މުޖުތަމަޢުއެއް ހަލާކުވެގެންދާނެ ސަބަބުތައް

އިބްން ކަޘީރު، البدا و النهاية (އަލްބިދާޔާ ވަންނިހާޔާ) ގައި ޔަމޫކު ހަނގުރާމަ ނިމުނުގޮތުގެ ބާބު ނިންމަވާލެއްވުމުގެ ކުރިން، ޔަމޫކު ހަނގުރާމާއިގައި ބަލިވި ރޯމަނުންގެ ލަޝްކަރު އެނބުރި ހިރެކަލް ކާރިއަށް ދިއުމުން ހިނގާދިޔަ ހާދިސާއެއްވަނީ ނަކަލުކޮށްފައެވެ.

އެގޮތުން ރޯމަނުން މުސްލިމުންގެ އަތުން ނިކަމެތި ގޮތެއްގައި ބަލިވެގެން އަނބުރާ ދިއުމުން ހިރެކަލް ބުންޏެވެ. "ތިޔަބައިމީހުންނަށް ހަލާކު ހުއްޓެވެ!! އަހަންނަށް، ކަލޭމެން ހަނގުރާމަކޮށްގެން ބަލިވި ބަޔަކާއި ބެހޭގޮތުން ޚަބަރުދޭށެވެ. އެމީހުންނަކީ ކަލޭމެން ކަހަލަ އިންސާނުން ނޫންހެއްޔެވެ؟

އެމީހުން ބުންޏެވެ. އާދޭހެވެ.
ހިރެކަލް : ޢަދަދުގެ ގޮތުން ގިނައީ ކަލޭމެން ނޫންހެއްޔެވެ؟ ނޫނީ އެބައިމީހުން ހެއްޔެވެ؟
ލަޝްކަރު : ނޫނެކެވެ. އަހަރެމެން އެބައިމީހުންނަށްވުރެ އެތައް ގުނައެއް ޢަދަދުގެ ގޮތުން ހުރިހާ ހަނގުރާމައެއްގައި ގިނައެވެ.
ހިރެކަލް : އެހެންވީމަ ކަލޭމެން ތިގޮތަށް ނިކަމެތިވެގެން ތިއައީ ކީއްވެގެން ހެެއްޔެވެ.

މިހެން ބުނުމާއެއްކޮށް އެލަޝްކަރުގެ ކޮމާންޑަރެއް ކުރިއަށް ޖެހިލާފައި ބުންޏެވެ. "އެބައިމީހުންނަކީ ރޭއަޅުކަމަށް ތެދުވާބައެކެވެ. އަދި ދުވާލުގައި ރޯދަ ހިފާ ބަޔެކެވެ. އަދި އެބައި މީހުންނަކީ އަހުދުތައް ފުއްދާ ބަޔެކެވެ. އަދި ހެޔޮކަންތަކަށް އަމުރުކޮށް ނުބައިކަންތައް ނަހީކުރާ ބަޔެކެވެ. އަދި ޢަދުލުވެރިކަމަށް ލޯބިކުރާ ބަޔެކެވެ. އަދި އެބައިމީހުންގެ ތެރޭގައި އުފެދިފައިވާ އަޚުވަންތަކަމަކީ ވަރުގަދަވެގެންވާ ގުޅުމެކެވެ."

އެއާޚިލާފަށް އަހަރެމެންގެ ލަޝްކަރުގައި ވަނީ ރާބުއިމާއި ޒިނޭކުރުމާއި މަޖާކުރުމާއި އަދި އަހުދުތައް މުގުރާލުމާއި އަނިޔާވެރިކަމެވެ. އަދި މި ބިންފަސާދަ ވާނޭ ހުރިހާ ޢަމަލުތަކެއް ކުރުމުގައި އަހަރެމެން މިވަނީ މަޝްޣޫލުވެފައެވެ.

މިވާހަކަ އަޑުއަހާފައި ހިރެކަލް ބުންޏެވެ. " ކަލޭ ހަމަކަށަވަރުން ތިދެއްކީ ތެދުވާހަކައެވެ."

މީ އޭރު މުސްލިމުންގެ ޢަދުއްވެއް ދެކެމުން އައިގޮތެވެ. މިއަދު މިފެންވަރަށް ވިސްނާ މުސްލިމުންވެސް މަދުވާނެއެވެ. އަޅުގަނޑުމެންގެ މިމުޖުތަމަޢުގައި ޒިނޭކުރުމާއި ރާބުއިމާއި ރިބާކެއުން ގިނަވެ ނުދޭހެއްޔެވެ. ޒުވާނުންގެ ގިނަ ބަޔަކު މަސްތުގެ ޙާލަތުގައި ކަންމަތިތަކުގައި ބިއްޖެހިފަވާތަން މިވަނީ އާއްމު މަންޒަރަކަށް ވެފައެވެ. މިމުޖުތަމަޢު މިގޮތަށް ކުރިއަށްދާނަމަ ގިނަދުވަހެއްނުވެ، މިމުޖުތަމަޢު ހަލާކުވާނެކަމަށް ބުނާ މީހާއަށް ވުރެ ނުބައިމީހެއް ނުހުންނާނެއެވެ. ނަމަވެސް މިއި ޙަޤީޤަތެވެ. ތާރީޚްގެ ހެކިދެނީ މިގޮތަށެވެ. މުޖުތަމަޢުތައް ހަލާކުވެގެން ދިޔަގޮތަކީ ކޮމާންޑަރު ބުނިހެން ކަންތައްތައް ވާން ފެށުމެވެ.