12:00 AM
ވުޖޫދުގައިވާހާ އެއްޗަކީ ﷲ ސުބްޙާނަހޫ ވަތަޢާލާ އުފައްދަވާފައިވާ ތަކެއްޗެވެ. އަދި އެތަކެތި ބަލަހައްޓަވައި ގެންގުޅުއްވަނީ ވެސް އެކަލާނގެއެވެ. އެތަކެއްޗަށް ރިޒުޤު ދެއްވަނީ ވެސް އެކަލާނގެއެވެ. އެތަކެތީގެ ހަނުހުރުމާއި އެންމެހައި ޙަރަކާތްތަކެއް ވެސް އެކަލާނގެ ދެނެވޮޑިގެން ވެއެވެ. އަލްއަންޢާމު ސޫރަތުގެ 59 ވަނަ އާޔަތުގައި ވާފަދައިން ކަޑާއި އެއްގަމުގައި ވާހާ އެއްޗެއް އެކަލާނގެ ދެނެވޮޑިގެން ވެއެވެ. އަދި އެކަލާނގެއަށް ދެނެވޮޑިގެން ނުވާ ގޮތުގައި ގަހަކުން ފަތެއް ވެސް ނުވެއްޓެއެވެ.
ކަންމިހެން ހުރުމާއިއެކު ބައެއް ކަހަލަ މަޙްލޫޤާތުތައް ކާންބޯން ކުރާ މަސައްކަތާއި ދިރިއުޅުމުގައި ރައްކާތެރިކަން ހޯދާން ކުރާ މަސައްކަތާ މެދު ވިސްނާ ފިކުރު ކުރުމުން އަޅުގަނޑުމެންނަށް ޙައިރާންކަމެއް ލިބެއެވެ. ގައިގެ ކުލަ ވަށައިގެންވާ އެއްޗަކާއި އެއްކުލައަކަށް ބަދަލުކޮށް ކެމޮފްލާޖް ކުރެއެވެ. ހަމަ އެފަދައިން ކަނޑުގައި އުޅޭ ބައެއް ކަހަލަ މަހާއި ޖަނަވާރުތަސްވެސް މިގޮތަށް ޢަމަލުކުރެއެވެ. މިއީ އެސޮރުމެންނާ ކުރިމަތިވާ ޙަމަލާތަށް ދިފާޢު ކުރުމަށް ކުރާ ކަމެކެވެ.
ވިސްނުމެއް ނުވާ މިމަޙްލޫޤަތުތަކަށް އެފަދަ ކަންތައް ކުރަން އެނގެނީ ކިހިނަކުން ބާވައޭ، އިންސާނުންގެ ހިތަށް އަރައެވެ. ބިމުގައި އުޅޭ ހިންޏާއި މާމުއި ކުޅަނދުރު ފަދަ ސޫފާސޫފިތަށް ރިޒުޤު ހޯދުމަށާއި އެސޮރުމެން އަމިއްލައަށް ރައްކާތެރިވާން މިކުރާ މަސައްކަތަކީ އެކަމާއި މެދު ވިސްނާ ފިކުރު ކޮށްފި މީހަކު ހައިރާންވާ ވަރުގެ ކަންކަމެވެ. ކީރިތި ޤުރުއާނުގައި އައިސްފައިވާ ފަދައިން ސުލައިމާނު ޢަލައިހިއްސަލާމް ހިނިތަކުގެ ވާދީ އަކާ އަރާހަމަވެ ވަޑައިގަތުމުން އޭގެތެރެއިން ހިންޏެއް ގޮވައިލިއެވެ. އޭ ހިނިތަކާއެވެ. ތިޔަ ހިނިތަކުގެ ގެތަކަށްވަދެ ރައްކާތެރިކަން ހޯދާށެވެ. ހަމަ ކަށަވަރުން ސުލައިމާނުގެފާނާއި އެކަލޭގެފާނުގެ ލަޝްކަރަށް ނޭނގި ތިބި ޙާލުގައި ތިޔަ ހިނިތަށް އެއުރެންގެ އެބޭކަލުންގެ ފައިދަށުވެ ނެތި ހިނގައިދާނެއެވެ. ފަހެ ހިންޏަސް މި ފަހުމް ދެއްވީ ކޮން ފަރާތެއް ބާވައެވެ؟
މާމުއި ކުޅަނދުރުގެ ދިރިއުޅުމަކީވެސް އެއާ މެދު ވިސްނާ ފިކުރުކޮށްފި މީހަކަށް އޭގައި އިލާހީ ކުޅަދުންވަންތަ ކަމުގެ ވަރުގަދަ ހެކިތަކެއް ވާކަން ދައްކުވައިދޭ ކަމެކެވެ. ފަހެ އެސޮރުމެންގެ ޙަރަކާތްތަކަކީ ވަކި ފަރާތެއްގެ އަމުރުފުޅުތަކަސް ހުރާ ޙަރަކާތްތަކެއްކަން ކަށަވަރުވެއެވެ. އެކަން އެގޮތަށް ކުރުމަށް އެސޮރުމެންނަށް އަމުރުކުރެއްވީ އެސޮރުމެންގެ ވެރި ރަސްކަލާނގެއެވެ. ފަހެ މާތްﷲ ކީރިތި ޤުރުއާނުގައި އައްނަޙްލު ސޫރަތުގެ 68 ވަނަ އާޔަތާއި 69 ވަނަ އާޔަތުގައި ވަޙީ ކުރައްވާފައިވާ ބަސްފުޅުގެ މާނައިގާ ވެއެވެ.
"ކަލޭގެފާނުގެ ވެރިރަސްކަލާނގެ ކުޅަނދުރަށް إلهام ކުރައްވައި އެންގެވިއެވެ. ފަރުބަދަތަކުގައްޔާއި، ގަސްގަހާގެހީގައްޔާއި، މީހުން ހަދައިދޭ ބިނާތަކުގައި، ހަތާހަދައި އުޅޭށެވެ!. ދެން ތިޔަ ކުޅަނދުރު، ހުރިހާ މޭވާތަކުން ކައިއުޅޭށެވެ! ފަހެ، ތިޔަ ކުޅަނދުރުގެ ވެރިރަސްކަލާނގެ، ފަސޭހަކޮށް ދެއްވާފައިވާ މަގުތަކުން ހިނގާށެވެ! އެ ތަކެތީގެ ބަނޑުން ކުލަތައް ތަފާތު ބުއިމެއް ނުކުމެގެން އާދެތެވެ. އޭގައި (އެބަހީ: މާމުއިގައި) މީސްތަކުންނަށް ބަލިފަސޭހަވުން ވެއެވެ. ހަމަކަށަވަރުން، ފިކުރުކުރާ ބަޔަކަށް، އެކަމުގައި ހެތްކެއްވާކަން ކަށަވަރެވެ."
އެކްސްކްލޯޕް އޭ ކިޔާ ސޫތްޕަކީ ވެސް އަޖާއިބެއް ފަދަ އެއްޗެކެވެ. ފްރާންސުގެ ސޯބޯން ޔުނިވަރސިޓީގެ ޕްރޮފެސަރެއްކަމުގައިވާ މިލަން އެޑްވާޑް އެއާބެހޭ ގޮތުން ލިޔެފައި ވެއެވެ. އެކްސްކޮލޯޕަކީ މުޅިން ވެސް ވަކިން ދިރިއުޅޭ ސޫތްޕެކެވެ. އެސޮރު ބިސްއެޅުމާއި އެކު ވަގުތުން މައި އެތި މަރުވެއެވެ. އޭގެ ފަހުގައި ޅަ އެއްޗިހިތައް ބިހުން ނުކުންނަނީ ފައެއްނެތް ފަނިތަކެއްގެ ސިފައިގައެވެ. އެސޮރުމެންގެ ގަޔަކު އަމިއްލަ ނަފްސު ދިފާޢު ކުރާނޭ ވަރުގެ ބާރެއް ނުހުރެއެވެ. ކާބޯތަކެތި ވެސް އަމިއްލައަށް ހޯދައި ގަތުމުގެ ޤާބިލުކަމެއް ލިބިފައެއް ނުވެއެވެ. އެހެނެއްކަމަކު ބޮޑުވެ އަމިއްލައަށް އުޅެވޭވަރުވަންދެން، ބަންދު ތަނެއްގައި އަމާން ކަމާއި އެކު އެއް އަހަރު ދުވަސް ވަންދެން އެސޮރުމެން ތިބެން ޖެއެވެ. އެހެންނޫންނަމަ މަރުވެދެއެވެ.
އެހެންކަމުން އެކްސްކޮލޯޕްގެ މައި އެތި ބިސް އަޅާ ދުވަސްވަރު ކައިރިވުމުން ލަކުޑި ގަނޑެއްގައި ކޮނެ ހަރުހަދައި ބިސްއަޅާން ތައްޔާރު ކުރެއެވެ. މިމަސައްކަތުން ނިމުމާއެކު އޭގެ ޅަ އެއްޗަކަށް އެއް އަހަރު ދުވަހަށް ބޭނުންވާނޭ ކާނާ ކަމުގައިވާ ތަފާތުވައްތަރުގެ މާމެލާމެލީގެ ކުރި އާއި އެކިބާވަތުގެ ގަސްގަހާގެހީގެ ފޮނި ރަހަ ދޭ ފަތްތަކާއި މިބާވަތުގެ އެއްޗެހި އެތަނަށް ޖަމާ ކުރެއެވެ. އޭގެ ފަހުގައި އެތަނަށް ބިހެއް އަޅައި އެބިހުގެ މަތީގައި ކީސްކުޑި ނުވަތަ ލަކުޑިގަނޑު ކޮނުނުއިރު ހެދުނު ކުނޑިން ފަންގި ފިލައެއް ހަދައެވެ. ދެން އަނެއްކާވެސް ޅައެއްޗަކަށް އެއް އަހަރުދުވަހަށް ބޭނުންވާނޭ ކާނާ އެފަންގިފިލާ މައްޗަށް ޖަމާ ކުރެއެވެ. އޭގެ ފަހުގައި އެތަނަށްވެސް ބިހެއް އަޅައި އެބިހުގެ މަތީގައި ފަންގި ފިލައެއް ހަދައެވެ. މިގޮތުގެ މަތިން ބައިބަޔަށް ބިސްއަޅައި ނިމޭތަނާ މައިއެތި މަރުވެދެއެވެ.!!
މިކުޑަކުޑަ ސޫތްޕަށް މިކަން ކުރަން ދަސްކޮށްދެއްވީ ކޮން ފަރާތެއްތޯއެވެ؟ އަމުދުން އެސޮރަކީ ވަކިން އުޅޭ އެއްޗަކަށް ވެފައި، ބިސްއަޅައި ނިމޭއިރު އެސޮރު މަރުވާނޭކަމާއި އެސޮރުމެންގެ ޅަ ދަރީން އެއް އަހަރުވާންދެން އެހާ ރައްކާތެރި ގޮތެއްގައި ތިބެން ޖެހޭނޭ ކަމާއި މިކަންކަން އެސޮރަށް އެނގުނީ ކިހިނަކުން ބާވައެވެ؟
އެއްވެސް ޝައްކެއް ނެތް ގޮތުގައި މިއިން އެނގޭ އެއްޗަކީ ދިރޭ ހުރިހައި އެއްޗަކަށް ވެސް އެ އެއްޗަކަށް ބޭނުންވާނޭ ކަންކަން ކުރުމުގެ ފަހުމާއި ވިސްނުން އެސޮރުމެން އަމިއްލައަށް ހޯދައި ގަންނަނީ ނޫން ކަމެވެ. އަދި ކީއްތޯއެވެ؟ މިކަމުން ދޭހަވަނީ އެއީ އެތަކެތި ހެއްދެވި ކުޅަދުންވަންތަ މާތް ރަސްކަލާނގެ އެތަކެއްޗަށް ދެއްވާ ފަހްމަކާއި ޢިލްމެއް ކަމެވެ. އެކަލާނގެ އެތަކެއްޗަށް ކުރައްވާ އިލްހާމެއްކަމެވެ.
0 comments:
Post a Comment