ޒުވާނުން ހަރުދަނާ ބަޔަކަށްވުން މުހިއްމު

ވޭތުވެދިޔަ ދިގު ޒަމާނުގައި ދިވެހިންގެ ދިރިއުޅުމަށް ބޮޑެތި ބަދަލުތަކެއް އައިސްފައި ވާކަން މިއީ އަޅުގަނޑުމެން ކޮންމެ މީހަކަށްވެސް އެގޭ ޙަގީގަތެކެވެ. ދިރިއުޅުމަށް މިއައި ބަދަލާއި އެކު ޒުވާނުންނަށްވެސް ބޮޑެތި ބަދަލުތަކެއް އައިސްފައިވާ ވާހަކަ ވަރަށް ގިނައިން އިވެއެވެ. ޒުވާނުންނަށް އައިސްގެން މިއުޅޭ ބަދަލުތަކާއި ބެހޭ ގޮތުން ވާހަކަ ދައްކާލުމަކީ މިވަގުތު ކޮންމެހެންވެސް ކުރަންޖެހިފައިވާ ކަމެކެވެ. ޒުވާނުންނަށް އައިސްގެން މިއުޅެނީ ކޮންކަހަލަ ކުރިއެރުންތަކެއްތޯ ބަލާލުމަކީ ހަމަ މުހިންމުކަމެކެވެ.

މިއީ މިއަދު ދިވެހި ގައުމު ދެކެ ލޯބިވާ ކޮންމެ ދިވެހި ދަރިއަކުވެސް އޮޅުން ފިލުވާލަން ބޭނުންވާނޭ ކަމެކެވެ. އުފެދެމުން އަންނާނެ ޝުއޫރުތަކެއްވެސް މެއެވެ.ގިނަ ޒުވާނުންތަކެއް ތައުލީމީ ހަޔާތް ނިންމާ ދިރިއުޅުމަކަށް މިސްރާބު ޖަހާފައި ވެއެވެ. ނަމަވެސް ޒުވާނުންގެ ކިބައިގައި ހަރުދަނާކަމެއް ނެތޭ ބުނާއަޑު އަޅުގަނޑު ވަރަށް ގިނައިން އަހަމެވެ. މިއީ އަޅުގަނޑުމެން އެހާ ގިނައިން އަހާ ހިތްވާ އަޑެއް ނޫނެވެ. އަދި ބޭނުންވާ ގޮތެއްވެސް ނޫނެވެ. މިއަޑުތައް އިވުމުން ހިތަށް ކުރަނީ ފުން އަސަރު ތަކެކެވެ.

ޒުވާނުންގެ ތެރޭގައި ދީނީ ކަންތައްތަކަށްދޭ އަހަމިއްޔަތު ކުޑަވަމުން ދިއުމަކީ މިއަދު އަޅުގަނޑުމެން ހިތާމަ ކުރާކަމެކެވެ. އިސްލާމްދީންދެކެ ލޯބިވާ ގިނަ ޒުވާނުންތަކެއް އަޅުގަނޑުމެންގެ ތެރޭގައި އުފައްދަން އެބަޖެހެއެވެ. ދީނީ ވާޖިބުތައް އަދާކުރާ މިންވަރު އިތުރުކުރަން އެބަޖެހެއެވެ. މިސްކިތްތަކުން ޒުވާނުން ފެންނަ އަދަދު ނިސްބަތުން މަދެވެ. ދީނީ ވާޖިބުތަކަށް ދޭއަހަމިއްޔަތު ކުޑަވުމުގެ ސަބަބުން، މުޖުތަމަޢުއަށް އޭގެ ނޭދެވޭ އަސަރު ފޯރަމުން އެބަދެއެވެ. ސީދާ ގޮތެއްގައާއި ނުސީދާގޮތެއްގައެވެ. މަގުމަތީ ގިނަވެގެން އުޅޭ ޒުވާނުންތަކެއް ފެންނަމުން އެބަދެއެވެ.މިމީހުން ގިނަވެ ބާކީވެ ނާއުއްމީދު ވެފައި ތިބޭ ކަހަލައެވެ.އިލްމުވެރިން ބުނާގޮތުގައި ދީންވެރިކަމެއް ނެތީވިއްޔާ އާޚިރަތަށް ބިރުވެތިކަމެއް ނޯންނާނެއެވެ.

ގައުމިއްޔަތު ދިރުވާނީ ކޮންބައެއް ތޯއެވެ. އަޅުގަނޑުމެންނަކީވެސް އަމިއްލަ ސަގާފަތަކާއި އަމިއްލަ ގޮތްތްކެއް ޒަމާނުއްސުރެ ގެންގުޅެމުން އައި ބަޔަކީމުއެވެ. ދިވެހި ސަޤާފީ ކަންކަމަށް ހުންނަންޖެހޭ ލޯތްބާއި އަޅާލުން ޒުވާނުންގެ ތެރޭގައި ހުރީ ކިހާވަރަކަށް ބާވައެވެ. ހުޅަނގުގެ ތަހްޒިބާއި އުޅުމާއި ގުޅުންތަކަށް ޒުވާނުން ލެބެމުން ދެއެވެ.ފެންނަ ފެނުންތަކަށް އާއެކޭ ބުނަމުން ދަނީއެވެ. ހެދުން އެޅުމުގައި އެއްވެސް ކަހަލަ ހަރުދަނާ ކަމެއް ނެތެވެ. އެއްވެސް ކަމަކަށް ޖެހިލުންނުވާ ކަމުގެ އިބާރާތްތައް ބޭނުން ކުރުމާއި، މަސްތުވާތަކެތީގެ އަޅުންނަށްވެ ދަނީއެވެ. ކަންފަތާއި ނޭފަތާއި ބިމުގައި ބޮޅުފަތިތައް އަޅާ އިންސާނީ ސިފަވަންތަކަންވެސް ގެއްލިގެން ދަނީއެވެ. ބޮލުގައި ތަފާތު ކުލަތައް ޖައްސާ ހަޑިހުތުރު ބަހުން މަގުމަތީގައި މުއާމަލާތް ކުރަމުން ދަނީއެވެ. މިއީވެސް ހަމަ ކުރިއެރުންތޯއެވެ.

ގައުމުގެ އުފެއްދުން ތެރިކަން ކުރިއެރުވުމަށް ތިބީ ކޮން ބައެއްތޯއެވެ. އާމްދަނީއެއް ލިބޭ މަސައްކަތަށް ހުންނަ ޝައުގުވެރިކަން ކުޑައެވެ. މާދަމާއާއި ދޭތެރޭ ފިކުރެއް ނުކުރެއެވެ. ޒުވާނުންގެ ތެރެއިން ވަކިބަޔަކު ކުއްކުރާ މީހުންގެ ލިސްޓުގައި ތަކުރާރުވަމުން ދެއެވެ. ޖަލަށް ގިނަވަމުންދާ ޒުވާނުންގެ ބައިގަނޑެވެ. ކުއްކުރުން އިތުރުވެ، މަކަރާއި ހީލަތް އާއްމުވެ މަސްތުވާ ތަކެތީގެ ވިޔަފާރީގައި ޝާމިލުވާ ޒުވާނުންގެ އަދަދު އެއްދުވަހުން އަނެއް ދުވަހަށް އިތުރުވަމުން ދަނީއެވެ. ކުޑަކުދިންނަށް ކުރާ ޖިންސީ ގޯނާތައް އިތުރުވެއްޖެއެވެ. ޒުވާނުންނަށް ވަޒީފާ ނުލިބޭ ވާހަކަ އިތުރުވަމުން ދާއިރު އެއްމެ އާދައިގެ ވަޒީފާގައިވެސް ފެންނަނީ ބިދޭސީންނެވެ.

އަޅުގަނޑުވެސް އެއްބަސްވަމެވެ. މުޖުތަމައުގައި ތައުލީމީ ޒޫވާނުން އެބަތިއްބެވެ. ނަމަވެސް މިއީ ނިސްބަތުން މަދު އަދަދެކެވެ. އަމާން ކުއްކުރުން މަދު މާހައުލެއް އަޅުގަނޑުމެން ބޭނުންވާ ހިނދު އަޅުގަނޑުމެންގެ ގައުމު ހިންގަން ތިބި އަދުގެ ޒުވާނުން ވަޅުގަނޑަކަށް ވެއްޓިގެން ހިގައްޖެނަމަ އޭގެ ނޭދެވޭ އަސަރު އަޅުގަނޑުމެންގެ ދަރިންގެ ދަރީންނަށް ކުރާނެއެވެ. އެއީ ހެޔޮލަފާ ރަގަޅު ޖީލެއް ބިނާ ކުރުމަށް ކުރެވޭ މަސައްކަތަށް ލިބޭނޭ ވަރަށް ބޮޑު ގޮންޖެހުމެކެވެ. ނަމަވެސް މިކަންތައްތައް ރަގަޅު ކުރުމަށް އަޅުގަނޑުމެން އެއްމެން އެކީގައި މަސައްކަތް ފަށަން ވެއްޖެއެވެ. މިއީ އަޅުގަނޑު ފާޅުކުރަން ބޭނުންވެގެން މިއުޅޭ ސުއޫރު ތަކެވެ. އެއްމެން އެކީގައި މިކަމަށް މަސައްކަތް ކުރުން މިއީ މިއަދު ވިސްނާލުން މާރަގަޅު ކަމެކެވެ.