފަދަ މީހުންގެ ތެރޭގައި އަޅުގަނޑުމެން ނުލައްވާށިއެވެ. އާމީން

ޞަލާވާތާއި ސަލާމް ލެއްވުން އެދި ދުޢާކުރަމުން ޢާލަމްތަކުގެ ވެރިއިލާހަށް ހަމްދުކުރަމުން ލިޔުން ނިންމާލަމެވެ.

ތަފްސީރުލް ޢުޝުރިލް އަޚީރި. ދިވެހި ތަރުޖަމާ: ޝެއިޚު ބަކުރުބެ ހިންނަވަރީ