ވަކިވުމުގެ އެންމެ ފަހުގެ ހިނދުކޮޅު........

އެ ޤިޔާމަތް ދުވަސް ، އެ ބިރުވެރި ވެގެންވާ މަންޒަރު އައުމުގެ ކުރިން އިންސާނާ އަށް ކުރިމަތިވެގެން އަންނަ ހިނދު ކޮޅެއް އާދެއެވެ. އެ ހިނދު ކޮޅަކީ މި ކެހިވެރި ޖާދުވީ ދުނިޔެއިން ބޮޑުވެގެން ވާ ހިތްދަތި ކަމަކަށް ނޫނީ ބޮޑުވެގެންވާ އުފަލަކަށް އިންސާނާ ގެންދެވޭ ހިނދު ކޮޅެވެ. އެއީ އިންސާނާ އެހެން މަންޒިލަކަށް ގެންދެވޭ ހިނދުކޮޅެވެ. ހިނދުކޮޅުތަކުގެތެރެއިން އަންނަ ބޮޑު ހިނދު ކޮޅެކެވެ. އެ ހިނދުކޮޅަކީ އިންސާނާ ގެ އެންމެ ފަހު ނަޒަރު ހިންގާލާ ހިނދުކޮޅެވެ.


 ލޯބިވާ ދަރިންނަށާއި އަނބިމީހާއަށް ، ލޯބިވާ ބޭބެމެންނަށާއި ކޮއްކޮ މެންނަށް އެންމެ ފަހުގެ ބެލުން ބަލާލާ ހިނދު ކޮޅެވެ. މި ދުނިޔެ އަށް އެންމެ ފަހުގެ ނަޒަރު ހިންގާލާ ހިނދުކޮޅެވެ. މަރުގެ ސަކަރާތުގެ އަސަރު އިންސާނާ ގެ މޫނުމަތިން ފެންނަން ފަށާ ހިނދު ކޮޅެވެ. އިންސާނާ ގެ ހަށިގަނޑު ގެ އަޑިން އެންމެ ފުން މިނުން ހަޅޭކާއި ވޭން ގަދަވާ ހިނދުކޮޅެވެ.

 އެ ހިނދު ކޮޅު އަންނާނެކަން ކާފަރު މީހާ ވެސް ގަބޫލް ކުރެއެވެ. އެންމެ ބޮޑެތި ފާފަވެރިންވެސް އެ ހިނދުކޮޅު އަންނާނެ ކަމާއިމެދު ޝައްކެއް ނުކުރެއެވެ. އެ ހިނދުކޮޅަކީ މިދުނިޔޭގެ އަގެއްނެތް ކަން އެގި ހާމަވާ ހިނދުކޮޅެވެ. އެ ހިނދުކޮޅަކީ އިންސާނާ އަށް މި ދުނިޔޭ ގެ ވަގުތު ތައް ހޭދަ ކުރެވުނީ ބޭކާރު ގޮތުގައިކަން އިހުސާސް ކުރެވޭ ހިނދުކޮޅެވެ. ކުރެވުނު އެތަށް ފާފައެއްމަތިންނާއި ނުކެރެވި ދޫކޮށްލެވުނު އެތައް ހެޔޮ ކަމެއް މަތިން ހަދާން ވެ ހިތުގެ ފުންމިނުން ރޮވޭ ހިނދުކޮޅެވެ. އޭނާ އާދޭހާއި އެކު ބުނާހިނދުކޮޅެވެ،


"އެއުރެންކުރެ މީހެއްގެ ގާތަށް މަރު އަތުވެއްޖައުމަން ދާނދެނެވެ. އެހިނދު އޭނާ ބުނެތެވެ. އަޅުގެ ވެރިރަސްކަލާކޮ! ތިމަންއަޅާ (ދުނިޔޭގެ حياة އަށް) އަލުން އަނބުރައި ފޮނުއްވާނދޭވެ. (އެއީ) ތިމަންފަހަތަށް ދޫކުޅަ ކަންތަކުގައި صالح عمل ކުރުމުގެ އެދުމުގައެވެ. ހަމަހިލާ އެހެންނަކުން ނުވާނެއެވެ. ހަމަކަށަވަރުން، އެއީ އޭނާ ބުނެލާ ބަހެކެވެ. އަދި އެއުރެންގެ ފަހަތުގައިވަނީ ފަރުދާއެކެވެ. އެއުރެން އަލުން ދިރުމަކަށް ފޮނުއްވާ ދުވަހަށްދާނދެނެވެ." ( سورة المؤمنون :100-99 ). 

އެހިނދުކޮޅަކީ އެތަށް ސޯލިހު އަޅުންނެއް އެހަނދުމަކުރުމުގައި ނިދި ކޮޅު ނަގާލި ހިނދުކޮޅެކެވެ. އެބައިމީހުން ގެ ތަންމަތި ދޫކުރުމަށް ފަހު ސަޖިދައިގައި ރޮމުންނެވެ. އަދި އެމީހުން ބުނެ ދަންނަވަތެވެ. 

" އަޅަމެންގެ ވެރިރަސްކަލާކޮ! إيمان ވުމަށް ގޮވާލައްވާ رسول އަކު ތިޔަބައިމީހުންގެ ވެރިރަސްކަލާނގެޔަށް إيمان ވާށޭ ގޮވާލައްވާ އަޑު، ހަމަކަށަވަރުން، އަޅަމެން އެހީމުއެވެ. ދެން، އަޅަމެން إيمان ވީމުއެވެ. އަޅަމެންގެ ވެރިރަސްކަލާކޮ! ފަހެ، އަޅަމެންނަށް އަޅަމެންގެ ފާފަތައް ފުއްސަވާނދޭވެ! އަދި، އަޅަމެންގެ ކިބައިން އަޅަމެންގެ ކުށްތައް عفو ކުރައްވާނދޭވެ! އަދި، ހެޔޮލަފާ މީހުންނާއެކު އަޅަމެން މަރުގަންނަވާނދޭވެ! " (سورة آل عمران : 193)

އެއީ އެންމެ ފަހު ގެ ނޭވާ ލާ ހިނދުކޮޅެވެ. އެހިނދު ކޮޅަކީ ފުރާނަ ހަށިގަނޑުން ވަކިވެ އޭގެ ވެރިފަރާތަށް އެނބުރި ގެންދެވޭ ހިނދުކޮޅެވެ.

"ހަމަހިލާ އެހެންނަކުން ނުވާނެއެވެ. ވައިނޮޅިކަށިގަނޑާ ހަމަޔަށް ފުރާނަ ފޯރައްޖެހިނދެވެ. އަދި އަންގަވާހިނދެވެ. ފަންޑިތައެއް ހަދައި، ފަރުވާއެއް ކުރާނީ ކާކުހެއްޔެވެ؟ . އަދި އެއީ ވަކިވުން ކަމުގައި يقين ކޮށްފި ހިނދެވެ. އަދި (މަރުގެ ސަކަރާތުގައި) އެއްފައި އަނެއްފަޔާ އޮޅައިލެވޭހިނދެވެ. އެދުވަހުން އެމީހަކު ގެންދެވުންވަނީ، ކަލޭގެފާނުގެ ވެރިރަސްކަލާނގެ حضرة އަށެވެ. " (سورة القيامة :26-30)