އައްޑޫގައި ހުރި ބުދު ޕާކިސްތާން މޮނިޔުމެންޓްގައި ބަޔަކު ރޭ ދަންވަރު ރޯކޮށްލައިފި

އައްޑޫ ސިޓީގެ ހިތަދޫގައި ބަހައްޓާފައިވާ ޕާކިސްތާން މޮނިޔުމެންޓްގައި ކޮންބައެއްކަން ނޭންގޭ ބަޔަކު ރޭ ދަންވަރު 02:15 ހާއިރު ރޯކޮށްލާފިއެވެ. މަންޒަރުދުށް ފަރާތްތަކުން ހާމަ ކޮށްފައިވާ ގޮތުގައި މޮނިޔުމެންޓް ތަކުގައި ރޯކޮށްފައިވަނީ ސާފުތެޔޮ އަޅާގެންނެވެ.

 އަދި މޮނިޔުމެންޓްގައި ރޯކޮށްފައިވާތަން ފެނުނު މީހުން ވަނީ ހަމަ ވަގުތުން އެމޮނިޔުމެންޓް ތަކުން އަލިފާން ނިއްވާލާފައެވެ. ނަމަވެސް މޮނިޔުމެންޓްގެ ވަށާ ހުރި ބުދުވަނީ އެދުމުގެ ސަބަބުން ކަޅުވެފައިވާ ކަމަށް މަންޒަރުދުށް ފަރާތުން ދަނީ ހާމަ ކުރަމުންނެވެ.

 މައުލޫމާތު ލިބިފައިވާ ގޮތުގައި މޮނިޔުމެންޓްގައި ރޯކޮށްފައި ހުއްޓާއެކަން އެގުނީ “ޕަވާ ޕާކް” ތެރޭގައި ކޮފީ ބޯން އުޅުނު ސަރުކާރު ހިންގާ އެމްޑީޕީގެ ބަޔަކަށް ކަމަށެވެ. އަދި އެމީހުން ބުނި ގޮތުގައި ރޯކުރި މީހުން ވަނީ ރޯކުރުމަށް ފަހު ފިލާފަ ކަމަށެވެ.

 އަދި އަލިފާން ނިއްވި މީހުން ބުނިގޮތުގައި ކާފަރުން އަޅުކަން ކުރަން ބޭނުންކުރާ ކަހަލަ ތަފާތު 5 މޮނިޔުމެންޓްއެއް ވަނީ ވަގަށް ނަގާފަކަމަށެވެ. އަދި އެ މޮނިޔުމެންޓް ތަކުގެ ތެރެއިން 1 މޮނިޔުމެންޓް ވަގަށް ނަގާފައި ވަނީ ބެހެއްޓި ރޭކަމަށް އެމީހުން ބުނެފައިވެއެވެ.

 މައުލޫމާތު ލިބިފައިވާ ގޮތުގައި މޮނިޔުމެންޓްގައި ރޯކޮށްފައިވަނީ އެ މޮނިޔުމެންޓް ބެހެއްޓުމާއި ދެކޮޅަށް ބަޔަކު ނިކުމެ މުޒާހަރާ ކުރުމުން އެ ނެގުމަށްފަހު އަލުން ބަހައްޓާފައިވަނިކޮށް ބަޔަކު ނުކުމެ އެ މޮނިޔުމެންޓް ވައްޓާލުމުން ފުލުހުންގެ ހިމާޔަތުގައި ޕާކިސްތާންގެ ބޮޑު ވަޒީރު ރަސްމީކޮށް އެމޮނިޔުމެންޓް ބެހެއްޓެވިތާ 4 ދުވަސް ފަހުންކަމަށެވެ. 

އޭގެ ފަހުން ހުކުރު ދުވަހުގެ ރެޔާއި ހަމައަށް ފުލުހުން މޮނިޔުމެންޓްތައް ކާރީގައި ސެކިއުރިޓީ ބަލަހައްޓަމުން ދިޔަކަމުގައި ވިޔަސް ހޮނިހިރު ދުވަހުގެ ރެއިންފެށިގެން ފުލުހުން އެސަރަހައްދުގައި ހަރަކާތްތެރި ނުވާކަމަށް ފުލުން ވަނީ ހާމަކޮށްފައެވެ.

އަދި މިހާރު ފުލުންދަނީ މޮނިޔުމެންޓް ތަކުގައި ރޯކޮށްލި ކަމަށް ބުނާމީހުން ހޯދުމަށް ތަހުގީގަށް ބޭނުންވާ ހެކި ހޯދުމުގެ ގޮތުން އެސަރަހައްދުގައި މަސަކަތް ކުރަމުންނެވެ.