ޞާލިޙް އަންބެއްގެ މާތްކަމާއި މަތިވެރިކަން

عَنْ عَبْدِ اللَّهِ بْنِ عَمْرٍو رضي الله عنهما أَنَّ رَسُولَ اللَّهِ صَلَّى اللَّهُ عَلَيْهِ وَسَلَّمَ قَالَ : ( الدُّنْيَا مَتَاعٌ وَخَيْرُ مَتَاعِ الدُّنْيَا الْمَرْأَةُ الصَّالِحَةُ ) رواه مسلم – 1467 – 
ޢަބްދު ﷲ ބިން ޢަމްރު ރަޟިޔަ ﷲ ޢަންހު ވިދާޅުވިއެވެ. ﷲގެ ރަސޫލު ޞައްލަﷲ ޢަލައިހި ވަސައްލަމަ ޙަދީޘް ކުރެއްވިއެވެ.

“ދުނިޔޭގެ ހުރިހާ ތަކެއްޗަކީ އިންސާނާގެ ބޭނުމަށްޓަކާ ﷲ ލައްވަވާފައިވާ ތަކެއްޗެވެ. އަދި އެހުރިހާ ތަކެތީގެ ތެރެއިން އެންމެ ހެޔޮ އެއްޗަކީ ޞާލިޙު އަންބެކެވެ.”

عن سعد بن أبي وقاص رضي الله عنه أن النبي صلى الله عليه وسلم قال : ( أَرْبَعٌ مِنَ السَّعَادَةِ : الْمَرْأَةُ الصَّالِحَةُ ، وَالْمَسْكَنُ الوَاسِعُ ، وَالْجَارُ الصَّالِحُ ، وَالْمَرْكَبُ الْهَنِيء . وَأَرْبَعٌ مِنَ الشَّقَاءِ : الْمَرْأَةُ السُّوءُ ، وَالْجَارُ السُّوءُ ، وَالْمَرْكَبُ السُّوءُ ، وَالْمَسْكَنُ الضَيِّقُ ) والحديث صححه الألباني في صحيح الجامع برقم -887-

ސަޢުދު ބިން އަބީވައްޤާޞް ރަޟިޔަ ﷲޢަންހު ވިދާޅުވިއެވެ. ﷲގެ ރަސޫލު ޞައްލަﷲ ޢަލައިހި ވަސައްލަމަ ޙަދީޘް ކުރެއްވިއެވެ. “ހަތަރު ކަމެއް ބާއްޖަވެރި ކަމުގެ ތެރެއިން ވެއެވެ. ޞާލިޙު އަންބެކެވެ. ތަނަވަސް ވެގެންވާ ގެދޮރެވެ. ހެޔޮލަފާ އަވައްޓެރިއެކެވެ. އަދި ހިތް ހަމަ ޖެހޭ ސަވާރީއެކެވެ. އަދި ހަތަރު އެއްޗެއް އަބާއްޖަވެރިކަމުގެ ތެރެއިން ވެއެވެ. ނުބައި އަތްބެކެވެ. ނުބައި އަވަށްޓެރިއެކެވެ. އުނދަގޫ ސަވާރީއެކެވެ. އަދި ތަންދަތި، އުނދަގޫ ގެދޮރެވެ.”

ޘައުބާން ރަޟިޔަ ﷲ ޢަންހު ރިވާކުރެއްވިއެވެ.”ރަނާއި ރިއްސާއި ބެހޭގޮތުން ވަޙީބާވާލެއްވުނު ހިނދު (ތައުބާސޫރަތުގެ 34 ވަނަ އާޔަތް) އެބައިމީހުން ބުންޏެވެ. ’އަހަރުމެން ހޯދަންވީ ދެން ކޮންކަހަލަ މުދަލެއް ހެއްޔެވެ؟’ އެހިނދު ޢުމަރު ރަޟިޔަﷲޢަންހު ވިދާޅުވިއެވެ. ’އަހަރެން ތިކަން ކަލޭމެންނަށް ބަލައިދޭނަމެވެ. މިހެން ވިދާޅުވެފައި އެކަލޭގެފާނުގެ ޖަމަލުމައްޗަށް ސަވާރުވެ ވަޑައިގެން ރަސޫލުﷲ ޞައްލަﷲ ޢަލައިހި ވަސައްލަމަ ގެ އަރިހަށް ވަޑައިގަތެވެ.

 އަދި ތިމަން ކަލޭގެފާނުވެސް ޢުމަރުގެފާނުގެ ފަހަތްޕުޅުން ވަޑައިގަތީމެވެ. ދެން ޢުމަރުގެފާނު ކީރިތި ރަސޫލާ ޞައްލަﷲ ޢަލައިހި ވަސައްލަމައަށް ވިދާޅުވިއެވެ. ’އޭﷲގެ ރަސޫލާ ޞައްލަﷲ ޢަލައިހި ވަސައްލަމަ އެވެ. އަޅުގަނޑުމެން ހޯދަންވީ ކޮންކަހަލަ މުދަލެއްތޯއެވެ.’ދެން ރަސޫލު ﷲ ޞައްލަﷲ ޢަލައިހި ވަސައްލަމަ ޙަދީޘްކުރެއްވިއެވެ. ’ތިޔަބައިމީހުން ޝުކުރުވެރި ހިތެއް ހޯދާށެވެ. ﷲގެ އިސްމުފުޅު ޛިކުރުކުރާދުލެއް ހޯދާށެވެ. އަދި މުއުމިނު އަތްބެއް ހޯދާށެވެ. އެއަތްބަކީ ތިޔަބައިމީހުންނަށް އާޚިރަތް ކާމިޔާބު ކުރުމުގައި އެހީތެރި ވެދެވޭފަދަ މީހެކެވެ.”(ތިރްމިޛީ 3094، އިބްނު މާޖާ 1856، އަޙްމަދު 5/282)

ޞާލިޙު އަންބަކީ، ރަސޫލުﷲ ޞައްލަﷲ ޢަލައިހި ވަސައްލަމަ އިރުޝާދު ދެއްވާފައިވާ ފަދައިން ފެށުނީއްސުރެ ޞާލިޙު މީހަކަށް ވާން ޖެހެއެވެ.

عن أبي هريرة رضي الله عنه عن النبي صلى الله عليه وسلم قال : ( تُنكَحُ المرأةُ لأربَعٍ : لِمَالِهَا ، وَلِحَسَبِهَا ، وَجَمَالِهَا ، وَلِدِينِهَا ، فَاظفَر بِذَاتِ الدِّينِ تَرِبَت يَدَاكَ ) رواه البخاري (4802) ومسلم (1466) 
އަބޫހުރައިރާ ރަޟިޔަﷲޢަންހު ރިވާކުރެއްވި ފަދައިންނެވެ. ރަސޫލުﷲ ޞައްލަﷲ ޢަލައިހި ވަސައްލަމަ ޙަދީޘް ކުރެއްވިއެވެ. “އަންހެނާއާއި ކައިވެނި ކުރެވެނީ ހަތަރު ސަބަބަކަށް ޓަކައެވެ. އޭނާގެ ފައިސާވެރިކަމާއި ނަސަބުވެރިކަމާއި ރީތިކަމާއި ދީންވެރިކަމަށްޓަކައެވެ.ފަހެ ދީންވެރި އަންހެނާއާއި ކައިވެނި ކުރުމުންކާމިޔާބު ލިބިގަންނާށެވެ.”

އަލްޙާފިޘް އިބުނު ޙަޖަރު އިސްވެ ދެންނެވުނު ޙަދީޘާއިމެދު ވިދާޅުވިއެވެ. “އޭގެ މާނައަކީ މީހަކަށް ކަމުދާ ސިފައަކަށް ދީނީ ހަމައަކުން ބަލާނަމަ އެއީ ރިވެތި ސުލޫކެވެ. ދިރިއުޅުމުގެ ހުރިހާ މައިދާނެއްގައިވެސް މިފަދަ ކަންކަމަށް ސަމާލުކަން ދިނުމަށް ޚާއްޞަކޮށް ތިމާގެ ޙަޔާތާއިގުޅިގެންދާ ކަންކަމުގައި ބެލުމުގެ މުހިންމުކަން އަންގައިދީފައި ވެއެވެ. ކީރިތި ރަސޫލާ ޞައްލަﷲ ޢަލައިހި ވަސައްލަމަ، ދިރިއުޅުމަށް ދީންވެރި އަންހެނަކު އިޚުތިޔާރު ކުރުމަށް އަމުރު ކުރައްވާފައިވަނީ އެސަބަބަށްޓަކައެވެ. އެހެނީ ތިމާގެ މުޅި ޙަޔާތުގެ މަޤުޞަދަކީ ދީންވެރި އަދި ހެޔޮލަފާ ދިރިއުޅުމެއް މިދުނިޔޭގައި ހޭދަ ކުރުންކަމުގައި ވާތީއެވެ.”