އިސްލާމިކް ފެޝަންޝޯވ ބޭއްވުމަކީ ދީނީ ގޮތުން ކޮންކަހަލަ ކަމެއްތޯ؟

     

"އިސްލާމިކް ފެޝަންޝޯވ އަކީ އަޅުގަނޑުމެންގެ ތެރެއަށް ފާފަ އެނޫން ނަންތަކަކަށް ބަދަލުކޮށްގެން ގެނެވޭ ގެނައުމެއް، އެކަންކަމާ އަޅުގަނޑުމެން އެއްކިބާވާންޖެހޭނެ"

ސުވާލު:އިސްލާމިކް ފެޝަންޝޯވ ބޭއްވުމަކީ ދީނީ ގޮތުން ކޮންކަހަލަ ކަމެއްތޯ؟


"މިދުވަސްވަރު ވަރަށްބާރަށް ތިކަހަލަ ވާހަކައެއް ދެކެވެމުން އެބަދޭ. އަޅުގަނޑުމެން ކޮންމެކަމެއްގައި އޭގެ ކުރިއަށް އިސްލާމިކް ޖަހާލީމާ އެވީކީ ނޫން. އަޅުގަނޑު މިދިޔަ ހަފްތާގައި ދައްކަމުން ދިޔައީ ހަލާލް ބިޔަރުގެ ވާހަކަ. ބިޔަރަކީ އޭގެ ޒާތުގަ ޙަރާމް އެއްޗެއް. އެއީ އަލްކަހޯލް ލައިގެން ހަދާ ބްރޭންޑްނޭމެއް. އަލްކަހޯލް ނުވަތަ މަސްތުވުމަށް މިބޭނުންކުރާ ބަނގުރަލަށް އޭގެ ނަމަކަށް ޙަލާލް، ނުވަތަ ޙަލާލް ޝެމްޕެއިން. އެއްގޮތަކަށްވެސް ކީއްކުރަންތޯ މިކަހަލަ ނަންނަން އަޅުގަނޑުމެން ބޭނުންކުރަނީ. ތިސުވާލުގަ ފެޝަންޝޯވ އަށް އަޅުގަނޑު ދާނީ މިވާހަކައަށްފަހު...

މީގައި މިހިމެނެނީ ފޮރުވިފައިވާ ވިސްނުމުގެ މައްސަލައެއް. އޭގެ މިސާލަކީ އޮފީހުގައި އުޅޭ ޖޯން ކިޔާ މީހަކަށް ހެޕީ މެރީ ކްރިސްމަސްއޭ ބުނުން ހުއްދަވާނެހެއްޔޭ؟ ކޮބައިހޭ އޭގެ މައްސަލައަކީ ތިމަންނަ އޭނަގެ ދީނަށް ބަދަލުވަނީއެއްނޫނޭ. އޭނަވެސް ތިމަންނައަށް ރޯދަމަހާއި އީދުގައި ތަޙްނިޔާ ކިޔައޭ. މިކުރެވެނީ ކޮންކަމެއްކަން އެނގިގެން ކުރަންހިނގާށޭ އެއީ އެއްކަންތައް.

އަނެއްކަންތަކަކީ ޙަރާމްކަމެއްގެ ކުރިއަށް އިސްލާމް ލީމާ "އިސްލާމިކް ފެޝަން ޝޯވ"، "ހަލާލް ބިޔަރު"، "ހަލާލް ޝެމްޕެއިން" ނުވަތަ "ހަލާލް އޫރުމަސް" ހަލާލު އޫރުމަސްކިޔާފަ ނުވަތަ ހަލާލް ޕޯރކް ކިޔާފަ ހަލާލް ޕޯރކް ޕިއްޒާ ކިޔާފަ އެޔަށް ތިމަންނަމެން އަޅަނީ ޕޯރކް އެއްނޫނޭ ވަޅޯމަހޭ، ދެން ކީއްކުރަންތޯ އެއަށް ޕޯރކް ކިޔަންވީ. ބައެއް ޢިލްމުވެރިން މީގައި ވިދާޅުވަނީ މިއީ ފާފަތަށް އަޅުގަނޑުމެންގެ ސިކުނޑިއަށް ލުއިކޮށްލާ އޭގެ ރަހަ ކަނޑުވާލާ "faafa its not more any faafa!" ފާފަ އަހަރުމެންނަކަށް ނުވެޔޭ، އެހެންވީމާ އޭތި އަޅުގަނޑުމެންނަށް ވަރަށް އާދައިގެ ކަމަކަށް ވެގެން މިދަނީ.

އަޅުގަނޑުމެންގެ ތެރޭގައި އެކަހަލަ ބައިވަރު ކަންތައްތައް މިހާރު ތައާރަފްކުރުވާފަ އެބަހުރި. އެއްކަމަކަށް މިއޮންނަނީ ބިރުނެތި މިކުރާކަންތައްތައް. ބިރުވެތިވުމަކީ އަޅުކަމެއް. އެހެންވީމާ ބިރެއްނެތިގެން އިންސާނަކު ލަދުޙަޔާތް ކެނޑިގެން އުޅުމަކީ އިސްލާމްދީން ހުއްދަކުރާކަމެއްނޫން. ހަމަ އެގޮތަށްއޮތީ އާންމުރައްޔިތުންނަށްވެސް މިހާރު އަންހެނުންނާއި ފިރިހެނުން އެކުވެގެން ނައިޓްކްލަބެއް ހުޅުވަން އެދެފިނަމަ އެއްވެސްމީހަކަށް ނުރުހެވޭނެ. އެކަމަކު ޘަގާފަތުގެ ނަމުގަ ބޮޑުބެރުޖަހާފަ އަންހެނުންނާއި ފިރިހެނުން އެކުވެގެން ނަށަންވެއްޖެއްޔާ [މިމީހުންނަށް]މައްސަލައެއްނެތް ޓީވީ މޯލްޑިވްސް އިން ދައްކަންވިޔަސްވެސް! މީހަމަ ކުރެވޭ ކަންތައް އިނގޭތޯ މީޑިއާތެރޭގަ. މީހަމަ އަޅުގަނޑުމެންގެ ތެރެއަށް ފާފަ އެނޫން ނަންތަކަކަށް ބަދަލުކޮށްގެން ގެނެވޭ ގެނައުމެއް. އެކަންކަމާ އަޅުގަނޑުމެން އެއްކިބާވަންމިޖެހެނީ.

އަޅުގަނޑު ވަރަށް ހިތާމަކުރަން ފެޝަން ޝޯވ އެއް ވެއްޖިއްޔާ ވާނީ ފެޝަންޝޯވ އަކަށް. މިޒަމާނުގަ އަންހެނުންގެ ފެޝަން ދައްކާނީ ހަމައެކަނި އަންހެނުންނަށޭ. މިމަންޒަރު ފެންނާނީ އަންހެނުންނަށޭ. އެއީވެސް "އިމްޕޮސިބަލް" ވާނޭކަމެއްނޫން. އަޅުގަނޑުމެން ކޮންމެ މީހެއްގެ ޖީބުގައި މިއޮންނަނީ ތޭރަމެގަޕިކްސަލް ކެމެރާލީފޯނެއް. ގިނަފަހަރަށް މިޒަމާނުގެ ފޯނަކީ ކެމެރާއެއް.

 ވަގުތުން އިންޓަރނެޓާ ގުޅިފައި ހުރީ ކެމެރާ. އެއްފަހަރަކު ބުނެފާނެ ތިމަންނަމެން އަންހެނުންނަށް މިބާއްވަނީ އިސްލާމީ ތަރަހައިގެ ތެރޭގައޭ. ހަމަ އަޅުގަނޑުމެންގެ ތެރޭގައި ކުރާ ހުރިހާ މުންކަރެއް ކުރަނީ އިސްލާމީ ތަރަހައިގެ ތެރެއިންނޭ ކިޔައިގެން. އެއަށް ޖަވާބުދެއްވަމުން ﷲ ސުބްހާނަޙޫ ވަތައާލާ ވަޙީކުރައްވަނީ، "އެމީހުން ފާފައެއް ކުރާ ހިނދުގައި ނުވަތަ އަމިއްލަ ނަފްސަށް އަނިޔާވެރިވެފައި ބުނާނެ މިއީ ތިމަންނަމެންގެ ކާބައިން އުޅުނުގޮތޭ" އަދި ހަމަ ޤުރުއާނުގެ އިބާރާތް "وَاللَّـهُ أَمَرَ‌نَا بِهَا" ﷲ ތިމަންނަމެންނަށް އަމުރު ކުރީމައޭ މިކަންކުރަނީ. ޔަހޫދީން ގެރިއަށް އަޅުކަންކުރަމުންދިޔައީވެސް ﷲ އަމުރުކުރީމައޭ އެމީހުން ބުނަމުން ދިޔައީ. އެކަމަކު މުޅި އިސްލާމީ [އުންމަތް]ޚިލާފް ގެރިއަކަށްނުވަތަ އެހެން އެއްޗަކަށް އަޅުކަންކުރުން.

އަޅުގަނޑު މިދަންނަވަނީ މިކުރެވޭ ކަމަށް އަޅުގަނޑުމެން ވިސްނާލަންޖެހެއޭ. އިސްލާމިކް ފެޝަންޝޯވ ނުވަތަ އިސްލާމިކް ކިޔާފައި މިނަން އަޅުގަނޑުމެން މިގުޅުވާލަނީ ﷲ ސުބްހާނަޙޫ ވަތައާލާއާ. އަޅުގަނޑުމެންނަށް ބުނެވޭކަހަލަ ތިމަންމެން ހިތުހުރިހާފާފައެއްމިކުރަނީ ﷲ އެންގެވީތީވެ، އެކަލާނގެ ދީނުގައި އޮތީތީވެ ދެން އޭތި ބަދަލުވަމުންމިދަނީ މިއީ ތިމަންމެންގެ ކާބަފައިންއުޅުނުގޮތޭ އަޅުގަނޑުމެންގެ ތެރޭގައި ހަމަ ކާބަފައިންގެ ޘަގާފަތް ދިރުވަންނޫންތޯ މިކަންމިކުރެވެނީ.

އެސުވާލު ކުރެއްވީމަ އަޅުގަނޑުދަންނަވަން ވަކިބަޔަކު ކުރާތީވެ، ނުވަތަ ވަކިބަޔަކަށްވެގެން ދޭޖަވާބެއްނޫން. އެކަމަކު އަޅުގަނޑުމެން ހަމައެކަނި ފެޝަން ޝޯވ އެކޭނޫން ދަންނަވަންވީ. އަޅުގަނޑުމެންގެ ދަރިންނަށް ހޯދައިދޭ އެއްޗިއްސާ އެކުދިންބަލާ ފިލްމުތަކާ މަންޒަރުތަކާ، އަދި އެކުދިންއުޅޭގޮތާ މިހުރިހާކަމެއްގައިވެސް އަޅުގަނޑުމެން އިބަޖެހޭ އިސްލާމީ ވަންތަަކަން ދަމަހައްޓަން.

އަޅުގަނޑުމެންނަށް ފެންނަ މަންޒަރުތަކާ، އަޑުތަކާ އަޅުގަނޑުމެންނަށް މި ތަބާވެވެނީ ހަމަ ލޯމަރާލައިގެންތިބެއޭ އަޅުގަނޑު ދަންނަވާނީ. އެއީ އެއްގޮތަކަށްވެސް އެކަންކުރަން އޮތްގޮތެއްނޫން." 

ޖަވާބު: (އައްޝައިޚް ޙަސަން މޫސާ ފިކުރީ)