ދޫނި ފަދަ ތަކެތި ހިފައިގެން ގެންގުޅުމަކީ ކޮންކަހަލަ ކަމެއް؟

الحمد لله والصلاة والسلام على رسول الله وعلى آله وصحبه، أما بعـد

އިސްލާމީ ޝަރީޢަތުގައި ގޭގައި ގެންގުޅުން މަނާ ތަކެތި ( ކުއްތާ،އޫރު ފަދަ ތަކެތި ) ފިޔަވައި އެހެން ތަކެތި ގެން ގުޅުމަކީ ހުއްދަކަމެކެވެ. ނަމަވެސް އެތަކެއްޗަށް ކާންދީ ބަލަހައްޓަން ޖެހޭނެއެވެ. މާތް ﷲ ރުއްސުންލެއްވި އަނަސްގެ ފާނުގެ ކިބައިން އަލް އިމާމު ބުޚާރީ ރިވާ ކުރެއްވި ބަސްފުޅެއްގައި ވެއެވެ." މާތް ނަބިއްޔާއީ އެއްމެ އަޚުލާޤު ރިވެތި ސާހިބާއެވެ. އުއްމު ސުލައިމްގެ  އަބޫ ޢުމައިރު ކިޔާ ދަރިޔަކު ހުރެއެވެ. ސަލާމާއި ޞަލަވާތް ލެއްވި ކީރިތި ރަސޫލާ ވަޑައިގެންފިކަމުގައި ވާނަމަ ބައެއް ފަހަރު އެ ކުއްޖާ އާ ސަމާސާކުރައްވާ ހައްދަވައެވެ.

 އެއް ދުވަހަކު މިގޮތުން ސަމާސާ ކުރެއްވި އިރު އެ ކުއްޖާ ދެރަވެފައި އިންތަން ދެކެވަޑައިގެން ޙަދީޘް ކުރެއްވިއެވެ؟ އަބޫ ޢުމައިރު ހިތާމައިން އެހުރީ ކީއްވެގެން ހެއްޔެވެ؟ އެ މީހުން ދެންނެވި އެވެ. އޭ ! ﷲ ގެ ރަސޫލާއެވެ! އޭނާ ކުޅެން ގެން ގުޅުނު  ނަޣުރު(  ދޫނީގެ ވައްތަރެއް ) މަރުވީއެވެ. ދެން މާތް ނަބިއްޔާ صلى الله عليه وسلم  އެ ކުއްޖާ އަށް ގޮވަން ފެއްޓެވިއެވެ.( يا أبا عمير ما فعل النغير )  މާނައީ " އޭ އަބޫ ޢުމައިރެވެ! ނުޣައިރު ހެދީ ކިހިނެއް ހެއްޔެވެ؟ ( އެބަހީ އެ ދޫންޏަށް ވީ ކިހިނެއް ހެއްޔެވެ؟ ) رواه البخاري . މި ޙަދީޘް ފުޅުގެ ޝަރަޙައިގައި އަލް އިމާމު އިބްނު ޙަޖަރު  މިކަމުން  ދޫނި ގެންގުޅުމަކީ ހުއްދަކަމެއްކަން އެނގޭ ކަމުގައި ވިދާޅުވިއެވެ.  އެހެނީ  މިހާދިޘާގައި މާތް ނަބިއްޔާ އެކަން މަނާ ކުރައްވާފައެއް ނުވެއެވެ.

ބުޚާރީއާއި މުސްލިމުގެ އެހެން ރިވާޔަތެއްގައި ވެއެވެ." ބުޅަލެއް ބަންދުކޮށްފައި ބޭއްވުމުގެ ސަބަބުން އަންހެނަކު ނަރަކައަށް ވަނެވެ. އެކަނބުލޭގެ އެއަކަށް ކާކަށް ނުދެއެވެ. އަދި ބިމުގެ ތަކެތިން ކާކަށް ދުލެއްވެސް ނުކުރެއެވެ. " މިބަސްފުޅުންވެސް އެނގެނީ އެކަނބުލޭގެ ފާފަވެރިވާ ސަބަބަކީ އެއަށް ކާން ނުދިނުން ކަމުގައެވެ. ވީމާ އެފަދަ ތަކެއްޗަށް ކާންދީ ބަލަހަށްޓާ ނަމަ ގެން ގުޅުމަކީ އެންމެ ރަނގަޅުކަމެކެވެ. ކާން ނުދޭނަމަ ނުވަތަ އިހާނެތިކޮށް ހަދައި އަނިޔާ ކުރާނަމަ އެއީ ފާފަވާނެކަމެކެވެ. والله أعلم.