އައްޝައިޚް ބިން ބާޒް رحمه الله ގެ އަގުހުރި ނަޞީޙަތުގެ ބަސްކޮޅެއް

ދީނީ އިލްމު ޙާޞިލް ކުރަމުންދާ ދަރިވަރުންނާއި ޢިލްމާއި މަޢުރިފާގެ އަހުލުވެރިންނާއި ޢިލްމުވެރީންގެ މައްޗަށް ވާޖިބުވެގެންވަނީ ރިވެތި ބަހުން މުޢާމަލާތް ކުރުމާއި ހުތުރު ވާހަކަތަކާއި ބަސްތަކުން ދުރުހެލިވެ މީސްތަކުންނާއި މެދު ރަނގަޅު ހީކުރުންތައް ހީކުރުމަށެވެ. އެހެނީ ﷲ ގެ މަގަށް ދަޢުވަތު ދޭމީހަކީ އެމީހެއްގެ މަސްއޫލިއްޔަތުގެ ސަބަބުން އެމީހަކު އުޅެމުންދާ މުޖުތަމަޢަށް އަދާކޮށްދޭންޖެހޭ ބޮޑެތި ޙައްޤުތަކެއް އެމީހެއްގެ ބޮލުގައި އެޅިފައިވާ މީހެކެވެ. 

އެހެންކަމުން އެބަޔަކަށް ވާޖިބުވެގެންވަނީ އެހެން މީސްތަކުންނަށް ދީނުގެ މަގަށް އައުމަށް އެހީތެރިވުމަށެވެ. ރިވެތި ބަސްތަކުން މުޢާމަލާތު ކުރުމާއެކު ރަނގަޅު ރިވެތި އުސްލޫބަކުން އެބަޔަކަށް މުޚާތަބު ކުރާ ޙާލުގައެވެ. އަދި އެހެން މީސްތަކުންނާއި މެދު ޞާލިޙު ހެޔޮ ވެގެން ހީކުރުންތައް ހީކުރުމާއި ވާހަކަ ދެއްކުމުގައި ހުންނަ ގަދަ ފަދަކަމާއި ހަރުކަށިކަމުން ދުރުހެލިވުމަށެވެ. އަދި އެހެން މީހުންގެ ކުށްތަކުގެ ފަސްފަހަތުން ގޮސް ހޯދައި ނުބެލުމާއި މީހުންގެ މެދުގައި ނަފްރަތު އުފެދޭ ޒާތުގެ ވާހަކަތައް ފަތުރައި ނުހެދުމަށެވެ. 

އަދި ހަމަ އެއާއެކު ދީނުގެ ޢިލްމު ޙާޞިލްކުރާ ދަރިވަރުންނާއި ދީނުގެ ޙުކުމްތައް ހޯދާ އެކަމުގެ ފައިދާ ލިބިގަންނަ އެންމެހާ މީސްތަކުންގެ މައްޗަށް ވާޖިބު ވެގެންވަނީ ޢިލްމު ވެރިޔެއްގެ ފަރާތުން މައްސަލައެއް ފެނި ކުށެއް ފެނިއްޖެނަމަ ޙިކްމަތްތެރިކަމާއި ހެޔޮ ނިޔަތާއެކު އެކަމާއި ގުޅިގެން ސުވާލު ކުރުމެވެ. އެހެނީ ރަސޫލުން ފިޔަވައި އެންމެހައި އިންސާނުންނަކީ ކުށް ކުރެވޭނެ ބައެކެވެ. 

އެހެންކަމުން އޭގެ މާނައެއް ނޫން ޢިލްމުވެރީންނާއި ދާޢީންނާއި މުދައްރިސުންނާއި ޚަޠީބުންނަކީ މަޢުޞޫމު އެއްވެސް ކުށެއް ނުކުރާ ބަޔަކޭ ! އެބޭފުޅުންނަށް ކުށް ކުރެއްވޭނެ !  މުހިއްމުކަން ދޭން ޖެހޭނީ ކުށެއް ކުރެވޭ ޙާލުގައި އެކަން އެބޭފުޅެއްގެ ސަމާލުކަމަށް ގެނެވުމުން އެބޭފުޅަކު އެކަމަށް ސަމާލުކަން ދިނުމެވެ.

ކުރިންވެސް ފާހަގަކުރެވުނު ފަދައިން ބޭފުޅެއްގެ ފަރާތުން މައްސަލައެއް ފާހަގަ ކުރެވުމުން ރަނގަޅު ހެޔޮ ނިޔަތަކާއި އެކު ރިވެތި ބަހުން އެކަން ބަޔާން ކޮށްދޭން ޖެހޭނެއެވެ. އެހިނދު އެމީހަކަށް އެކަމުގެ ފައިދާ ހާޞިލްވެ އެއްވެސް މީހެއްގެ އަބުރަށާއި ކަރާމަތަށް އަރައިނުގަނެ ބަދުބަހެއް ނުބުނެ މައްސަލަ ރިވެތި ގޮތުގައި ޙައްލުވެގެން ދާނެއެވެ. 

އެހެން ކަމުން ދީނަށް ދަޢުވަތު ދެއްވާ އަޚުން މުޖުތަމައަށް އެ ވަމުންދާ އެހީތެރިކަމަކީ ވަރަށް ބޮޑު ހެޔޮކަމެކެވެ. އަދި މުޖުތަމަޢަށް ޓަކައި އަދާ ކޮށްދެއްވަމުން އެގެންދަވަނީ ވަރަށް ބޮޑު ޙައްޤެކެވެ. އެހެންކަމުން އެބޭފުޅުންނާއި މެދު ރަނގަޅު ހީކުރުންތައް ހީކުރުމަށާއި އެބޭފުޅުންގެ ފަރާތުން ފެންނަ ކުށްތައް ރިވެތި ބަހުން ބަޔާންކޮށް ދޭން ޖެހޭނެއެވެ. ﷲ ގެ ދަރުމަ އެދޭ ޙާލު ހެޔޮ ނިޔަތާއެކުގައެވެ. މަޝްހޫރުވުމުގެ ނިޔަތުގައި ނުވަތަ މީހުންގެ ޢައިބު ސިފަތައް ހޯދުމުގެ ނިޔަތުގައެއް ނޫނެވެ.

ޢިލްމުގެ އަހުލުވެރީންނާމެދު ވަރަށް ހުތުރު ހަޑި ޢިބާރާތްތަކުން ތަފާތު ލިޔުންތައް ލިޔެފައިހުންނަ މަންޒަރު މިހާރަކަށް އައިސް އަޅުގަނޑުމެންނަށް އެބަފެނެއެވެ. މިއީ ޢިލްމު ޙާޞިލް ކުރާ ދަރިވަރެއްގެ ފަރާތުން ފެނުން އެކަށީގެންވާ މަންޒަރެއް ނޫނެވެ.