12:00 AM
ތުއްތު ކުދިންނަކީ އެހެންމީހުން އެކުދިންނަށް ބަލާލުމުން ހިތްހަމަޖެހޭ، ހިތަށް އުފާވެރިކަން ލިއްބައިދޭ ބައެކެއެވެ. ނުހަނު މައުސޫމު ބައެކެއެވެ. މީހުންގެ ހިތްތަކުގައި ތުއްތު ކުދީންނާއި މެދު ލޯބި އޮންނަނީ ކީއްވެ ބާއެވެ؟ އެކުދިންގެ ފަރާތުން އެހެންމީހުންނަށް ލިބޭނީ ކޮން ފައިދާ އެއް ބާއެވެ؟
މާތް ﷲ ސުބްޙާނަހޫ ވަތަޢާލާ ވަނީ އެކަލާންގެ ކޮންމެ މަޚްލޫގަކަށްވެސް އުޅެވޭނެ ގޮތް ހިއްމަވާދެއްވާފައެވެ. ތުއްތު ކުދީންނަކީ އެއްވެސް އާރެއް ބާރެއް ލިބިފައިނުވާ، އެހެން މީހުންގެ އެހީއަށް ބޭނުންވެފައިވާ ބައެކެއެވެ. މިކުދީންނަށް އަޅާލުމާއި ލޯބި ބޭނުންވެއެވެ.
މިގޮތުން މާތްﷲ ވަނީ މީސްތަކުންގެ ހިތްތަކުގައި ތުއްތު ކުދިންނާއި މެދު ލޯތްބާއި ކުލުނު އިންތިހާޔަށް ލައްވާފައެވެ. މިއީ މާތް ﷲގެ އޯގާވަންތަކަމެވެ. އެހެންނޫންނަމަ މި ކުދިން ދިރި ދުނިޔޭގައި ތިބުމަކީ ވަރަށް ނާދިރު ކަމެކެވެ.
އެންމެ ފުރަތަމަ ތުއްތު ދަރިފުޅު ރަޙިމުގައި އަށަގަތުމާއި އެކު އެ ދަރިފުޅާއި މެދު އެދަރިފުޅުގެ މައިންބަފައިން ރައްކާތެރިވެއެވެ. އެ ތުއްތު ދަރިފުޅާއި މެދު ފޮނި އުންމީދުތައް ކުރަންފަށައެވެ. އެ ތުއްތު ދަރިފުޅަށްޓަކައި އިންތިޒާރު ކުރަންފަށައެވެ.
ތުއްތު ދަރިފުޅު އުފަންވުމާއި އެކު، އެކުއްޖާގެ ވަށައިގެންވާ މީސްތަކުންގެ ލޯތްބާއި އަޅާލުން ލިބެންފަށައެވެ. ތުއްތު ކުދިންނާއި މެދު މީސްތަކުންގެ ހިތްތަކުގައި ލައްވާފައިވާ ލޯތްބެއްގެ ސަބަބުން އެއްވެސް މީހަކަށް އެކުދިންނާއިހެދި ބުރައަކަށް ނުވެ، ލިބޭ އުފަލެއް ކަމުގައި ބަލައިގެން މި އަގުބޮޑު އަމާނާތް ބަލަހައްޓައެވެ. މިއީ ކާއިނާތުގެ ވެރި ރަސްކަލާންގެ މިކަން ލައްވަވާފައިވާ ގޮތެވެ.
0 comments:
Post a Comment