One Islaam

"ކިތާބުއް ރޫޙު" ގައި އިބްނުލް ޤައްޔިމު رَحِمَه الله ވިދާޅުވެފައިވެއެވެ.(ޞަފްޙާ:235)

 "ހައިބަތްތެރިކަމާއި ކިބުރުވެރިކަމާއި ދެމެދު ހުރި ފަރަޤު އެއީ: ހައިބަވަންތަކަމަކީ ﷲ މާތްކުރުމުންނާއި އެކަލާނގެއަށް ލޯބިކޮށް މަތިވެރިކުރުމުން ހިތްފުރާލައި އަޘަރެކެވެ. ހިތް މިއަޘަރުން ފުރިއްޖެނަމަ އެހިތަށް ނޫރުވަދެއެވެ.

އަދި މަޑުމައިތިރިކަމާއި ހިމޭންކަން އެހިތަށް ފައިބައެވެ. އަދި ހައިބަވަންތަކަމުގެ ފޭރާން ލެއްވެއެވެ. ދެން އޭނާގެ މޫނުމަތިން ފޮނިކަމާއި ހައިބަތު ފެނެއެވެ. ދެން ހިތްތައް އޭނާއާއި މެދު ލޯތްބާއި ހައިބަތް އެކުވެގެންދެއެވެ. އަދި އޭނާއަށްޓަކައި ހިތްތައް އޯގާވެރިވެއެވެ. އަދި އޭނާގެ ކިބައިން ލޯތަކަށް ފިނިކަން ލިބެއެވެ.

އަދި ހިތްތައް ޝައުޤުވެރިކުރުވައެވެ. އަދި އޭނާގެ ވާހަކަ ވާހުށީ، ނޫރެއްކަމުގައެވެ. އަދި އޭނާ ވަނުމާއި ނިކުތުމާއި ޢަމަލުވެސް ވާހުށީ ނޫރެއް ކަމުގައެވެ. އަދި އޭނާ ހިމޭންވެ މަޑުމައިތިރިވެއްޖެއްޔާ އޭނާގެ ޢިލްމުވެރިކަން މަތިކުރެވެއެވެ. އަދި އޭނާ ވާހަކަދައްކާނަމަ ހިތްތަކާއި ކަންފަތްތައް އަތުލައިގަނެއެވެ. ދެން ކިބުރުވެރިކަމަށް ބަލާލާއިރު އެއީ ޢަޖައިބުވުމާއި އަނިޔާވެރި ހިތެއްގެ އަޘަރެވެ.

އެ ހިތކީ ޖާހިލުކަމާއި އަނދިރިކަމުން ފުރިގެންވާ، އަޅުވެތިކަމުން ހުސްވެގެންވާ ހިތެކެވެ. އަދި އެހިތުގެ މައްޗަށް ރުޅިވެރިކަމާއި ޢަދާވަތްތެރިކަން ފައިބާފައިވާ ހިތެވެ. ދެން އޭނާ މީސްތަކުންނަށް ބަލާ ބެލުމަކީ މަލާމާތުގެ ފުރަގަސްދިނުމުގެ ބެލުމެކެވެ. އަދި އެމީހުންގެ ތެރޭގައި ހިނގާ ހިނގުމަކީ ބޮޑާކަމުގެ ހިނގުމެވެ.

އަދި މީހުންނާއި މެދު މުޢާމަލާތްކުރާނީ އެމީހުންނަށް އެއްވެސް އިސްކަމެއް ނުދީ އިންޞާފެއް ނެތް ހުރިހާ މޮޅެއް އޭނާއަށް ލިބޭގޮތަށެވެ. އަމިއްލަ ނަފްސަށް މޮޅުވެފައިވާ ހިނގައެވެ. އަދި ބައްދަލުވާމީހަކާއި އިސްވެ ސަލާމް ނުކުރާނެއެވެ. އަދި ސަލާމް ރައްދުކުރިޔަސް ކުރާނީ އޭނާ އަނެކާއަށް ދީލަތިވުމުގައި މާމައްޗަށް ގެންދެވުނު ކަމަށް ހިތާއެވެ. އެމީހުންނާއި މޫނުސީދާކޮށް ނުލާނެއެވެ.

އަދި އޭނާގެ ޚުލުޤަކުން ރަނގަޅު އަސަރެއްކރިޔަ ނުދޭނެއެވެ. އަދި އޭނާގެ ބޮލުގައި މީހެއްގެ ޙައްޤެއް އެޅިފައި ވާކަމަށް ނުބަލާނެއެވެ. އަދި އޭނާއަށް އެހެންމީހުން އަދާކުރަންޖެހޭ ޙައްޤުތައް ފެންނާނެއެވެ. އަދި އޭނާއަށް ވުރެ މާތްކަމެއް މޮޅުކަމެއް އެހެންމީހެއްގައި ވާކަމކަށް ނުދެކޭނެއެވެ.

އަދި އެހެން މީހުންގެ މައްޗަށްވާ އޭނާގެ މާތްކަމާއި މޮޅުކަން އޭނާއަށް ފެންނާނެއެވެ. ﷲގެ ޙަޟްރަތުން ދުރުވުން ނޫންކަމެއް އޭނާއަކަށް ނުވެއެވެ. އަދި މީސްތަކުންގެ ކިބައިން ރުޅިވެރިކަމާއި އަގުވއްޓި ކުޑަވުން ނޫންކަމެއް އޭނާއަކަށް ނުވެއެވެ."