ފުރަތަމަ ތިމާ އިޞްލާޙުވާށެވެ

އަހަރެން ކުޑައިރު، ޚިޔާލާއި ފިކުރު އެއްވެސްކަހަލަ ހިފެހެއްޓުމެއްނެތި ދޫކޮށްލެވިފައި އޮތްއިރު، ދުނިޔެ އިޞްލާޙުކުރުމުގެ ހުވަފެން އަހަރެން ދުށީމެވެ. 

ނަމަވެސް އަހަރެންގެ އުމުރުން ދޮށިވެ ވިސްނުން ތަރައްޤީވަމުން ދިޔަދިޔަހެން އަހަރެންނަށް ވިސްނުނީ ދުނިޔެއަކީ ބަދަލުވާނެތަނެއް ނޫންކަމެވެ. އެހެންކަމުން އަހަރެންގެ ޤައުމު އިޞްލާޙުކުރުމަށް އަހަރެން ޢަޒުމު ކަނޑައެޅީމެވެ.

އެކަމަކު، އެކަންވެސް ކުރެވޭވަރުގެ ކަމެއްކަމަކަށް ނުވިއެވެ.

އެންމެފަހުން އަހަރެން ޢުމުރުން ދުވަސްވެ، ގައިބާރުދެރަވެ، ދެން އިސާހިތަކު ދުނިޔެދޫކޮށް ދާންޖެހިދާނެހެން ހީވާންފެށުމުން އެންމެފަހުގެ ކަމެއް ގޮތުގައި ނަމަވެސް އަހަރެންގެ އާއިލާ، އަހަރެންގެ ގާތްތިމާގެ މީހުން އިޞްލާޙުކުރެވޭތޯ އަހަރެން މަސައްކަތްކުރީމެވެ. އެހެންނަމަވެސް އެމީހުން އަހަރެންނަށް ދިނީ ބީރު ކަންފަތެކެވެ.

މިހާރު އަހަރެން މަރުތަންމަތީގައި އޮވެ އަހަރެންނަށް ވިސްނެންފަށައިފިއެވެ. ފުރަތަމަވެސް އަހަރެންގެ އަމިއްލަ ނަފްސު އިޞްލާޙުކުރިނަމަ ފަހަރެއްގައި އަހަރެން ނަމޫނާއެއްކަމަށްދެކި އަހަރެންގެ އާއިލާއާއި ގާތްތިމާގެ މީހުންވެސް އިޞްލާޙުވެއްޖައީހެވެ.

އަދި އެމީހުންގެ އެއްބާރުލުމާއިއެކު އަހަރެންނަށް އަހަރެންގެ ޤައުމު އިޞްލާހު ކުރެވިއްޖައީހެވެ. އަދި ކިއެއްހެއްޔެވެ؟ އަހަރެންނަށް ދުނިޔެވެސް އިޞްލާޙު ކުރެވިއްޖައީސް ކަންނޭނގެއެވެ.

ތިމާގެ އަމިއްލަ ނަފްސު އިޞްލާޙުކުރުމަކީ ވަރަށްވެސް އުނދަގޫ ކަމެކެވެ. އެހެންނަމަވެސް، ދުނިޔެ އިޞްލާޙުކުރެވޭނީ ފުރަތަމަ ތިމާ އިޞްލާޙުވެގެންނެވެ.