ގަޔަށް ބާރު ހެދުމާއެކު ބުރުގާ އެޅުން

މުއުމިނު އަންހެނުން، އެކަނބަލުންނާއި ކައިވެނި ހެޔޮވާ މީހުންގެ (އެބަހީ: މަޙްރަމުނޫން މީހުން) ކުރިމަތީގައި އުޅެންޖެހޭނީ ފުރިހަމައަށް އައުރަ ނިވާކޮށްގެންނެވެ. އެއީ ގޭތެރޭގައި ނުވަތަ މަގުމަތީގައި ވިޔަސް މެއެވެ. މިގޮތުން އައުރަ ނިވާކުރުމަށް ބޭނުންކުރައްވާ ހެދުމުގައި ޝަރުތުތަކެއް ހުރުން ލާޒިމުވެގެން ވެއެވެ. މިގޮތުން:

1- ހަށިގަނޑުން ފޮރުވަން ލާޒިމުވާ ހުރިހާ ތަނެއް ހުންނަން ޖެހޭނީ ފޮރުވިފައެވެ. އެއީ މޫނާއި ދެ އަތްތިލަ ފިޔަވާ ހުރިހާ ތަނެކެވެ. މޫނާ ދެއަތްތިލަޔާއިމެދު ޚިޔާލުތަފާތުވެފައިވެއެވެ. ނަމަވެސް ފިތުނައިން ރައްކާތެރިވުމަށް މޫނާއި ދެއަތްތިލަ ފޮރުވުމަކީވެސް އެދެވިގެންވާ ކަމެކެވެ.

2- އެ ހެދުމަކީ އޭގެ ޒާތުގައި ޒީނަތްތެރިކަން ފާޅުކޮށްދޭ އެއްޗަކަށްވެގެން ނުވާނެއެވެ. ކުލަ ގަދަ ނުވަތަ ތަފާތު ކުލަކުލައިން މާ ބޮޑަށް ފާހަގަވާ ގޮތަށް ޒީނާތްތެރިކުރުން އެއީ އެދެވިގެންވާ ކަމެއް ނޫނެވެ.

3- ހަށިގަނޑުގެ އެތެރެ ފެންނަ ވަރުގެ ތުނި ހެދުމަކަށް ވެގެންނުވާނެއެވެ. ހަށިގަނޑުގެ ކުލަ ނުވަތަ އެތެރޭގެ އަންނައުނުތައް ނުފެންނަ ވަރުގެ ހެދުމެކެވެ.

4- ހަށިގަނޑުގެ ބައްޓަން ނުވަތަ ވަނާތައް ފާޅުވާ ވަރުގެ ގަޔަށް ބާރު ހެދުމަކަށް ވެގެން ނުވާނެއެވެ.

5- އެ ހެދުމަކީ ޢަޠަރާއި ސެންޓުން މީރުވަސް ދުއްވާފައިވާ އެއްޗަކަށް ވެގެން ނުވާނެއެވެ.

6- ފިރިހެނުންނަށް ޚާއްޞަ ނުވަތަ ފިރިހެނާއި އެއްގޮތްވާ ވައްތަރު ހެދުމަކަށް ވެގެން ނުވާނެއެވެ.

7- ކާފަރު އަންހެނުންގެ ޚާއްޞަ ނުވަތަ އެފަދަ މީހަކަށް ވައްތަރުވާން ލެވޭ ހެދުމަކަށް ވެގެން ނުވާނެއެވެ.

8- އަދި މަޝްހޫރުކަން ހޯދަން ލާ އެއްޗަކަށް ވެގެން ނުވާނެއެވެ.

9- އަޅާ ބުރުގާއަކީ އަންހެނާގެ ކަރުވަޅާއި މޭމަތި ރަނގަޅަށް ފޮރުވިފައި ހުންނަ ބުރުގާ އަކަށްވާން ޖެހޭނެއެވެ. މިގޮތުން ބޮލު ރުމާލާއި ދިގު ހެދުމާއެކު އަޅާ ބޮލު ފޮތިކޮޅު ބުރުގާ ކަމުގައި ނުބެލެވޭނެއެވެ.

10- ލާ ހެދުމަކީ އެކަށީގެންވާ ދިގު ހެދުމަކަށް ވާން ވާނެއެވެ. އެގޮތުން ފައިތިލައިގެ ތިރިއަށް ހުންނަ ވަރުގެ ހެދުންލުން ރަނގަޅެވެ. އެހެންނަމަވެސް ތިރިން ލަނީ ވަރަށް ދޫ ނުވަތަ ކަނޑިކި ފަދަ އެއްޗެއްނަމަ ކަކުލުގެ ތިރިއާ ހިސާބަށް ހުންނަ ހެދުމަކަށް ވުން ފުދޭނެއެވެ. އަދި ތިރިން ގަޔަށް ބާރު ހަރުވާޅެއް ލާނަމަ މަތިން ލާ ހެދުން ފައިތިލައާއި ހިސާބަށް ހުންނަން ޖެހޭނެއެވެ. والله أعلم