ބައްޕައަށް ތެދުމަގު ލިބުނީ ލޯފަން ދަރިފުޅުގެ ސަބަބުންނެވެ.

ހަމަ ހިމޭން މެންދަމުގައި އެންމެން ނިދާ އިރު، ޔާމީން އާއި އޭނާގެ ގްރޫޕް ގެންދަނީ ސަކަރާތާއި މަޖާ ނެގުމުގައެވެ. އެމަޖަލުގެ ތެރޭގައި ޔާމީނަކީ ލީޑަރެވެ. ގިނަ ފަހަރު އޮންނަނީ ކޮންމެވެސް ބަޔަކަށް މަލާމާތް ކުރުމެވެ. އެކި މީސްމީހުންގެ އަޑުން ވާހަކަ ދެއްކުމާއި އެމީޙުން ހިނގާ ގޮތްގޮތަށް ހިނގާ ހެދުމުގައި ޔާމީނަކީ ކުޅަދާނަ މާހިރެކެވެ. އޭނާ ކުރާ ކަންތަކަށް އެންމެން ތިބޭނީ ހީހީ ބަލިވާ ވަރުވެފައެވެ.


 މިކުރެވެނީ ކީއްކަން ނޭނގި މީހުންނަށް ފުރައްސާރަ ކުރުމާއި ޣީބަ ބުނުމުގައި ވަގުތު ހޭދަކުރަމުން ދެއެވެ. ފަތިހު ހަތަރެއް ޖެހުމުން ޔާމީންގެ ގްރޫޕަށް ނިދާ ގަޑި ޖެހުނީއެވެ. ގިނަރޭރޭ ނިދޭއިރު ފަތިސް ނަމާދުގެ ބަންގި ގޮވާނެއެވެ. ބަންގި އެއީ ޔާމީނަށް ވަރަށް ބީރަށްޓެހި އަޑެކެވެ.

ހެނދުނު ހޭލވޭނީ އަންހެނުން އެތައް ފަހަރަކު ގޮވާ ފަހުންނެވެ. އޭރު އަންހެނުން ހުންނަނީ ސައި ތައްޔާރުކޮށްފައެވެ. އަންހެނުން ބަނޑުބޮޑުވެ އިނޭ ކިޔާފައި ޔާމީންގެ ފަރާތަކުން އަޅާލުމެއް ނުލިބެއެވެ. އޭގެ ބަދަލުގައި އަންހެނުންގެ ކަމަކީ ޔާމީނަށް މާތްﷲ ތެދުމަގު ދައްކަވާތޯ ދުޢާ ކުރުމެވެ. ހެނދުނު މަސައްކަތަށް ދާން ނިކުންނަ ގޮތަށް ގިނަ ފަހަރަށް ޔާމީނަށް ގެއަށް އާދެވޭނީ ފަތިހު ނިދުމަށެވެ.

ޔާމީން ގްރޫޕް އެންމެން ރޭގަނޑު ހިނގަމުން ދިޔައީ މާރުކޭޓް ސަރަޙައްދަށެވެ. އެހިސާބުން ވަރަށްގިނަ ފަޤީރުންނާ ނުކުޅެދޭ މީޙުންނާ ދިމާވިއެވެ. އެމީޙުން ސަލާންޖަހައިފިނަމަ ޔާމީން އެމީހުންނަށް އެތައް ވައްތަރެއް ޖައްސައެވެ. އެއްދުވަހަކު ދިމާވި މުސްކުޅި ލޯފަން މީހަކު އެހީއަކަށް އެދި އަތްދިށްކޮށްލުމުން އެތައް މަލާމާތެއް ކުރިއެވެ. އަދި އެހިސާބުން ފެނުނު މުސްކުޅި ކޮރު މީހަކު ހިނގާގޮތަށް ރަޙްމަތްތެރީން ކުރިމަތީ ހިނގާ އެމީހުން ހެއްވަމުން ދިޔައެވެ.  

އެގޮތުގައި މަޖާ ކުރުމުގައި ދުވަސްތައް ވޭތު ކުރަމުން ދިޔައިރު އަންހެނުން ވިހެއުމުގެ ވަގުތު އައިސް ކައިރި ވަމުން އާދެއެވެ.ޔާމީންގެ އަތުގައި އެއްވެސް އެއްޗެއް އެދުވަހަށް ރައްކާ ކުރެވިފައެއް ވެސް ނެތެވެ. ޔާމީންގެ އަންހެނުން އެކަމާ އެއްޗެކޭ ބުނާއިރަށް އަދި ވަގުތު އެބައޮތޭ ބުނެ ހަމަޖައްސާލައެވެ.

އެއްރޭ ރޭގަނޑު ޔާމީން ނިދަން އައީ ތަންކޮޅެއް އަވަހަށެވެ. އޭރު އަންހެނުން ބަނޑުގައި ރިއްސާތީ ތެޅި ފޮޅެނީއެވެ. އަވަހަށް ނިދަން އައިރޭ ހޮސްޕިޓަލަށް އަންހެނުން ގޮވައިގެން ދާންޖެހުމުން ޔާމީން ހުރީ ފާޑަކަށް ރުޅި އައިސްފައެވެ. އެހެންނަމަވެސް ހޮސްޕިޓަލަށް ދިއުމަށް އަވަސްވެ ގަތެވެ. ވިއްސާ ކޮޓަރިއަށް އަންހެނުން ވެއްދުމަށްފަހު އެތައް ގަޑި އިރެއްވީއިރުވެސް އަންހެނުން ނުނެރުމުން ޔާމީން ކަންބޮޑުވާން ފަށައިފިއެވެ.
  
 އަދި ނިދި އަންނަން ފެށުމުން ކަމެއް ދިމާވުމުން ގުޅާލުމަށް ބުނެ ގެއަށް ގޮސް ނިދަން އޮށޯތެވެ. އޭގެ ދެގަޑިއިރު ފަހުން ހޮސްޕިޓަލުން ޔާމީންށް ގުޅުމުން އަވަސް އަވަހަށް ދިޔައެވެ. އެވަގުތު އަންހެނުންނާ ދަރިފުޅު ދެކިލުމަށް ޔާމީން ބޭނުންވިއެވެ. ނަމަވެސް ނަރުސް ކުދީން ބުނީ ފުރަތަމަ ޑޮކްޓަރ އާއި ބައްދަލު ކުރުމަށެވެ. ކުދި ކިޔަމުން ގޮސް ޑޮކްޓަރ އާއި ބައްދަލު ކުރީ އެނޫން އެހެން ގޮތެއް ނެތުމުންނެވެ.

ޑޮކްޓަރ ނަޞޭޙަތް ދޭން ފެށުމުން ޔާމީނަށް ކޮންމެވެސް ކަމެއް ގޯސްވެއްޖެ ކަމުގެ އިޙްސާސް ކުރެވެން ފެށިއެވެ. އެވަގުތު ޑޮކްޓަރ ބުނުއްވީ ޔާމީންގެ ދަރިފުޅަކީ ލޮލުގެ ފެނުމުން މަޙްރޫމް ވެފައިވާ ކުއްޖެއްކަށެވެ. ޑޮކްޓަރ އެހެން ބުނުމާއިއެކު ޔާމީންގެ ޚިޔާލަށް އައީ ކުރީ ދުވަހު ލޯފަންމީހަކަށް ކުރެވުނު މަލާމާތެވެ. ﷲގެ ކުޅަދުން ވަންތަ ވެރިކަން ދެކިބަލާށެވެ. އެހެން މީހުންނަށް މަލާމާތް ކުރުމުގައި މުޅި ޢުމުރު ހޭދަކުރި މީހާގެ އަލަތު ދަރިފުޅު އުފަންވީ ނުކުޅެދޭ ކުއްޖެއްގެ ގޮތުގައެވެ. ޔާމީން އަންހެނުންގެ ގާތަށް ދިޔައީ މާޔޫސް ކަމާއި އެކުއެވެ. އަދި ދަރިފުޅާމެދު ހިތްހަމަ ނުޖެހި ހުރެގެންނެވެ. އެކަމަކު އޭނާގެ އަންހެނުން އެދަރިފުޅު ލިބުމުން ކޮންމެ ކަހަލަ އައިބެއް ހުރި ކަމުގައި ވިއަސް އޮތީ ވަރަށް ހިތްހަމަ ޖެހިފާ ކަން ބަލާލުމުން ދޭހަވެއެވެ.


އޭގެ ދެދުވަސް ފަހުން ޔާމީންގެ އަންހެނުން ގެއަށް ގެނެވުނެވެ. ޔާމީން އެއްގޮތަކަށްވެސް އެދަރިފުޅާއި ކައިރިއެއް ނުވެއެވެ. އަދި އެދަރިފުޅު އުރާލައެއްވެސް ނުހަދައެވެ. އަންހެނުން އެތައް ވާހަކައެއް ދެއްކި ކަމުގައި ވިއަސް ޔާމީން ދެނީ ބީރު ކަންފަތެކެވެ. ދަރިފުޅަށް ނަން ކީ ދުވަހުވެސް ކިޔާނެ ނަމަކާއި މެދު އަންހެނުން މަޝްވަރާއަށް އެދުމުން ޔާމީން އަޅައެއް ނުލިއެވެ. ޔާމީންގެ އަންހެނުން އެދަރިފުޅަށް ދިން ނަމަކީ ދާއިން އެވެ. ދާއިން ބޮޑުވަމުން އައީ ބައްޕަ ހުރެ ބައްޕައެއްގެ ލޯބިން މަޙްރޫމް ވެގެންނެވެ. ދާއިން ރޯން ފެށިއަސް ޔާމީން އޭނާ އުރާލައެއް ނުހަދައެވެ. ޔާމީންގެ އަންހެނުން ފަހަކަށް އައިސް ބަލަނީ އެދަރިފުޅު ޔާމީން އާއި ދުރުގައި ގެންގުޅެވޭތޯއެވެ. ޔާމިންގެ އަންހެނުން އޭނާގެ ދަރިފުޅު ދެކެ ވަރަށް ލޯބިވއެއެވެ.

ދާއިން އަށް އެއްއަހަރު ވީއިރު ކުޑަކޮށް ހިނގަން ފަށައިފިއެވެ. ހިނގުމުގައިވެސް ކޮރުގޮތެއް ހުރެއެވެ. އެއްދުވަހު ޔާމީން ގެއަށް އައިސް ވަންއިރު ދާއިން ހިނގަމުން ދަނިކޮށް ފެނުމުން ޔާމީންގެ ޚިޔާލަށް އައީ މާރުކޭޓަށް ދިޔަ ދުވަހު އެތަނުން ފެނުނު ކޮރު މީހާއަށް ޖެއްސުނު ވައްތަރެވެ. އެހުރިހާ ކަމެއް އޭނާގެ ދަރިފުޅަށް ވާރުތަވެފައި ވަނީ އެބައްޕަގެ ނުބައި ނުލަފާ ކަމުންނޭ އެވަގުތު ހިތަށް އެރިއެވެ. ހަމައެވަގުތު ދަރިފޅު އުރާލާ ލޯބިކޮށްލާ ހިތްވިއެވެ. ދާއިން އުރާލަން ގޮސް ބައްޕަ ކައިރިއަށް އަންނާށޭ ބުނުމުން ދާއިން ބާރަށް ރޯންފެށިއެވެ. 

އަދި ބައްޕަ ދެކެ ބިރު ގަންނަ ކަހަލަ ގޮތަކަށް އޭނަޔާ ދުރަށް ދާށޭ ބުނަމުން ދިޔައެވެ. ޔާމީންވީ ދެރައިން ދުރަށް ދިޔައެވެ. 

އަދި އެކުޑަ ކުޑަ ދަރިފުޅަށް ދޭންވާ ލޯބި ނުދެވުނު ކަން ހިތަށް އަރާ ލޮލުން ކަރުނަ އަންނަން ފެށިއެވެ. ދާއިން އަށް އޭނާގެ މަންމަގެ ލޯބި ފުދެއެވެ. ޔާމީންގެ އުޅުމަށް ބަދަލު އަންނަން ފެށީ އޭގެ ފަހުންނެވެ. މިހާރު ޔާމީން ގިނަވަގުތު ގޭގައި އުޅެއެވެ. އަންހެނުންނަށް އަލާލައެވެ. ދާއިން އުޅޭ ނޫޅޭގޮތް ދުރު ދުރުން ބަލަމުން ގެންދެއެވެ. އެގޮތުގައި ދުވަސްތައް ހޭދަވަމުން ދިޔައިރު ޔާމީންގެ ޢާއިލާއަށް އިތުރު ދެކުދީންވެސް ލިބިއްޖެއެވެ. ޢާއިލާގައި ތިންކުދީން ތިބޭއިރު އަނެއް ދެކުދީން ދެކެ ލޯބިވާ ފަދައިން ދާއިން ދެކެވެސް ލޯބިވެވޭތޯ ޔާމީން މަސައްކަތް ކުރެއެވެ. އެކަމަކު އެދެކުދީންނާ ދާއިންއާ ތަފާތު ކުރެވެނީ އެދަރިފުޅު ނުކުޅެދޭ ކުއްޖަކަށް ވެފއި ވާތީއެވެ.

ޢީދު ދުވަހަށް ގޭތެރެ ތައްޔާރު ވަމުން ދަނީއެވެ. ގޭތެރެ ޒީނަތްތެރި ކުރުމުގައި މަންމައާއިއެކު ކުޑަކުޑަ ތިން ކުދީން މަސައްކަތް ކުރަމުން ދެއެވެ. ހަވީރުވުމުން ޔާމީންވެސް ގެއަށް އަތުވެއްޖެއެވެ. އެމީހުން ކުރަމުންދާ މަސައްކަތުގައި ޔާމީން ބައިވެރިވަމުން ދިޔަ ނަމަވެސް ޔާމީންގެ ނަޒަރު ހުއްޓިފައިވަނީ ދާއިން ކުރާ މަސައްކަތަށެވެ. ލޮލަށް ނުފެންނަ ކުއްޖެކޭ ބަލާބެލުމަށް މީހަކު ނުވެސް ނުބުނާއެވެ. އެހާވެސް ރީތިކޮށް ކޮންމެ ކަމެއް ކުރުމުގެ ކުޅަދާނަކަން އެކުޑަކުޑަ ދާއިން އަށް ލިބިފައިވެއެވެ.

އެއްދުވަހެއްގެ މެންދުރު ވަގުތެވެ. ޔާމީން ފެންވަރާ ރީތިވެލައިގެންނިކުތީ ބޭރަށް ދިއުމަށެވެ. ޗުއްޓީ ދުވަހަކަށް ވާތީ ރައްޓެހީންނާ ބައްދަލު ކޮށްލުމަށެވެ. ބޭރަށް ނިކުންނަށް އެޅި ފިޔަވަޅަށް ހުއްޓުމެއް ގެނުވީ ދާއިންގެ ރުއިމުގެ އަޑަށެވެ. އެހާ ބާރަށް ދާއިން ރޯނީ ކޮންމެވެސް ބޮޑު ކަމެއް ވެގެންނޭ ޔާމީންގެ ހިތަށް އެރިއެވެ. އަދި އަންހެނުން ފެންނަން ނެތުމުން ދާއިން ކައިރިއަށް ދިޔައެވެ. 

އެވަގުތުވެސް ދާއިން ބޭނުންވީ އޭނާގެ ބައްޕައާއި ދުރަށް ދާށެވެ. އެހެން ނަމަވެސް މިފަހަރު ޔާމީން އެތައް ވާހަކައެއް ދައްކައިގެން ދާއިން ރޯ ސަބަބު އޮޅުން ފިލުވިއެވެ. ދިހަ އަހަރުގެ ކުޑަކުޑަ ދާއިން ރޮނީ މެންދުރު ނަމާދު ވަގުތަށް މިސްކިތަށް ނުދެވޭތީއެވެ. އޭނާގެ ކޮއްކޮ އަދިވެސް ސްކޫލުން ނާންނަ ކަމުގައި ބުންޏެވެ. މިއަދު މިސްކިތަށް ބައްޕަ އާއި އެކު ދިއުމަށް އެދުމުން ހައިރާންވެފައި ކުޑަކުޑަ ދާއިން ހުރީ އޭނާގެ ބައްޕަ ދުވަހަކުވެސް ނަމާދަކަށް ނުދާ ކަން އެނގޭތީއެވެ.

އެދުވަހު ފުރަތަމަ ފަހަރަށް ޔާމީން އާއިއެކު ދާއިން މިސްކިތަށް ދިޔައެވެ. ދާއިން ބޭނުންވަނީ ފުރަތަމަ ސަފުން ޖާގަ ހޯދުން ކަމުގައި ބުނުމުން އެދުވަހު ޔާމީން އެކަންވެސް ކޮށްދިނެވެ. ނަމާދުކޮށް ނިމުނުއިރު ޔާމީން ހުރީ ބުނާނޭ އެއްޗެއް ނޭނގިފައެވެ. އޭނާގެ ނުކުޅެދޭ ދަރިފުޅު ބައްޕަ އަށް ވުރެ ދީނުގެ ކަންތައްތަކަށް މޮޅުކަން މިއަދު އޭނާއަށް އެނގުނެވެ. ޔާމީން ނަމާދު ނުކުރާތާ އެތައް ޒަމާނެއް ފާއިތުވެ ގޮސްފައިވާތީ ނަމާދުގައި ކިޔާ ތަކެތިވެސް ވަނީ ހަނދާން ނެތިފައެވެ.   

ނަމާދުކޮށް ނިމުމުން މިސްކިތަށް އައި އެތައް ބަޔަކު ދާއިން އާ ސަލާމް ކުރާ މަންޒަރު އޭނާގެ ބައްޕަ މިއަދު ބަލަމުން ދިޔައީ ހައިރާންވެ އަންތަރީސްވެ ހުރެއެވެ. އެންމެން ދިއުމުން ދާއިން އެދުނީ ޚަތިމެއް ގެނެސް ދިނުމަށެވެ. ޔާމީން ހިތަށް އެރިއެވެ. އަހަރެންގެ ދަރިފުޅު ލޮލަށް ނުފެންނައިރު މުސްޙަފް ގެންނަން މިބުނަނީ ކިއްވެބާއެވެ؟ މަޑުމަޑުން ގޮސް މުޞްޙަފް ގެނެސް ދިނުމުން ކަހަފް ސޫރަތް ހުޅުވުމަށް ދާއިން އެދުނެވެ. ވަރަށް އުނދަގުލުން ޔާމީން ކަހަފް ސޫރަތް ހޯދިއެވެ. އެވަގުތު ދާއިން އެދުނީ އޭނާ ކިޔަވާއިރު އެސޫރަތް ކިޔަވަނީ ރަނގަޅަށްތޯ ބެލުމަށެވެ.
 
އެއަށްފަހު ކަހަފް ސޫރަތް ދާއިން ކިޔެވިއެވެ. " ޔާ ﷲ " އޭ ޔާމީން އަށް ބުނެވުނެވެ. އަދި ލޮލުން އެއްވެސް އިޚްތިޔާރެއްނެތި ކަރުނަ އޮހޮރެން ފެށިއެވެ. ލޮލަށް ނުފެންނަ ދަރިފުޅަށް ވުރެ ޔާމީންގެ ލޯކަނުވެފައިވާ ކަމުގައި އޭނާއަށް ހީވިއެވެ. އެދަރިފުޅަކީ ކިހައި މާތް ކުއްޖެއް ހެއްޔެވެ؟ ފަސްވަގުތު ނަމާދުކޮށް ކީރިތި ޤުރުއާން ކިޔެވުމުގައި ދެމިހުރި މިކުޑަ ކުއްޖާ އޭނާގެ ބައްޕައަށް ހެޔޮމަގު ދައްކައި ދީފިއެވެ.

ނަމާދު ކުރުމަށް އާދަވެފައި ނުވާ ޔާމީން އަށް ފަސްވަގުތު ނަމާދު ކުރުމަށް ޢަޒުމް ކަނޑައެޅިއެވެ. ދަރިފުޅުގެ ފަރާތުން ފެނުނު އެތައް ކަންތައް ތަކެއްގެ ސަބަބުން ބައްޕައަށް ތެދުމަގު ފެނި ދާއިން އަކީ ދިރިއުޅުމުގެ އެންމެ ޚާއްޞަ ފަރާތަށް ވެއްޖެއެވެ. ދާއިން ނުފެންނަ ހިސާބަށް ދިއުމަކީ ދަތި އުނަދަގޫ ކަމަކަށް ވެއްޖެއެވެ. އަދި މިހާރު އޭނާގެ ވިޔާނުދާ ރައްޓެހީންނާއި އެކީ އުޅުމުގެ ޚިޔާލު ދުކޮށްލައިފިއެވެ. ޔާމީންގެ އަންހެނުންވެސް ޔާމީނަށް އައި ހެޔޮ ބަދަލާމެދު ﷲގެ ކިބަފުޅަށް ޝުކުރު ކުރިއެވެ. މިހާރު ޔާމީނަކީ ދީނީ ޖަމާޢަތެއްގެ އިސް ފަރާތަކަށް ވެއްޖެއެވެ.

   އެއްފަހަރަކު ރާއްޖޭގެ ރަށަކަށް ދީނީ ހޭލުންތެރިކަން ދިނުމުގެ ޕްރޮގްރާމެއްގައި ބައިވެރިވުމަށް ދާންޖެހުނެވެ. އެދުވަހު ޔާމީން އެންމެ ދެރަވީ އޭނާގެ ދެލޮލުގެ ނޫރު ކަމުގައިވާ ދާއިންއާ ވަކިވާން ޖެހުމެވެ. އެހެން ނަމަވެސް ދާއިން ހުރީ ވަރަށް އުފަލުންނެވެ. އޭނާގެ ބައްޕަ ދީނީ ކަމެއްގައި ދިއުމަކީ ދާއިން ވަރަށް އުފާވާ ކަމެއް ކަމުގައި ބުންޏެވެ. އެދަތުރު ކޮންމެ ދުވަހަކު ޔާމީން ގެއަށް ގުޅާފައި އެންމެ ފުރަތަމަ އަހާލަނީ ދާއިންގެ ޙާލެވެ. އަދި އޭނާއަށް އެރަށުގައި ދާއިން ނުފެންނާތީ ރަނގަޅަށް ނުނިދޭ ކަމުގައިވެސް އަންހެނުން ގާތު ބުނެއެވެ.

ތިންމަސް ފަހުން ޔާމީން އެނބުރި ގެއަށް އައިއިރު ގޭތެރެ އޮތީ ވަރަށް ހަމަހިމޭން ކޮށެވެ. އޭނާގެ ދެވަނަ ދަރިފުޅު ފެނުމުން ދާއިން ކޮބައިތޯ އަހާލުމުން ބުނީ ދޮންބެ ހޮސްޕީޓަލަށް ގޮސް ނާންނަ ކަމުގައެވެ. އެވަގުތު ޔާމީން އަށް ހީވީ ބޮލަށް އެނބުރުން އެރިހެންނެވެ. އަވަސް އަވަހަށް އަންހެނުން ހޯދަމުން ދިޔައިރު އަންހެނުން ކޮޓަރީގައި ރޯން އޮތެވެ. ޔާމީން އަށް ކަމެއް ގޯސްވިހެން ހީވެގެން ސުވާލު ކުރުމުން މިއަދު ހެނދުނު ވަގުތެއްގައި ދަރިފުޅު ނިޔާވެއްޖެ ކަމުގައި އަންހެނުން ބުންޏެވެ.

 ޔާމީން ރަށުން ދިޔަތާ މަހެއްގެ ފަހުން ކުޑަކުޑަ ދާއިން އަށް ވަރުގަދަ ހުމެއް ޖެހުނީ ކަމުގައި އަންހެނުން ބުންޏެވެ. އެވަގުތު ޔާމީން އަށް ގިސްލާ ރޮވެން ފެށިއެވެ. އަދި ފައިން ވަރުދޫވެގެން އިށީނދެ އިދެ އެތައް އިރެއް ވަންދެން ރުއިމަށްފަހު އޭނާއަށް ދާއިން ބަލިވެ އުޅޭކަން ނޭންގީ ކީއްވެގެންތޯ ސުވާލު ކުރިއެވެ.

ﷲގެ މަގުގައި ދީނަށްޓަކައި ކުރާ ކަމެއް ހުއްޓުވުމަށް ދާއިން ބޭނުން ނުވާ ކަމުގައި ޔާމީންގެ އަންހެނުން ބުންޏެވެ. އެވަގުތު ޔާމީން އަށް ހީވީ އޭނާގެ މޭގަނޑު ކުދިކުދި ވާހެންނެވެ. އޭނާގެ ލޯބިވާ ދަރިފުޅު ދުނިޔެއިން ވަކިވެ ދިޔައީ ބައްޕައަށް ތެދުމަގު ހޯދާއިދީފައެވެ. ( ނިމުނީ)