ގޭގައި މަޑުން ހުންނަވާށެވެ

މުސްލިމުން އުޅޭންވީ، ނުބައިނުލަފާ މީހުނާއި، ތާކުންތާކު ނުޖެހޭ އާވާރާ މީހުންނާއި، ބޭކާރު އަނގަތަޅާ މީހުންނާ ދުރުހެލިވެގެންނެވެ. އެހެންކަމުން އެފަދަ މީހުނާ އެއްކިބާވެވަޑައިގެން ކަލާގެ ހުސްވަގުތުތައް ގޭގައި ހޭދަކުރައްވާށެވެ. ކަލާގެ ގޭގައި މަޑުމަޑުން ހުންނަވާށެވެ. ގޭގައި ހުންނަވައިގެން މަޢުލޫމާތު މުއްސަނދި ކުރައްވައި ހެޔޮ ޢަމަލުތައް އިތުރު ކުރައްވާށެވެ. އޭރުން ކަލާގެ ހިތްޕުޅަށް ތަސައްލީ ލިބިވަޑައިގަންނަވާނެއެވެ. ރޫޙާނީ ހަމަހިމޭންކަން ލިބިވަޑައިގަންނަވާނެއެވެ.

ހެޔޮކަމަށް ގޮވައިލެވޭ ގޮވައިލުންތަކާއި އިސްލާޙީ މަސައްކަތްތަކަށް ހުރަސްއެޅޭ ބޭކާރު ވިޔާނުދާ ކަންތައްތަކާ ދުރުހެލިވެ އެކަންކަމުން އެއްކިބާވުމަކީ މުސްލިމުން ކުރެ ހެޔޮކަމުގެ އަހްލުވެރީން ތަޖްރިބާ ކުރައްވައި، އަޖުމަ ބައްލަވައިފައިވާ ފަރުވާއެކެވެ. މުޖައްރިބު ފަންޑިތައެކެވެ. ޞާލިޙުން އޭގެ ޒަރީޢާއިން ކާމިޔާބު ހޯއްދަވައިފައިވާ ތަދުބީރެކެވެ.

އެހެންކަމުން އަޅުގަނޑު ތިޔަ އަޚާއަށް ދަންނަވާލަން ބޭނުންވަނީ، ނުބައި ޢަމަލުތަކާއި، ވިޔާނުދާ ވާހަކަތަކާއި، ތާކުންތާކު ނުޖެހޭ މީހުނާ އެކަހެރިވެވަޑައިގަތުމަށެވެ. އޭރުން ކަލާގެ ވިސްނުންފުޅު ތަރައްޤީ ވާނެއެވެ. ޢިއްޒަތާއި ކަރާމާތް ރައްކާތެރި ކުރެއްވޭނެއެވެ. އަބުރާއި، ޤަދަރު ހިފެހެއްޓެވޭނެއެވެ. ކަލާގެ އުއްމީދުތަކާއި، ކަލާގެ ދިރިއުޅުންވުން މާތްﷲ އާ ގުޅާލެއްވުމަށް ވަގުތު ލިބިވަޑައިގަންނަވާނެއެވެ.

ކަލާ ބައިވެރިވެވަޑައިގަތުން ރަނގަޅު އެއްވުންތަކަކީ މަގުމަތީގެ ހޯބޯލެވުންތަކެއް ނޫނެވެ. ނެތިމޮށުމާއި، ފުރައްސާރަކުރުމާއި، ދޮގުވާހަކަތައް ފެތުރުމުގެ ހޮޅުވަށިތަކެއް ނޫނެވެ. ނަމާދުގެ ޖަމާޢަތެވެ. ހުކުރު ނަމާދުގެ އިޖުތިމާޢެވެ. ރޯދަމަސް އިޙްޔާކުރުމުގެ ޖަލްސާތަކެވެ. ޢަޞުރު ނަމާދަށް ފަހު ބޭއްވޭ ދީނީ ދަރުސުތަކެވެ. ޢިލްމީ ހަވީރުކުރުންތަކެވެ. ހެޔޮކަންތަކަށް ގޮވާލައި ބިނާކުރަނިވި ޙަރަކާތްތަކަށް ބާރުއެޅުމުގެ ގޮތުން އެއްވާ އެއްވުންތަކެވެ. ކަލާއާ އެކަށީގެންވަނީ ކަންނެތްކަމާ ދުރުހެލިވެވަޑައިގަތުމެވެ. ބޭކާރު ކަންކަމަށް ހުރަހޮޅިވަޑައިނުގަތުމެވެ.

ކަލާގެ އަގު ހިފަހައްޓަވާށެވެ. ފާފަޔާމެދު ކީރިތި ކުރައްވާށެވެ. ދޫފުޅު ރައްކާތެރި ކުރައްވާށެވެ. ގޭގައި މަޑުން ހުންނަވާށެވެ. ވިޔާނުދާ ބޭކާރު މީހުންތަކާ އެކު ހިންގަވައި، މަޖްލިސް ކުރައްވައި ހެއްދެވުމަކީ ޙަޤީޤަތުގައި ކަލާގެ އަމިއްލަފުޅު ނަފުސާ ހަނގުރާމަ ކުރެއްވުމެވެ. ކަލާގެ އެތެރެފުށުގެ އަމަންއަމާންކަން ނަންގަވައިލެއްވުމެވެ. ސަބަބަކީ ވިޔާނުދާ ބޭކާރު މީހުންނަކީ ފުލޯކު ވާހަކަތަކާއި ރޯމަރު ދޮގުތައް ފަތުރާ މީހުންނެވެ. ފިތުނައިގެ ޙާދިޘާތަކުގެ ރަހަ ހެޔޮވަރުކޮށް އެ ޙާދިޘާތައް ވިއްކާ މީހުންނެވެ. ދޮގު ޚަބަރުތައް ފަތުރާ މީހުންނެވެ. ކަލާގެ ޠަބީޢީ އަވަހާރަވުމުގެ ކުރިން އެތަކެއް ފަހަރު ކަލާގެ ނަފުސު ކަތިލާނެ މީހުންނެވެ. އެބައިމީހުންގެ ތެރޭގައި އުޅުއްވާނަމަ ކަލާ މަގުނުފުރައްދައެއް ހުއްޓައެއްނުލާނެއެވެ.

އާދެ، އަޅުގަނޑު އުއްމީދުކުރަނީ ކަލާ ގޭގައި މަޑުކުރައްވާނެ ކަމަށެވެ. ހެޔޮކަންތަކުގައި މަޝްޣޫލުވެވަޑައިގަންނަވާނެ ކަމަށެވެ. ޝައްކެއް ނެތެވެ. ކުރީންވެސް ދެންނެވިފަދަ ހެޔޮކަމުގެ ޙަރަކާތްތަކުގައި ޝާމިލުވެވަޑައިގަންނަވާށެވެ. އޭރުން ފޫހިފުޅު ފިލާނެއެވެ. ވަގުތު ބޭކާރުވުމުން ސަލާމަތް ކުރެއްވޭނެއެވެ. ހިތްޕުޅަށް ރޫޙާނީ ހަމަޖެހުން ލިބިވަޑައިގަންނަވާނެއެވެ.

ކަލާގެ ޢުމުރުފުޅު ބަރުބާދު ނުކުރައްވާށެވެ. ނެތިމޮށުމާއި، ދެބައޮޑުވުމުން ދޫފުޅު ސަލާމަތް ކުރައްވާށެވެ. ޣީބައިގެ އަޑުން ކަންފަތްޕުޅު ރައްކާތެރި ކުރައްވާށެވެ. ކުށްހީތަކުން ނަފުސަށް އަނިޔާ ނުދެއްވާށެވެ. މިކަންކަން ތަޖްރިބާ ކޮށްލެއްވުމުން އޭގެ ހުރި ފޮނިމީރުކަން ކަށަވަރުވެވަޑައިގަންނަވާނެއެވެ.

އާދޭހެވެ. ވަހްމާއި، ތާކުންތާކުނުޖެހޭ ހުސްވާހަކަތަކުގެ ސަވާރީތަކަށް އަރައިތިބެ، އަނދޮޅުންނާއެކު ވަގުތު ހޭދަކުރާ މީހުންނަށް، ލޮލުކޮޅަށް ހަމަފެނިވަޑައިގަތުމާއެކު އަލްވަދާޢު ވިދާޅުވާށެވެ.